4 Konabꞌaweti yinh tzet eliko ebꞌnaj ángel yako ismul sata Komam Dios.

Wal xin mach yaqꞌ nimankꞌulal Komam yinh ebꞌnaj.

Haꞌ huneꞌ utelax ebꞌnaj,

qꞌojlaxto ebꞌnaj bꞌey huneꞌ ehobꞌal nahat yich xol qꞌejholo bꞌay alaxiko cadena yinh masanto yet chiꞌapni istzꞌayikal yet chilni Komam tzet chiꞌeliko ebꞌnaj.^a

5 Mach yaqꞌpaxo Komam Dios nimankꞌulal yinh anma yet payxa yet yanayo Komam huneꞌ niman yaxnhabꞌ yibꞌanh sunil anma kaw txꞌoj yute isbꞌa.

Hanhechꞌan yaꞌ Noé kolchahi yebꞌpaxo hujwanh yetbꞌi.

Yaꞌ Noé tuꞌ,

yalikꞌo yaꞌ tet anma yet yalanhto tato kꞌul chute isbꞌa,

kat iswatxꞌenpaxiko isnabꞌal.^b

6 Yebꞌpaxo xin,

yati Komam Dios isyaꞌtajil yibꞌanh anma ay bꞌey Sodoma yebꞌ anma ay bꞌey Gomorra,

isnhusilo Komam kabꞌebꞌ konhobꞌ tuꞌ yinh hunelnhe,

kaw tanhxanhe elkanikoj.

Kankano huneꞌ tuꞌ kuybꞌanilehal tet anma machiswalil chute isbꞌa yinh tzujaniloxa.^c

7 Wal xin hanhechꞌan yaꞌ Lot kolchalo xol anma tuꞌ,

yuto haꞌ istoholal iswatxꞌe yaꞌ.

Kaw ok isyaꞌil yinh yanma yaꞌ yilni istxꞌojal hunteqꞌan anma tuꞌ.

8 Wal yaꞌ Lot tuꞌ xin,

kaw kꞌul isbꞌeybꞌal yaꞌ,

yajaꞌ hunun tzꞌayik haknhetikꞌa tuꞌ yilni yaꞌ yebꞌ xin yabꞌen yaꞌ istxꞌojal chiswatxꞌe anma tuꞌ.

Yuxin bꞌiskꞌulalnhetikꞌa ye yaꞌ yu anma.

9 Haktikꞌapax tuꞌ tinanh,

yohta Komam Dios iskolni yinh ilwebꞌal makta ayko yanma yinh Komam,

wal mak mach kꞌulo isnabꞌal chiꞌalaxayo isyaꞌtajil yibꞌanh yet chihul istzꞌayikal yet chilni Komam tzet chꞌeliko anma.

10 Chayo Komam isyaꞌtajil yibꞌanh makta chisyijeto iswatxꞌen istxꞌojal chiyoche isnimanil,

yebꞌ kaw machi nichꞌano yelapno Komam Dios Jahawil yul sat.

Hunteqꞌan ebꞌnaj tuꞌ kaw lutꞌkanoj,

yebꞌ kaw kanhye chute isbꞌa ebꞌnaj.

Machi nino chixiw ebꞌnaj isbꞌahwa yinh hunteqꞌan kaw ay yelapno ye ay satkanh.

11 Wal ebꞌnaj ángel waxanhka kaw ekꞌna ay ishelanil,

yebꞌ xin kaw aqꞌbꞌil yip ebꞌnaj yul isqꞌabꞌ,

yajaꞌ yet ayko hunteqꞌan mak ay ismul yinh sat Komam Dios Jahawil,

mach maqꞌbꞌilo yok ebꞌnaj isqꞌanni isyaꞌtajil yibꞌanh.

12 Hunteqꞌan ebꞌnaj leqꞌtiꞌ tuꞌ tonhetikꞌa chibꞌuchwa ebꞌnaj yinh hunteqꞌan tzet ye tuꞌ mach yohtajoj,

lahan ebꞌnaj hakaꞌ no noqꞌ machi isnabꞌal,

pitzkꞌanahi yu istzabꞌlaxayoj kat yaqꞌlax kamoj.

Chitanhtzelaxilo ebꞌnaj hakaꞌ no noqꞌ tuꞌ yuto machiswalil chiyute isbꞌa ebꞌnaj,

13 hak tuꞌ chu ischahni ebꞌnaj ispaj selel isyaꞌtajil yaqꞌ tet hunuxa maka.

Kaw xin chitzala ebꞌnaj chaqꞌni ebꞌnaj tzet choche yanma.

Hak tuꞌ xin chu yinilo ebꞌnaj hepixan,

chiniti ebꞌnaj txꞌixwilal texol yet chaqꞌni tzalaho yanma ebꞌnaj yu istxꞌojal chiswatxꞌe yet chehunbꞌan hebꞌa hewaꞌi.

14 Yaꞌxanhe yilnito ebꞌnaj ebꞌix ix,

kat yocheniko ebꞌnaj ebꞌix.

Kaw maxhtikꞌa chitibꞌayo yu ebꞌnaj yaniko ismul.

Chaqꞌ subꞌchaho ebꞌnaj makta maxhto kaw yip yinh yet Komam;

qꞌayna ebꞌnaj yocheniko tzet ye tuꞌ mach kꞌuloj.

Kaw xin tzꞌaktiꞌnhebꞌilxa ebꞌnaj tuꞌ.

15 Kꞌaynato ebꞌnaj yuto xaꞌishekꞌilo isbꞌa ebꞌnaj yul huneꞌ bꞌeh kaw tohol.

Haꞌ isbꞌeybꞌal naj Balaam iqꞌbꞌil yu ebꞌnaj,

iskꞌahol icham Beor.

Naj Balaam tuꞌ ischejabꞌ Komam Dios naj yalni,

yajaꞌ yako naj ismul yuto kaw yocheko naj chꞌen melyu haltelax tet,

yaj yu iswatxꞌen naj istxꞌojal.

16 Yajaꞌ maylax naj yu huneꞌ noꞌ burro yu istxꞌojal iswatxꞌe naj tuꞌ.

Wal xin maxhtikꞌa bꞌay chijabꞌe istzotel hunu no noqꞌ,

yaj tzotelkanh noꞌ hakaꞌ anma.

Haꞌ noꞌ xin kachwahi yunhe mach chiswatxꞌe naj huneꞌ istxꞌojal tuꞌ.^d

17 Haꞌ hunteqꞌan ebꞌnaj kuywawom machiswalil chute isbꞌa tuꞌ,

lahan ebꞌnaj hakaꞌ hunu kꞌuh machi haꞌ yul,

yebꞌ xin hakaꞌ moyan nanannhe bꞌay chikawyilaxto yu jaqꞌeqꞌ.

Wal xin kaw tꞌinhanxa yeko yibꞌanh ebꞌnaj isto xol qꞌejholo,

haꞌ tuꞌ xin chiꞌekꞌ ebꞌnaj yinh sunilbꞌal tiempo.

18 Chikanh isbꞌa ebꞌnaj chalni ebꞌnaj tzotiꞌ machi yelapno yehi.

Chismontento ebꞌnaj anma iswatxꞌen tzet choche isnimanil yebꞌ isqꞌaytzeniko istxꞌojal yinh;

hunteqꞌan anma lanhanto iskolchalo xol makta aytoko yinh tzet ye tuꞌ mach tꞌinhano yehi.

19 Chal ebꞌnaj tato chikolcha makta chiꞌoktzujno yinta ebꞌnaj,

yajaꞌ haꞌ hun ebꞌnaj maxhto chikolchalo yul isqꞌabꞌ istxꞌojal,

yuto aytoko ebꞌnaj yaqꞌni chejaꞌ isbꞌa yinh tzet ye tuꞌ mach kꞌuloj.

Yuto haꞌ mak chiwatxꞌen istxꞌojal,

chejabꞌ yeko yinh istxꞌojal tuꞌ.

20 Yuto haꞌ mak xatikꞌa kolcha tet istxꞌojal yul sat yibꞌanhqꞌinal tiꞌ,

ohtabꞌilxa Komam Jesucristo Jahawil yu,

Komam Kokolomal,

yaj ta tzujanxa chiꞌaykꞌayi,

chikankano yul isqꞌabꞌ istxꞌojal tuꞌ hunelxa;

hak tuꞌ xin yelaꞌxa kaw machiswalil chiꞌeliko sata yet yalanhtokanoj.

21 Ebꞌnaj tuꞌ,

ekꞌbꞌaltomi kꞌul mach yohtanhelo huneꞌ bꞌeh kaw tohol,

yuto yet lahwi yohtanhenilo ebꞌnaj isbꞌejnikano chejbꞌanile yet Komam Dios aqꞌbꞌilxa tet.

22 Haꞌ yinh ebꞌnaj chij isbꞌa huneꞌ tzotiꞌ chal anma hakaꞌ tiꞌ:

«Metx txꞌiꞌ chilahwi isxabꞌi metx,

kat isto metx islohnokanh isxaw hunelxa,»^e

yebꞌ hunxa tiꞌ:

«Noꞌ txitam,

lahwi yaxhnhelax noꞌ,

kat istopaxo noꞌ yinh anhe issomnoto isbꞌa xol tzꞌotzꞌew hunelxa,»

xhi.