Chejbꞌanile tet makta ayxako yul isqꞌabꞌ Komam Jesucristo ay bꞌey konhobꞌ Efeso
2
Yalnipaxo Komam Jesucristo:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan yul konhobꞌ Efeso:
“Komam ayko hujebꞌ txꞌumel yinh iswatxꞌqꞌabꞌ,
Komam chiꞌekꞌ xol hujebꞌ candelero nabꞌa oro bꞌay chiꞌahto cantil,
haꞌ chalni hakaꞌ tiꞌ:
2 »”Kaw wohtajan sunil tzet chewatxꞌe,
yebꞌ hanta chexekꞌyaꞌ hemunla yinh ismunil Komam Dios,
niman cheyutepaxo hekꞌul heyaqꞌni techaho isyaꞌtajil,
mach xin chextzala yinh anma chiwatxꞌen istxꞌojal.
Wohtapaxojan tato xaheyilwe ebꞌnaj chisbꞌaliko isbꞌa inchejabꞌojan,
yilchalo heyu ta tonhe chal ebꞌnaj,
hak tuꞌ yu heyohtanheniloj tato leqꞌtiꞌ ebꞌnaj.
3 Wohtajan ta kaw chexekꞌyaꞌ yu ayexiko yul inqꞌabꞌan,
yaj xin kaw ay henimankꞌulal,
mach chitibꞌayo heyu.
4 »”Yajaꞌ ay hanikꞌ mach chischah inwiꞌan,
yuto matxa ayoko heyanma winhan hakaꞌ yet heyichikoj.
5 Yuxin nawetij bꞌaytet yinh kexaykꞌayi,
meltzoweko henabꞌal yinh Komam Dios,
kat hewatxꞌen bꞌaytettikꞌa hewatxꞌe yet yichebꞌanil.
Ta mach xin chintohan kexwilaꞌan yinh anhe,
kat winilojan hecandelero yul yehobꞌal.
6 Yajaꞌ xin ay huneꞌxa hekꞌulal yul insatan,
yuto cheyah tzettaj chiswatxꞌe ebꞌnaj nicolaíta,a
hakinpax tuꞌan chinyahan tzet chiswatxꞌe ebꞌnaj.
7 Makex cheyabꞌe huneꞌ tiꞌ,
kaw aqꞌwe heyanma hetxumnilo tzet chal Komam Espíritu tet makta ayxako yul inqꞌabꞌan.
Haꞌ mak chiqꞌoji,
chiwaqꞌan sat teꞌ lobꞌehal chiꞌaqꞌni qꞌinale islobꞌ,
teꞌ ay yul yiktabꞌal isparaíso Komam Dios,”
xhi,»b
xhi Komam Jesús.
Chejbꞌanile tet makta ayxako yul isqꞌabꞌ Komam Jesucristo ay bꞌey konhobꞌ Esmirna
8 Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan ay yul konhobꞌ Esmirna:
“Komam yichebꞌanil yebꞌ islahobꞌal,
Komam kami yajaꞌ itzitzbꞌikanh,
haꞌ chalni hakaꞌ tiꞌ:
9 »”Hanintiꞌan kaw wohtajan tzet chewatxꞌe.
Wohtajan hanta chꞌekꞌyaꞌ heyanma,
yebꞌpaxo hemebꞌaꞌil,
yajaꞌ yinh kaw yeli yul sat Komam Dios kaw qꞌalom hex.
Kaw wohtajan tato txꞌoj istzotel ebꞌnaj chal isbꞌa Israelal teyinh,
yajaꞌ hunteqꞌan ebꞌnaj tuꞌ yet naj matzwalil ye ebꞌnaj.
10 Mach chexxiw yinh hunteqꞌan isyaꞌtajil chul teyibꞌanh.
Ay hex tiꞌ chexalaxoko preso yu naj matzwalil yunhe heyilwelaxi.
Yulbꞌal 10 (lahonhebꞌ) tzꞌayik cheyil isyaꞌtajil,
wal xin kaw linhbꞌawe hebꞌa waxanhka chexaqꞌlaxkamoj,
hak tuꞌ xin chiwaqꞌan qꞌinale mach istanhbꞌal ispaj selelo teyet hakaꞌ hunu corona.c
11 ¡Makex cheyabꞌe huneꞌ tiꞌ aqꞌwe heyanma hetxumnilo yinh tzet chal Komam Espíritu tet makta ayxako yul inqꞌabꞌan!
Haꞌ mak chiqꞌoji mach chiꞌaqꞌlax ekꞌoyaꞌ yanma yinh huneꞌ iskabꞌ kamikal,”
xhi,»d
xhi Komam Jesús.
Chejbꞌanile tet makta ayxako yul isqꞌabꞌ Komam Jesucristo ay bꞌey konhobꞌ Pérgamo
12 Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan ay yul konhobꞌ Pérgamo:
“Komam iqꞌnhe chꞌen espada kabꞌebꞌ yeh yebꞌ kaw xixiꞌ iswiꞌ,
haꞌ chalni hakaꞌ tiꞌ:
13 »”Hanintiꞌan kaw wohtajan tzet chewatxꞌe.
Kaw wohtajan tato ayexayo bꞌay kaw ay yip naj matzwalil,
yajaꞌ huneꞌnhetikꞌa haꞌ heyijen wetan.
Machi xin chebꞌej heyanayto yul heyanma winhan waxanhka heyil isyaꞌtajil yet iskam naj Antipas,
naj kaw yijem yute isbꞌa yalnikꞌo intzotiꞌan bꞌay kaw ayayo yip naj matzwalil.
14 Yajaꞌ xin ay hanikꞌ mach chischah inwiꞌan,
yuto ay hex tiꞌ cheyako henabꞌal yinh iskuybꞌanil naj Balaam,
naj ok aqꞌokꞌule tet naj rey Balac,
yok naj yaqꞌno aykꞌayo ebꞌnaj Israel.
Iskꞌuxni ebꞌnaj noꞌ chibꞌe chiꞌaqꞌlax xahanbꞌalil tet ej tioxh,e
yokpaxo ebꞌnaj ixloj.
15 Yebꞌ xin ay hex cheyako henabꞌal yinh iskuybꞌanil ebꞌnaj nicolaíta,
hunteqꞌan yahbꞌil wuhan.
16 Yuxin nawe hebꞌa,
bꞌejwekano hunteqꞌan tuꞌ,
ta mach xin chinapnihan yinh anhe,
kat wokan howal teyinh yu chꞌen espada chiꞌelti yul intiꞌan.
17 ¡Makex cheyabꞌe hunteqꞌan tiꞌ aqꞌwe heyanma hetxumni yinh tzet chal Komam Espíritu tet makta ayxako yul inqꞌabꞌan!
Haꞌ mak chiqꞌoji,
chiwaqꞌan maná islobꞌ,
huneꞌ ewanyehi,f
kat waqꞌnihan huneꞌ chꞌen chꞌen kaw sajhoponhe tet bꞌay tzꞌibꞌnhebꞌiliko huneꞌ bꞌiheg kaw akꞌto;
machi mak ohtanhe,
kachannhe huneꞌ mak chichahni tuꞌ chiꞌohtanheniloj,”
xhi,»
xhi Komam Jesús.
Chejbꞌanile tet makta ayxako yul isqꞌabꞌ Komam Jesucristo ay bꞌey Tiatira
18 Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan ay bꞌey konhobꞌ Tiatira:
“Komam Iskꞌahol Komam Dios,
Komam lahan isbꞌaqꞌ sat hakaꞌ xaj qꞌa qꞌaꞌ,
yebꞌ yoj hakaꞌ chꞌen bronce chitzejlahi,
haꞌ chalni hakaꞌ tiꞌ:
19 »”Hanintiꞌan kaw wohtajan tzettaj chewatxꞌe,
wohtajan tato ayko heyanma winhan.
Wohtapaxojan hanta chexmunlahi,
yebꞌ kaw ay isnimanil hekꞌul istecha isyaꞌtajil heyu.
Wohtapaxojan tato ekꞌbꞌalto hemunil tinanh sata yet heyichikoj.
20 Yajaꞌ xin ay hunteqꞌan tzet mach chischah inwiꞌan,
yuto hex tiꞌ maxhtikꞌa nino tzet cheyal yinh ix Jezabel,h
ix isbꞌaliko isbꞌa ischejabꞌo Komam Dios.
Chaqꞌni subꞌchaho ix ebꞌnaj inchejabꞌan yu iskuybꞌanil,
chistubꞌtento ix ebꞌnaj ixloj,
yebꞌ iskꞌuxni noꞌ chibꞌe chiꞌaqꞌlax yinh xahanbꞌalil.
21 Kaw waqꞌan tiempo tet ix yunhe isnahni isbꞌa ix kat isbꞌejnikano istxꞌojal,
yajaꞌ mach isbꞌej ix iswinajli.
22 Yajaꞌ xin chiwaqꞌ ekꞌojan yaꞌ yanma ix,
hakaꞌ hunu mak chito hilno sat txꞌat yu yabꞌil;
kat wanipaxayojan isyaꞌtajil yibꞌanh ebꞌnaj chiꞌuten mule yebꞌ ix,
ta mach chisnah isbꞌa ebꞌnaj isbꞌejnikano istxꞌojal,
hakaꞌ istxꞌojal chiswatxꞌe ix,
23 kat waqꞌni kamojan yunin ix.i
Hak tuꞌ xin chu yohtanhenilo sunil mak ayxako yul inqꞌabꞌan tato hanintiꞌan wohtajan tzet chiꞌekꞌ yul heyanma yebꞌ yinh henabꞌal.
Chiwaqꞌan ispaj selel teyet hatatikꞌa tzet chewatxꞌe hunun hex.
24 Yajaꞌ wal hunmajan hexxa ay bꞌey Tiatira tuꞌ,
hex mach heyako henabꞌal yinh iskuywabꞌal ix tuꞌ,
yebꞌ xin mach heyabꞌeto huneꞌ chihal-lax kuybꞌanile yet naj matzwalil ewanyehi,
chiwalan tato machi hunuxa chejbꞌanile chiwaltojan teyet,
25 kachannhe huneꞌ tiꞌ,
linhbꞌawe hebꞌa yinh tzet xatzujcha apno heyu masanto yet chinhulan.
26 Haꞌ mak chiqꞌoji yebꞌ xin maxhtikꞌa chisbꞌej iswatxꞌen tzet chiwalan,
chiwaqꞌan yip yok yahawo yibꞌanh ej konhobꞌ,j
27 kaw ay yip chu yaqꞌni yahawil,
hakaꞌ yu yaqꞌni Inmaman wipan.
Hakaꞌ ismaqꞌlaxpoho hunu txꞌotxꞌ xi yu chꞌen vara nabꞌa hierro,
hak tuꞌ chu yaqꞌlax isyaꞌtajil tet anma manhkꞌom.
28 Chiwaqꞌnipaxojan txꞌumel sajbꞌes tet ebꞌnaj.k
29 ¡Makex cheyabꞌe huneꞌ tiꞌ,
aqꞌwe heyanma hetxumnilo tzet chal Komam Espíritu tet ej mak ayxako yul inqꞌabꞌan!”
xhi,»
xhi Komam Jesús.