3 Kaw yilal heyohtanhenilo huneꞌ tiꞌ;

yinh islahobꞌal tzꞌayik kaw ay anma chꞌok tzebꞌo yinh bꞌaytet yet Komam Dios yehi.

Haꞌ hunteqꞌan anma tuꞌ chꞌekꞌ yinh istxꞌojal tzet choche yanma,

4 kat xin yok anma tuꞌ isqꞌambꞌeni:

«¿Tzet tanhkano huneꞌ halbꞌilkanoj tato chihul Komam Cristo hunelxa?

Wal xin xalekamto ebꞌnaj jichmam,

yaj huneꞌnhetikꞌa haꞌ xin ye hakaꞌ yet iswatxꞌi yul sat yibꞌanhqꞌinal tiꞌ,»^a

xhi ebꞌnaj.

5 Yaj mach isje iskꞌul ebꞌnaj tuꞌ istxumulo yinh tzet yu iswatxꞌen Komam Dios satkanh yebꞌ txꞌo txꞌotxꞌ yu Istzotiꞌ yet payat.

Yu Istzotiꞌ Komam tuꞌ isyekanh isbꞌa txꞌo txꞌotxꞌ xol ha haꞌ,

yokkano hoyno haꞌ yinh txꞌotxꞌ.^b

6 Haꞌtikꞌa ha haꞌ tuꞌ xin,

tanhtzenilo yul sat yibꞌanhqꞌinal tiꞌ yet yaniti Komam huneꞌ niman yaxnhabꞌ yet payxa yinh istiempohal yaꞌ Noé.^c

7 Yaj wal satkanh yebꞌ xin txꞌo txꞌotxꞌ ay tinanh,

yu Istzotiꞌ Komam Dios lanhan yechman isnhuslaxto yu qꞌa qꞌaꞌ yet chul tzꞌayik yet chiꞌil-lax tzet chꞌeliko anma,

kat xin istanhtzenilo Komam Dios anma machi yelapno Komam Dios yul sat,

yinh hunelnhe.

8 Yuxin hex xahan ay wuhtiꞌan,

tajka chito nahul huneꞌ tiꞌ heyu,

yuto huneꞌ tzꞌayik lahan hakaꞌ huneꞌ mil habꞌil yul sat Komam Dios Jahawil,

huneꞌ mil habꞌil tuꞌ xin hakaꞌnhe huneꞌ tzꞌayik ye yul sat Komam.^d

9 Matolo chꞌekꞌto yet yijni isbꞌa yinh tzet haltebꞌil yu Komam Dios hakaꞌ isnahni hunmajan anma tuꞌ,

¡machoj!

Wal xin niman iskꞌul Komam yechmali yuto mach chisje iskꞌul Komam ta ay mak chikꞌaykantoj;

yuxin chechma Komam ta ayto mak chisbꞌejkano istxꞌojal kat iskolchahi.^e

10 Yaj wal istzꞌayikal yet chul Komam Jesucristo Jahawil hunelxa xin,

lahan hakaꞌ yet chul hunu naj elqꞌom yet tona nahul ayonh,

hak tuꞌ chu yul lemna Komam.

Kaw ay yip isnhirla yet chitanhilo satkanh,

yebꞌ tzet iqꞌbꞌil yu sat yibꞌanhqꞌinal chitanhilo yu qꞌa qꞌaꞌ,

yebꞌ xin chitanhpaxilo txꞌo txꞌotxꞌ yebꞌ sunil tzet ay sat txꞌotxꞌ.

11 Yuxin tato hak tuꞌ chu istanhilo sunil hunteqꞌan tuꞌ,

ayxikꞌa jekꞌ yinh iskꞌulal tzet choche Komam,

kat kam janiko konabꞌal yinh Komam.

12 Jechmawe yul huneꞌ tzꞌayik bꞌay chul Komam tuꞌ.

Jaqꞌaꞌweko jip komunla yinh yet Komam,

hak tuꞌ xin chu yul Komam yinh anhe.

Haꞌ yinh huneꞌ tzꞌayik tuꞌ chitanhilo satkanh yu qꞌa qꞌaꞌ,

yebꞌ xin sunil tzet ay satkanh tuꞌ chiꞌulikanh,

kat istzꞌakantoj.

13 Yajaꞌ hanhonh tiꞌ,

lanhan jechman huneꞌ akꞌ satkanh yebꞌ huneꞌxa txꞌo txꞌotxꞌ kaw akꞌ haltebꞌilkano yu Komam Dios.

Haꞌ bꞌey tuꞌ xin,

sunilxanhe kaw tohol yebꞌ kaw kꞌul.^f

14 Yuxin hex xahan ay wuhan,

yulbꞌal ayexiko heyechman hunteqꞌan tzet ye tuꞌ chihuli,

aweko yinh hekꞌul hewatxꞌen iskꞌulal,

haxinwal hayet chul Komam ayexiko yinh aqꞌankꞌulal machi nino hemul yebꞌ istxꞌojal chiꞌilchalo teyinh.

15 Nachahojabꞌilo heyu tato ayto isnimankꞌulal Komam Dios,

yuxin maxhto chul Komam,

yunhe ayto mak chikolchahi.

Chisje konaniti yinh juxhta Pablo,

yaꞌ kaw xahan ay ju,

yuto haktikꞌapax tuꞌ yu istzꞌibꞌnhento yaꞌ teyet yu ishelanil yaꞌ aqꞌlax yu Komam Dios.

16 Yul hunun iscarta yaꞌ haktikꞌa tuꞌ yu istzꞌibꞌnhento yaꞌ teyet.

Kaw yeli,

ay tzet yaꞌta kotxumnilo yul iscarta yaꞌ,

yuxin haꞌ anma mach isnabꞌal yebꞌ maxhto kaw yip yanma yinh Komam,

haꞌ ton xin chihekꞌni tzet chal teꞌ.

Chishekꞌnipaxo ebꞌnaj hunteqꞌan tzet chal Yum Komam Dios.

Yu huneꞌ istxꞌojal chiswatxꞌe ebꞌnaj tuꞌ,

yuxin chikꞌaykanto ebꞌnaj.

17 Yuxin hex xahan ay wuhan,

yalanhtokanoj cheyabꞌenkano hunteqꞌan tiꞌ,

kaw cheyil hebꞌa tajka chexhatxlaxto yu isleqꞌtiꞌal ebꞌnaj istxꞌojalnhetikꞌa chiswatxꞌe,

kat heyinilo hebꞌa yinh istꞌinhanil bꞌay ayexikoj.

18 Wal xin kam ohtanhewelo Komam Jesucristo,

Kokolomal.

Ipojabꞌ xin hechꞌibꞌ yinh iskꞌulchꞌanil iskꞌul Komam hunun tzꞌayik.

Yuxin kaw nimanojabꞌ yelapno ye Komam Kokolomal yul hesat tinanh,

yebꞌ yinh sunilbꞌal tiempo.

¡Hakojabꞌ tuꞌ!