3 Hex wuxhtaj,

hex wanabꞌ,

kaw xahan ay hex wuhan.

Kaw txꞌiꞌalxa el chiwochehan chiwatojan huneꞌ incartatiꞌan teyet yinh tzet ye kokolbꞌanil xakochah tet Komam Dios.

Yaj wal tinanh xin,

chitit yinh wanmahan ta yilal wanitojan huneꞌ carta tiꞌ teyet,

yu kexyiptzen yinh heyinahti heyanma heyaꞌilnhen huneꞌ kuybꞌanil bꞌay ayko janma hanhonh yetonhxa Komam.

4 Kaw yilal wanitojan huneꞌ carta tiꞌ yuto ay hunteqꞌan mak leqꞌtiꞌalnhe yu yok texol.

Hunteqꞌan ebꞌnaj tuꞌ istxꞌojalnhe chiswatxꞌe ebꞌnaj;

chal ebꞌnaj ta yu ayonhxako yinh iskꞌulchꞌanil Komam xaꞌisje kowatxꞌen sunil istxꞌojal.

Chiyintanhekanilto ebꞌnaj Komam Jesucristo Jahawil,

Komam hanhechꞌan ijbꞌalomal jinh.

Haꞌ ton yinh hunteqꞌan ebꞌnaj tuꞌ tzꞌibꞌnhebꞌilkano yul Yum Komam Dios yet payat ta yilal istokano ebꞌnaj yinh isyaꞌtajil.

5 Waxanhka heyohtaxa huneꞌ chiwaltiꞌan yajaꞌ chinnapaxtijan teyet yinh ebꞌnaj Israel,

iskonhobꞌ Komam Dios.

Lahwi iskolnilo Komam ebꞌnaj yul konhobꞌ Egipto,

istanhtzenilo Komam makta mach yayto yul yanma yinh tzet yal Komam.

6 Yebꞌpaxo xin,

naweti tzet eliko hunteqꞌan ebꞌnaj ángel mach kꞌulo yute isbꞌa yinh ismunil,

isbꞌejnikano ebꞌnaj yehobꞌal aqꞌbꞌil tet yu Komam Dios.

Wal tinanh xin,

kꞌalan ebꞌnaj sikꞌlebꞌil yu chꞌen cadena,

majan ebꞌnaj xol qꞌejholo yu Komam Dios yechman huneꞌ tzꞌayik kaw niman yelapnoj,

bꞌay chul isyaꞌtajil yibꞌanh ebꞌnaj yu Komam yinh hunelnhe.

7 Haktikꞌapax tuꞌ xin anma ay bꞌey Sodoma yebꞌ Gomorra yebꞌ hunteqꞌanxa konhobꞌ ayko yinhla ishoyanil,

ok ebꞌnaj winaj ixloj,

yokpaxo ebꞌix ix winajloj;

iswatxꞌen tzet mach yeto ay isnimanil.

Hunteqꞌan anma tuꞌ ischah isyaꞌtajil xol qꞌa qꞌaꞌ yinh hunelnhe.

Sunil tuꞌ,

kankano yechelo tet sunil anma yunhe istxumnilo tzet eliko anma watxꞌen istxꞌojal.

8 Waxanhka hak tuꞌ yute Komam Dios,

yaqꞌni isyaꞌtajil tet hunteqꞌan anma yet payat tuꞌ,

yajaꞌ hunteqꞌan ebꞌnaj ayko texol tinanh,

chismanhkꞌo ebꞌnaj kuybꞌanile aykano yu Komam Dios.

Yu isyijen ebꞌnaj tzet chal iswayik,

chetan ebꞌnaj isnimanil.

Chalnipaxo ebꞌnaj tzotiꞌ txꞌoj yinh ebꞌnaj ángel.

9 Yaj konabꞌati yinh naj arcángel Miguel,

yet yaqꞌlen howal naj yebꞌ naj matzwalil yinh isnimanil yaꞌ Moisés,

waxanhka kaw aykanh yip naj Miguel tuꞌ,

yaj machi yal naj tzotiꞌ txꞌoj chitzꞌaktiꞌnhen naj matzwalil tuꞌ,

kachannhe yal naj hakaꞌ tiꞌ:

«Haꞌojabꞌ Komam Dios chaxhmaynoj,»

xhi naj tet naj.

10 Wal ebꞌnaj chiwaltiꞌan,

tonhetikꞌa chibꞌuchwa ebꞌnaj yinh hunu tzet ye tuꞌ mach yohtajoj.

Lahan isnabꞌal ebꞌnaj hakaꞌ no noqꞌ,

haꞌ tzet yohta ebꞌnaj mach chitxumcha yu ebꞌnaj,

tonhetikꞌa chiswatxꞌe ebꞌnaj tzet choche iskꞌul.

Haꞌ hunteqꞌan tuꞌ chiꞌetanto yanma ebꞌnaj sata Komam Dios,

kat ischahni ebꞌnaj isyaꞌtajil.

11 Kaw kꞌanchꞌankano hunteqꞌan ebꞌnaj tuꞌ,

yuto lahan tzet chiswatxꞌe ebꞌnaj hakaꞌ tzet iswatxꞌe naj Caín.

Chiswatxꞌepaxo ebꞌnaj hakaꞌ tzet yute naj Balaam,

yu chꞌen melyu iswatxꞌe naj istxꞌojal.

Chiswatxꞌepaxo ebꞌnaj hakaꞌ iswatxꞌe naj Coré,

kam naj yu mach isyije naj tzet yal Komam Dios;

hak tuꞌ xin chu istanhtzelaxilo ebꞌnaj tiꞌ yu ismanhkꞌomal.

12 Txꞌixobꞌal chuko ebꞌnaj texol yet chekutxbꞌan hebꞌa waꞌo yinh yet Komam.

Maxhtikꞌa nino tzet chal iskꞌul ebꞌnaj yet chꞌok ebꞌnaj waꞌo texol yebꞌ machi nino chixiw ebꞌnaj.

Lahan ebꞌnaj hakaꞌ hunu naj tanhem meꞌ,

haꞌnhe ayko yinh iskꞌul istanhen isbꞌa.

Lahanpaxo ebꞌnaj hakaꞌ hunu moyan machi nhabꞌ iqꞌbꞌil yu,

tonhe chiꞌekꞌ ijon yu jaqꞌeqꞌ.

Lahanpaxo ebꞌnaj hakaꞌ hunu te teꞌ machi satni;

kayel tajnajiloj yebꞌ hokꞌbꞌilkanh yebꞌ sunil isxeꞌ.

13 Lahan ebꞌnaj hakaꞌ yet chꞌah poqꞌla haꞌ mar kat yanilo haꞌ ishujuyal,

hak tuꞌ chu jilni qꞌalem ayko xol haꞌ,

hak tuꞌ xin chu isyenilo ebꞌnaj tzettaj txꞌixobꞌal chiswatxꞌe.

Lahanpaxo ebꞌnaj yebꞌ txꞌumel xakꞌayto yinh isbꞌeh,

haꞌ istxꞌojal ebꞌnaj tuꞌ chikawxento isto yinh hunelnhe xol qꞌejholo;

huneꞌ qꞌejholo tuꞌ kaw xapalkꞌonkano isqꞌejholohal.

14 Yaꞌ Enoc,

yaꞌ ishuj mame yinta naj Adán,

yet payat,

tzotel yaꞌ yu yip Komam Dios yinh hunteqꞌan ebꞌnaj tiꞌ:

«¡Abꞌewej!

Chihul Komam Dios Jahawil yebꞌ ismilalxa yángel yintaj.

15 Chul Komam yilaꞌ yinh tzet iswatxꞌe sunil anma,

kat yanikaniko isyaꞌtajil yibꞌanh mak kaw txꞌoj chiswatxꞌe yinh Komam;

makta machi Komam yul sat yebꞌ hanta istxꞌojal tzotiꞌ chaliko yinh Komam,»

xhi yaꞌ Enoc tuꞌ.

16 Haꞌ ebꞌnaj ayko texol tuꞌ,

aqꞌomkꞌule ebꞌnaj,

bꞌuchwawompaxo ebꞌnaj.

Hanhechꞌan yinh tzet choche isnimanil ebꞌnaj chako isnabꞌal.

Nime winaj chute isbꞌa istzoteli.

Kaw kꞌulchꞌan chutepaxo istzotel ebꞌnaj tet anma,

yajaꞌ kabꞌebꞌ isnabꞌal ebꞌnaj.

Hak tuꞌ chute ebꞌnaj yunhe kꞌul chꞌekꞌ yilaꞌ ebꞌnaj.

17 Hex xahan ay wuhtiꞌan,

tijabꞌ yinh hekꞌul yinh tzet halbꞌil yu ebꞌyaꞌ ischejabꞌ Komam Jesucristo yet payxa,

18 yet yalni ebꞌyaꞌ hakaꞌ tiꞌ:

«Hayet toxa chul islahobꞌal tzꞌayik,

ay anma chitzebꞌi yinh tzet chal Komam Dios,

kat iswatxꞌen istxꞌojal choche iskꞌul,»

xhikano ebꞌyaꞌ.

19 Haꞌ hunteqꞌan ebꞌnaj tuꞌ chiꞌaniko pohlebꞌahil texol.

Hanhechꞌan yinh tzet choche isnimanil ebꞌnaj ayko isnabꞌal;

machipaxo Komam Espíritu Santo yinh yanma ebꞌnaj.

20 Yajaꞌ hex kaw xahan ay wuhtiꞌan,

linhbꞌawe hebꞌa yinh heyanayto yul heyanma yinh Komam,

huneꞌ chitit tet Komam Dios.

Txahlanhwe yu yip Komam Espíritu Santo.

21 Hunelnhehojabꞌnhetikꞌa heyeko yinh iskꞌulchꞌanil iskꞌul Komam Dios.

Hak tuꞌ chu heyechman istzꞌayikal bꞌay chaqꞌ Komam Jesucristo Jahawil huneꞌ koqꞌinal mach istanhbꞌal yu iskꞌulchꞌanil iskꞌul Komam.

22 Tzꞌayojabꞌ hekꞌul yinh anma chikabꞌkon yanma yinh Komam,

aqꞌwe meltzoho isnabꞌal yinh Komam.

23 Yebꞌpaxo anma hakaꞌtanhe ayxato xol qꞌa qꞌaꞌ,

tzakweltij,

hak tuꞌ chu hekolni xol qꞌaꞌ.

Kaw yilal istzꞌay hekꞌul yinh anma,

yajaꞌ nannhehojabꞌ heyu yinh tzet chiswatxꞌe yuto ay ismay heyetaxto yu.

Yahwe hunteqꞌan istxꞌojal chiswatxꞌe tuꞌ,

hakaꞌ chiyu koyahni hunu xilqꞌape bꞌakbꞌiliko yal txꞌak yinh.

24 Haꞌ Komam Dios chu konhiskꞌubꞌani yunhe machi bꞌay chonhlektahi.

Aypaxo yip Komam konhyaniko yinh iskꞌulchꞌanil bꞌay aya yinh tzalahilal,

yuto matxa komul yul sat,

yu sajxa je yu Komam.

25 ¡Hal-laxojabꞌ kꞌul-la tzotiꞌ yinh Komam Dios,

huneꞌnhechꞌan Komam yebꞌ kaw helan,

Kokolomal ye Komam!

Jalaꞌwej ta kaw ay yelapno ye Komam,

kaw ay yip Komam,

yebꞌ xin sunil tzet aya,

ayko yul isqꞌabꞌ Komam yet payat,

yebꞌ tinanh,

yebꞌ yinh sunilbꞌal tiempo.

¡Hakojabꞌ tuꞌ!