ISKABꞌ CARTA YAꞌ SAN JUAN
Kuybꞌanile yinh isyelal koxahannhen kobꞌa
1
Hanin icham winaja intiꞌan,
chintzꞌibꞌnhetojan huneꞌ carta tiꞌ tawet wanabꞌ,
hach saybꞌilxa yu Komam Dios,
yebꞌ tet ej hawuninal.
Yinh kaw yeli kaw xahan ay hex wuhan,
yaj maxhnhetajinan to haꞌ hunpaxo ebꞌnaj juxhtaj,
yebꞌ ebꞌix janabꞌ kaw xaꞌohtanhen kuybꞌanile kaw yeli.
2 Kaw xahan ay hex wuhan,
yu isyelal ayko yinh janma.
Aykꞌo xin isyelal tiꞌ kokꞌatanh sunilbꞌal tiempo.
3 Haꞌojabꞌ Komam Dios yebꞌ Komam Jesucristo,
Iskꞌahol Komam Dios chiꞌanayo iskꞌulchꞌanil iskꞌul teyibꞌanh,
kat istzꞌay iskꞌul teyinh,
kat yaqꞌnipaxo aqꞌankꞌulal teyet yinh isyelal,
kat kexisxahannhen Komam.
4 Kaw tzalakanh inkꞌulan yet wilnihan haywanh hawunin kaw yijem yinh kuybꞌanile kaw yel chala,
hakaꞌ yute yaqꞌnikano Komam Dios jet.
5 Wal tinanh xin,
kaw chinqꞌanan teyet tato kaw yilal xahan chijil kobꞌa hununonh.
Huneꞌ chejbꞌanile chiwaltojan teyet tiꞌ,
kaw mach akꞌtoho heyabꞌeni,
kaw hataxtikꞌa yet jok yul isqꞌabꞌ Komam Dios,
hatax tuꞌ yichi jabꞌeni.
6 Tato chikoxahannhe kobꞌa chaliloj ta lanhan koyijen chejbꞌanile chal Komam Dios.
Yuto haꞌ ischejbꞌanil Komam xajabꞌe yettax jok yul isqꞌabꞌ,
haꞌ ton koxahannhen kobꞌa hununonh.
Ebꞌnaj chiꞌaqꞌni subꞌchaho anma
7 Wal tinanh xin,
kaw txꞌiꞌalxa ebꞌnaj leqꞌtiꞌwom chiꞌekꞌ yul sat yibꞌanhqꞌinal tiꞌ.
Chilan xin yalni ebꞌnaj ta mach hulikꞌo Komam Jesucristo yinh anmahil yinh kaw isyelal.
Haꞌ hunteqꞌan ebꞌnaj tuꞌ chiꞌaqꞌni subꞌchaho anma.
Kaw xin ayko ishowal ebꞌnaj yinh Komam.
8 Kaw nannhe heyu xin,
tajka kaw nabꞌnhe cheyu yinh hemunil yinh yet Komam.
Wal xin kaw tzꞌajanojabꞌ chu hechahni ispaj selel hemunil tet Komam Dios.
9 Maknhetikꞌa chihelni kuybꞌanile aykano jet yu Komam Jesucristo kat isbꞌejnikanoj,
chalilo chal tuꞌ ta machi Komam Dios yul yanma.
Waltaka tzujan yinta kuybꞌanile aqꞌbꞌilkano yu Komam xin,
wal tuꞌ kaw ayayto Komam Dios yebꞌ Iskꞌahol Komam yul yanma.
10 Tato ay hunu mak chiꞌapni tekꞌatanh,
nan xin kuybꞌanile iqꞌbꞌil yu,
mach chechah yul heyatut,
yebꞌ xin mach cheqꞌambꞌe hanikꞌ ye iskꞌul.
11 Tato chexok heqꞌambꞌeꞌ hanikꞌ ye iskꞌul,
chalilo chal tuꞌ ta haꞌ hunex yinh huneꞌ istxꞌojal chiswatxꞌe tuꞌ.
Islahobꞌal carta
12 Kaw hantanhe tzet chiwochehan chiwaltojan teyet,
yaj mach chiwochehan chintzꞌibꞌnhetojan yinh hum tiꞌ,
yuto toxanhe chiwechmahan intohan kexintuklenojan kat xin kotzoteli,
hak tuꞌ kaw chitzꞌajna tzalahilal yul janma.
13 Haꞌ ej yuninal hanoh ay bꞌey tiꞌ,
sikꞌbꞌililo yu Komam Dios,
chiqꞌambꞌeni hanikꞌ haweh bꞌey tuꞌ.
¡Hakojabꞌ tuꞌ!