2 Wuxhtaj,

hach xahan ay wuhan,

kaw chinqꞌanan tet Komam Dios tato hakaꞌ iskꞌulal hawehiko yinh tzet yet Komam Dios,

hak tuꞌ xin iskꞌulal chiꞌekꞌpaxo hawu.

Chinqꞌannipaxojan ta kawachnhetikꞌapaxoj.

3 Kaw kintzalahan yet wabꞌenan yalni ebꞌnaj juxhta hulikꞌoj tato kaw yijem hach yinh iskꞌulal Komam,

yebꞌpaxo xin tzujan hach yinh isyelal.

4 Kaw ekꞌna chitzalakano wanmahan yet chiwabꞌenan tato kaw yijem wuninalan.

5 Wuxhtaj,

kaw kꞌulnhe hayijen munil yinh hakolwa yinh ebꞌnaj juxhtaj,

hakpax tuꞌ xin yinh ebꞌnaj juxhta nan konhobꞌal chiꞌekꞌ takꞌatanh.

6 Yet kutxanonhikojanh bꞌey tiꞌ yinh culto,

yalni ebꞌnaj hulikꞌo tuꞌ tzet isxahanil ay ebꞌnaj hawu.

Wal tinanh xin,

kaw chiwalan tawet ta chalahiko hakolwa yinh ebꞌnaj yet chito ebꞌnaj yinh isbꞌel,

hakaꞌ choche iskꞌul Komam Dios haꞌ chawatxꞌe.

7 Ebꞌnaj juxhta tuꞌ,

haꞌ Istzotiꞌ Komam Jesús chiꞌekꞌ ebꞌnaj yalaꞌkꞌoj,

machi nino kolwal xin chisqꞌan ebꞌnaj tet anma maxhto ayoko yul isqꞌabꞌ Komam.

8 Wal xin to kaw yilal kokolwa yinh ebꞌnaj,

hak tuꞌ xin hakojtam hanhhunonh lanhan komunla yinta ebꞌnaj yet chiꞌekꞌ ebꞌnaj kuywal tuꞌ.

9 Wuxhtaj,

xatikꞌa watojan huneꞌ wuman teyet makex ayexxako yul isqꞌabꞌ Komam Dios bꞌey tuꞌ.

Yaj wal naj Diótrefes xin,

kaw chako isbꞌa naj iswiꞌehalo texol.

Waxanhka hanta tzet chiwaltojan,

yaj kaw machi yelapno ye yul sat naj.

10 Yuxin hayet chinapnihan bꞌey tuꞌ,

chintzotelan tet naj kat walnihan istxꞌojal naj tet,

yuto chiꞌekꞌ naj yalaꞌ koqꞌumalanh chalni naj leqꞌtiꞌal jinhanh teyet.

Maxhnhetaj tuꞌ,

to mach chischahpaxo naj ebꞌnaj jetbꞌihanh chiꞌapni bꞌey tuꞌ,

yaj tato ay ebꞌnaj juxhta chichahni ebꞌnaj xin,

kaw chikachwa naj yinh,

kat xin yinilo naj ebꞌnaj texol.

11 Hach wuxhtaj kaw xahan ayach wuhan,

mach chawute habꞌa hakaꞌ anma kaw machiswalil chiswatxꞌe.

Wal xin hakaꞌ ebꞌnaj juxhta kaw kꞌul isbꞌeybꞌal,

hak tuꞌ chawute habꞌa.

Yuto haꞌ mak hanhe iskꞌulal chiswatxꞌe,

haꞌ chalniloj tato yetxa Komam Dios yehi.

Wal mak machiswalil chiswatxꞌe xin,

haꞌ chalniloj ta maxhto ohtabꞌilo Komam Dios yu.

12 Wal juxhta Demetrio,

kaw sunil ebꞌnaj juxhta chalni tato kaw kꞌul isbꞌeybꞌal naj,

chiyalnipaxoj tato kaw yijem chiyute isbꞌa naj yinh kuybꞌanile kaw yel chala.

Hakonhpax tuꞌan chijalanh tato kaw kꞌul isbꞌeybꞌal naj yul kosatanh.

Kaw heyohtaj tato haꞌ isyelal chijalanh.

13 Kaw hantanheto tzet kaw chiwoche walaꞌtojan tawet,

yaj kaw mach chiwochehan chintzꞌibꞌnhetojan yul hum tiꞌ.

14 Yuto kaw ayxako yinh inkꞌulan intohan kaxhintuklenojan,

hato yet tuꞌ kat kam walnihan yaqꞌbꞌilxa tuꞌ tawet.

15 Kaw chawil habꞌa bꞌey tuꞌ.

Chisqꞌambꞌen ebꞌnaj juxhtaj ay bꞌey tiꞌ hanikꞌ haweh bꞌey tuꞌ yinh hakawil,

kat xin hawalnipaxo tet ebꞌnaj juxhta bꞌey tuꞌ ta chil isbꞌa ebꞌnaj.

Hal tet ebꞌnaj yinh hununtajil inqꞌanaꞌan.