YINH TZET AQꞌLAX YOHTANHELO YAꞌ SAN JUAN YU KOMAM JESUCRISTO
Hunteqꞌan tzet yaqꞌ Komam Jesucristo ohtanhelaxoj
1
Haꞌ huneꞌ tiꞌ yaqꞌ Komam Dios tet Komam Jesucristo yunhe isyeni tet ebꞌyaꞌ ischejabꞌ yinh hunteqꞌan tzet yilal yuni yebꞌ toxa chiyuhi.
Ischejniti Komam Jesucristo yángel yaqꞌni wohtanhelojan,
hanin Juan intiꞌan,
ischejabꞌ Komam Jesucristo.
2 Hanintiꞌan chiwalan isyelal yinh tzet wilan,
testigo inpaxojan yinh Istzotiꞌ Komam Dios yij isbꞌa yu Komam Jesucristo.
3 Saqꞌal yet mak chiꞌilni yebꞌ mak chiꞌabꞌen hunteqꞌan tzet halbꞌilkano yu Komam yul huneꞌ Hum tiꞌ,
kat isyijen hunteqꞌan tzet tzꞌibꞌnhebꞌilkano tiꞌ,
yuto toxa chij isbꞌa.
Istzꞌibꞌnheto yaꞌ Juan iscarta tet hujebꞌ iglesia
4 Hanin Juan intiꞌan,
chintzꞌibꞌnhetojan huneꞌ carta tiꞌ teyet hex huj majan ayexxako yul isqꞌabꞌ Komam Jesucristo,
yul ismajul Asia.
Chahwe aqꞌankꞌulal yebꞌ iskꞌulchꞌanil iskꞌul Komam Dios;
Komam ay tinanh,
Komam ayxatikꞌa yet yalanhtokanoj,
Komam chihuli.
Chahwepaxo aqꞌankꞌulal yebꞌ iskꞌulchꞌanil tet hujebꞌ espíritua ayko sata bꞌay tzꞌonhan Komam.
5 Chahwepaxo aqꞌankꞌulal yebꞌ iskꞌulchꞌanil iskꞌul Komam Jesucristo,
Komam testigo kaw yijem.
Komam Jesucristo tiꞌ bꞌabꞌel itzitzbꞌikanh xol kamom,
aypaxo yip Komam yibꞌanh ebꞌnaj rey ay yul sat yibꞌanhqꞌinal tiꞌ.
Kaw xahan ayonh yu Komam,
kaw yikanilo Komam komul yu ischikꞌil malto yinh teꞌ kulus.
6 Konhyaniko Komam yahawilal yebꞌ sacerdotehalb yu jokniko yu Komam Dios,
ismam Komam Jesucristo.
Hal-laxojabꞌ tzotiꞌ kꞌul yinh Komam,
yebꞌ xin ta kaw ay yip Komam yinh sunilbꞌal tiempo.
¡Hakojabꞌ tuꞌ!
7 Abꞌewe huneꞌ tiꞌ;
chul Komam Jesucristo xol moyan.
Sunil anma chiꞌilni yul Komam,
haꞌ hunpaxo ebꞌnaj potxꞌnikamo Komam chiꞌilni yuli.
Hayet chilni anma ay yul hunun konhobꞌ yul sat yibꞌanhqꞌinal tiꞌ
yul Komam chiꞌok yinh bꞌiskꞌulal,
kat yok oqꞌoj.
Hoꞌ,
hak tuꞌ chuhi.c
8 Yalni Komam:
«Haninan bꞌabꞌel hinan yebꞌ islahobꞌal,
hakaꞌ tzꞌibꞌ A yebꞌ Z,»d
xhi Komam;
Komam chisje iswatxꞌen sunil tzet ye tuꞌ,
Komam ay tinanh,
yebꞌ ayxatikꞌa yet yalanhtokanoj,
yebꞌ chihuli.e
Yil yaꞌ Juan iskꞌulchꞌanil yip Komam Jesucristo
9 Hanin Juan intiꞌan,
heyuxhta wehan,
hanhun hinan chiwabꞌehan isyaꞌtajil yebꞌ hex,
yebꞌ xin hanhun hinan chinchahan isnimanbꞌal inkꞌulan teyintaj.
Huneꞌnhe xin chonheh yebꞌ Komam Dios yu ayonhxako yul isqꞌabꞌ Komam Jesucristo.
Yet hunel,
yet ayinan yul huneꞌ konhobꞌ chiyij Patmos,
huneꞌ konhobꞌ ay xol haꞌ mar,
kinalaxikojan preso yu Istzotiꞌ Komam Dios yebꞌ yu chiwalikꞌojan yinh tzet iswatxꞌe Komam Jesucristo.
10 Yet hunel tuꞌ yinh tzꞌayik yet Komam,f
kinokan yalanh ischejbꞌanil Komam Espíritu Santo,
wabꞌenan huneꞌ yul nuqꞌe awi wintajan yinh kaw ip hakaꞌ yoqꞌ chꞌen trompeta.
11 Yalni wetan hakaꞌ tiꞌ:
«Tzꞌibꞌnheyo hunteqꞌan chawil tiꞌ yul hum,
kat hawanito tet hujebꞌ majan anma ayxako yul inqꞌabꞌan ay yul ismajul Asia:
tet Efeso,
Esmirna,
Pérgamo,
Tiatira,
Sardis,
Filadelfia yebꞌ tet Laodicea,»g
xhi wetan.
12 Inmeltzon hinbꞌahan,
intꞌanhxitojan yunhe wilnihan mak chitzotel wetan.
Wilnihan hujebꞌ candelero nabꞌa oro bꞌay chiꞌalaxahto cantil.
13 Xolbꞌal hujebꞌ candelero tuꞌ wilan huneꞌ makh hakaꞌ anma jilni.
Kaw nimajal ishojayo istel xil isqꞌap ayikoj,
masanta chiꞌayilo yinh yoj.
Aypaxiko huneꞌ iscincho nabꞌa oro,
nimajal ispaqꞌi sat chiꞌahapno istxam iskꞌul.
14 Wal xil iswiꞌ kaw saj jilni hakaꞌ noꞌ saj lana yebꞌ hakaꞌ jilni chꞌen chew.
Haxa isbꞌaqꞌ sat lahan jilni hakaꞌ xaj qꞌa qꞌaꞌ.
15 Wal yoj xin chitzejtzoni,
hakaꞌ jilni chꞌen bronce nhijbꞌilxalo istzꞌilal,
nhusbꞌilxa yul horno.
Wal yul isnuqꞌ xin kaw ay yip hakaꞌ jabꞌen isbꞌili haꞌ nimeta haꞌ.
16 Yinh iswatxꞌqꞌabꞌ ayko hujebꞌ txꞌumel.
Chixinelti huneꞌ chꞌen espadai kaw xixiꞌ iswiꞌ yul istiꞌ.
Huneꞌ chꞌen espada tuꞌ aypaxati yeh yichinh chꞌen.
Wal issat lahan jilni hakaꞌ yet chitzejla tzꞌayik yet kaw hajan.
17 Yet wilnihan hunteqꞌan tuꞌ,
waykꞌayan yich yoj,
hakaꞌ kamom wukanilojan.
Yanayo iswatxꞌqꞌabꞌ wibꞌanhan,
yalni wetan:
«Mach chaxhxiwi,
hanintiꞌan yichebꞌanil yebꞌ islahobꞌal.
18 Hanintiꞌan itzitz hinan,
kinkaman yajaꞌ tinanh xin itzitz hinan yinh sunilbꞌal tiempo.
Hanintiꞌan yahaw hinan yinh kamikal yebꞌpaxo yinh bꞌay chiꞌapni yanma anma chikami.
19 Tzꞌibꞌnhekano hunteqꞌan maxawil tiꞌ,
yebꞌ hunteqꞌan chawil tinanh,
yebꞌ hunteqꞌan chawilaꞌ yet tzujaniloxa.
20 Haꞌ hujebꞌ txꞌumel hawil yinh inwatxꞌqꞌabꞌan yebꞌ hujebꞌ candelero nabꞌa oro,
hak tiꞌ chal yelapnoj:
Haꞌ hujebꞌ txꞌumel tuꞌ,
yechel hujwanh inchejabꞌanj chiꞌilni hujebꞌ majan anma ayxako yul inqꞌabꞌan,
walpaxo hujebꞌ candelero nabꞌa oro yechel hujebꞌ majan anma ayxako yul inqꞌabꞌ tuꞌan,»
xhi Komam.