2
Yuxin awekano sunil istxꞌojal;
sunil etal,
yebꞌ xin leqꞌtiꞌal,
yebꞌ ischiwa hekꞌul,
yebꞌ hehobꞌnikanh tzotiꞌ.
2-3 Ta kaw yeli xaheyohtanhelo sikꞌlebꞌil ta kꞌul Komam Dios jinh,
hakaꞌojabꞌ yochen hunu nichꞌan neneꞌ yim ismiꞌ,
hakojabꞌ tuꞌ heyochen huneꞌ kuybꞌanile yet Komam Dios mach sombꞌiloj,
hak tuꞌ xin cheyiqꞌ heyip yinh hekolbꞌanil.
Komam Cristo lahan hakaꞌ hunu chꞌen chꞌen niman yelapnoj chꞌayto xeꞌo nha
4 Hitzojonhweko iskꞌatanh Komam Jesucristo,
kaw itzitz Komam.
Komam Cristo tuꞌ lahan hakaꞌ hunu chꞌen chꞌen kaw niman yelapnoj ayayto xeꞌo nha.
Yajaꞌ xin qꞌojbꞌilkanilo chꞌen yu ebꞌnaj watxꞌemkanh nha,
yaj wal xin Komam Dios sikꞌnikanikoj yebꞌ kaw niman yelapno ye yul sat.
5 Walonh xin itzitzonhpaxo yinh Komam Cristo,
lahanonhpaxo hakaꞌ chꞌen chꞌen,
yuxin jaqꞌaꞌwe hamanil tet Komam Dios kohuniko yinh Komam Cristo yatutoj,
yebꞌ xin konhyapaxiko Komam sacerdotehal,
yetxa Komam jehi.
Yu Komam Jesucristo yuxin chu jaqꞌni kobꞌa xahanbꞌalil tet Komam yet chikoyijen tzet chala.
Haꞌ huneꞌ tuꞌ,
kaw kꞌul yul sat Komam Dios.
6 Yuto chal yul Yum Komam Dios hakaꞌ tiꞌ:
«Yul konhobꞌ Sión wakojan huneꞌ mak hakaꞌ chꞌen chꞌen chꞌayto xeꞌo yipo nha.
Haꞌ huneꞌ chꞌen chꞌen tuꞌ sikꞌbꞌililo chꞌen wuhan,
kaw niman yelapno ye chꞌen.
Haꞌ mak chako yanma yinh huneꞌ mak tuꞌ,
mach chikan yinh txꞌixwilal,»a
xhihayoj.
7 Hanhonh chijayto yul janma yinh Komam Cristo,
kaw niman yelapno ye Komam yul kosat,
yaj wal mak mach chiyako yanma yinh Komam,
haꞌ yinh hunteqꞌan tuꞌ tzꞌibꞌnhebꞌilkano yul Yum Komam bꞌay chal hakaꞌ tiꞌ:
«Haꞌ huneꞌ chꞌen chꞌen qꞌojbꞌilkanilo yinh ismunil yu ebꞌnaj watxꞌem nha,
haꞌ chꞌen kaw kꞌul yok xeꞌo nha,»b
xhihayoj.
8 Chalpaxo yul Yum Komam hakaꞌ tiꞌ:
«Haꞌ huneꞌ chꞌen chꞌen tiꞌ,
haꞌ bꞌay chitxaqꞌmo anma kat yaykꞌayi,»c
xhihayoj.
Chitxaqꞌmo anma yuto machi isyije tzet chal Istzotiꞌ Komam Dios;
halbꞌilkanoj xin tato hak tuꞌ chiyu anma tuꞌ.
Iskonhobꞌxa Komam Dios je tinanh
9 Walonh tiꞌ,
huneꞌ konhobꞌal anma sikꞌbꞌilxalo yu Komam Dios,
hak tuꞌ jehi,
sacerdotehonh yinh ismunil Komam Dios Jahawil,
huneꞌ niman konhobꞌ nanxa yehiloj yu Komam.
Pohbꞌil honhxa yu Komam yu jok yeto Komam yunhe jok kopujbꞌanikꞌo iskꞌulchꞌanil Komam.
Xakonhyilo Komam Dios xol qꞌejholo,
konhyaniko xol huneꞌ issajilqꞌinal kaw kꞌulkanoj.
10 Yet payat mach iskonhobꞌo Komam Dios heyehi,
yaj wal tinanh iskonhobꞌxa Komam heyehi.
Yet payat tuꞌ,
machi mak chitzꞌay iskꞌul teyinh,
yajaꞌ tinanh chitzꞌay iskꞌul Komam Dios teyinh.
Haꞌ koyijen tzet chal Komam Dios haꞌojabꞌ chiju
11 Hex wuxhtaj,
hex wanabꞌ,
hex xahan ay wuhtiꞌan,
hanhonh tiꞌ mach kokonhobꞌo huneꞌ yul sat yibꞌanhqꞌinal tiꞌ,
tonhe chonhekꞌi;
yuxin chintaqꞌekantojan teyet,
mach chebꞌeybꞌalnhe hunteqꞌan tzet chiyoche henimanil,
yuto haꞌ hunteqꞌan istxꞌojal tuꞌ chiyaqꞌle howal yebꞌ janma.d
12 Kꞌulojabꞌ cheyute hebꞌeybꞌal xol anma maxhto ohtanheho Komam Dios,
waxanhka xin chexhal-lax txꞌojal tinanh hakaꞌtanhe kaw ay hemul,
yajaꞌ yu iskꞌulal cheye,
yuxin chal ebꞌnaj kꞌul-la tzotiꞌ yinh Komam Dios yet chiꞌilchati sunil anma yinh huneꞌ tzꞌayik yet chul Komam.
13 Yunhe mach chiꞌel ispixan Komam Dios heyu yijemojabꞌ cheyute hebꞌa tet ebꞌnaj ayikto yul kapil,
haktikꞌapax tuꞌ tet naj jahaw,
yuto ekꞌna aykanh yip ismunil naj.
14 Kat heyijenpaxo tzet chal ebꞌnaj yahaw aqꞌbꞌil ismunil yu naj yaniko anma yinh isyaꞌtajil yet chiyaniko ismul,
kat yalni ebꞌnaj kꞌul-la tzotiꞌ yinh mak kꞌul tzet chiswatxꞌe.
15 Choche Komam Dios ta kaw kꞌul cheyute hebꞌeybꞌal,
haxinwal matzet tzꞌaj yalaꞌ anma txꞌoj isnabꞌal teyinh yebꞌ ayko yinh issukal.
16 Ekꞌanhwe yinh iskꞌulal yuto kolbꞌilexxa.
Yajaꞌ matolo yu xahechah hekolbꞌanil yuxin chexok hewatxꞌeꞌ istxꞌojal,
¡machoj!
To ischejabꞌxa Komam Dios heyehi.
17 Ayojabꞌ yelapno ye heyet anmahil yul hesat,
kat xin hexahannhenpaxo anma ayxako yul isqꞌabꞌ Komam.
Xiwanhwe tet Komam Dios;
yebꞌpaxo naj jahaw,
ayojabꞌ yelapno ye naj yul hesat.
Yabꞌe Komam Jesucristo isyaꞌtajil
18 Hex chejabꞌ heyehi,
ayojabꞌ yelapno heyahaw yul hesat,
yijewe tzet chiyal ebꞌnaj.
Yaj maxhnhetaj tet ebꞌnaj kꞌul isnabꞌal,
yebꞌ ebꞌnaj kaw kꞌul iskꞌul,
wal xin yijewepaxo tet ebꞌnaj tonhe chichichon yanma.
19 Yuxin ta yu ayko konabꞌal yinh Komam Dios,
yuxin tonhe chonhetalaxi,
machi xin komul,
yaj ta chitecha ju,
kaw chitzala Komam Dios jinh.
20 Yajaꞌ ta yu hunu istxꞌojal chiju yuxin chonhok yinh isyaꞌtajil kat xin jaqꞌni techahoj,
kaw matzet chaliloj yuto komultikꞌa yehi.
Yaj ta yu hunu iskꞌulal chikowatxꞌe,
kat yaqꞌlax isyaꞌtajil jilaꞌ,
kat jaqꞌni techahoj,
wal huneꞌ tuꞌ kaw niman tzet chalilo yul sat Komam Dios.
21 Yu huneꞌ tuꞌ yuxin konhyawte Komam.
Hayet yekꞌyaꞌ yanma Komam Cristo ju,
isyenikano Komam yinh tzet chu kobꞌeybꞌalnheni.
22 Machi nino ismul Komam yakoj,
machipaxo leqꞌtiꞌal yala.e
23 Hayet isbꞌuchlax Komam,
machi ispajtze.
Hayet yalaxiko Komam yinh isyaꞌtajil,
machi yalpaxo Komam howalil.
Haꞌ huneꞌ yute Komam,
tonhe yabꞌenheto isbꞌa yul isqꞌabꞌ Komam Dios,
yuto yohta Komam tato haꞌ Komam Dios chiꞌilni tzet chꞌeliko yinh istoholal.f
24 Haꞌ Komam Jesucristo ijnikanokanh komul yinh isnimanil yet iskam yinh teꞌ kulus.
Hak tuꞌ xin matxa chu yaqꞌni kabꞌo isbꞌa istxꞌojal jinh,
yuto kamnajonhxalo yinh mule,
hak tuꞌ utebꞌilonhkano yu Komam,
yuxin chu kowatxꞌeniko kobꞌeybꞌal yinh istoholal.
Kaw yabꞌe Komam isyaꞌtajil yinh isnimanil ju yunhe kokolcha yul isqꞌabꞌ huneꞌ yabꞌil ayko yinh janma,
haꞌ ton komul.g
25 Hayet yalanhto tuꞌ,
lahan hex hakaꞌ noꞌ meꞌ kꞌaynatoj,
wal tinanh xin xakexmeltzoko yul isqꞌabꞌ Komam Cristo,
yuxin haxa Komam chextanheni yebꞌ xin haꞌ chiꞌilni heyanma.h