ISBꞌABꞌEL CARTA YAꞌ SAN JUAN
Komam Jesucristo haꞌ chiꞌaqꞌni koqꞌinal
1
Chintzꞌibꞌnhetojan huneꞌ carta tiꞌ teyet yunhe heyohtanhen tzet yelapno ye Komam Tzotiꞌa chiꞌaqꞌni Koqꞌinal.
Komam ayxatikꞌa yet maxhto hunu tzet ye tuꞌ chiwatxꞌi yul sat yibꞌanhqꞌinal tiꞌ.
Wal xin hanhkawonhanh jabꞌehanh tzet kaw yal Komam tuꞌ,
jilnipaxikojanh yinh Komam.
Nahatil jil kobꞌahanh yebꞌ Komam,
kotzabꞌnipaxojanh Komam.
2 Komam chiꞌaqꞌni qꞌinale tiꞌ isye isbꞌa jetanh,
jilnihanh yinh Komam,
yuxin chijako kobꞌahanh jalnilojanh.
Tinanh xin chijalanh teyet ta haꞌ Komam chiꞌaqꞌni koqꞌinal mach istanhbꞌal.
Iskꞌatanh Komam Dios ay Komam,
yaj xin hulikꞌo yul sat yibꞌanhqꞌinal tiꞌ isyeni isbꞌa jetanh.
3 Yuxin Komam jil tuꞌanh yebꞌ jabꞌehanh tzet yala,
haꞌ chijaltojanh teyet yunhe heyok jetbꞌihojanh,
hak tuꞌ xin hunxanhe chijukano yinh Komam Dios Mame,
yebꞌ yinh iskꞌahol Jesucristo.
4 Yuxin chikotzꞌibꞌnhetojanh hunteqꞌan tzotiꞌ tiꞌ teyet yunhe kaw tzꞌajan chiyukaniko tzalahilal yinh janma.
Komam Dios issajilqꞌinal yehi
5 Wal tinanh xin,
chijaltojanh teyet yinh kuybꞌanile yalkano Komam Jesucristo jetanh.
Yal Komam tato Komam Dios kaw issajilqꞌinal yehi,
machi nichꞌano qꞌejholo yinh.
6 Tato chijala ta hunxa je yebꞌ Komam Dios,
yaj ta chito kowatxꞌe istxꞌojal,
chaliloj tato ayonhtoko xol qꞌejholo,
kaw leqꞌtiꞌonh,
mach chikobꞌeybꞌalnhe isyelal.
7 Komam Dios issajilqꞌinal yehi,
yuxinto tato yinh issajilqꞌinal Komam Dios tuꞌ chonhbꞌelwi,
kaw jetbꞌixa kobꞌa hununonh.
Haꞌ xin ischikꞌil Komam Jesús,
Iskꞌahol Komam Dios,
haꞌ chonhsajnhen yinh sunil komul.
8 Tato chijala ta machi komul,
hanhkawonh chijaqꞌ subꞌchaho kobꞌa kochukil,
mach xin ayonhiko yinh isyelal.
9 Tato chijalati komul tet Komam Dios,
chiyaqꞌkano tanho Komam komul jibꞌanh.
Sunil komachiswalilal chiyikanilo Komam jinh,
yuto istoholal chiswatxꞌe Komam,
yebꞌ xin sunil tzet chal Komam masan chij isbꞌa.
10 Tato chijala ta machi komul chijakoj,
lanhan jalni ta leqꞌtiꞌ Komam Dios,
kaw machi Istzotiꞌ Komam yinh janma hakaꞌ tuꞌ.