Chejbꞌanile tet makta ayxako yul isqꞌabꞌ Komam Jesucristo ay yul konhobꞌ Sardis
3
Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan ay yul konhobꞌ Sardis:
“Komam ayko hujebꞌ Yespíritu Komam Dios yinh,
yebꞌ iqꞌbꞌilkanh hujebꞌ txꞌumel yu,
haꞌ chalni hakaꞌ tiꞌ:
»”Hanintiꞌan kaw wohtajan tzet chewatxꞌe.
Kaw itzitz hex yalbꞌanil,
yajaꞌ wal yul insatan kamom hex.
2 Tinanh xin,
iwelo hewayanh kat heyokpaxo hewatxꞌen hunteqꞌan tzet etza lanhan istanhiloj.
Yuto chiwilan ta haꞌ tzet chewatxꞌe mach kꞌulo sata Komam Dios.
3 Naweti hunteqꞌan kuybꞌanile chabꞌil heyu,
lahweko heyijeni.
Nawe hebꞌa,
bꞌejwekano hetxꞌojal yuto ta mach lanhano hemajwahi,
chinapni lemnahan kexwilaꞌan yet tona nahul ay hex,
hakaꞌ chu yapni hunu naj elqꞌom yinh hunu mak tona nahul aya.
4 »”Yajaꞌ ay haywanh mak texol bꞌey Sardis tuꞌ mach yetato isbꞌa,
hakaꞌ hunu mak mach istzꞌilnheto xil isqꞌap,
yuxin hunteqꞌan mak tuꞌ yet ay yekꞌ wintajan,
sajhoponhe xil isqꞌap.
5 Haꞌ mak chiqꞌoji,
chiꞌalaxiko xil isqꞌap kaw sajhoponhe yebꞌ xin mach chinhokanhan isbꞌi yul hum yet qꞌinale;
kat walnihan sata Inmaman yebꞌ sata ebꞌnaj ángel ta wetan yehi.
6 ¡Makex cheyabꞌe huneꞌ tiꞌ aqꞌwe heyanma hetxumni tzet chal Komam Espíritu tet ej mak ayxako yul inqꞌabꞌan!”
xhi,»
xhi Komam Jesús.
Chejbꞌanile tet makta ayxako yul isqꞌabꞌ Komam Jesucristo ay bꞌey Filadelfia
7 Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan ay yul konhobꞌ Filadelfia:
“Komam machi nino istxꞌojal yinh,
yebꞌ isyelalnhetikꞌa chala,
Komam iqꞌnhe islawe yaꞌ rey David.a
Komam hayet chishajni pulta machi hunu mak chu ispebꞌani,
hayet chispebꞌan pulta,
mach mak chu ishajni,
chihalni hakaꞌ tiꞌ:
8 »”Hanintiꞌan wohtajan tzettaj chewatxꞌe.
Ay huneꞌ pulta hajan teyet wuhan,
machi hunu mak chu ispebꞌani.
Waxanhka machi heyip yajaꞌ kaw yijem cheyute hebꞌa yinh intzotiꞌan.
Machi xin chextxꞌixwilo winhan.
9 Haꞌ hunteqꞌan ebꞌnaj chiyijen yinh tzet chal naj matzwalil,
ebꞌnaj chisbꞌaliko isbꞌa Israelal chinchejtojan ebꞌnaj tekꞌatanh kat yay jahno ebꞌnaj tesataj,
kat yohtanhenilo ebꞌnaj ta xahan ay hex wuhan.
10 Kaw heyije inchejbꞌanilan,
nimanpaxo hekꞌul heyaqꞌni techaho ilwebꞌal,
yu huneꞌ tuꞌ yuxin chexinkolan yul isqꞌabꞌ huneꞌ isyaꞌtajil chihul sat yibꞌanhqꞌinal yunhe yilwelax anma ay sat txꞌo txꞌotxꞌ tiꞌ.
11 Toxa chinhul-lemnahan,
machojabꞌ chebꞌej hewatxꞌen tzet chitikꞌa hewatxꞌe,
haxinwal machi hunu mak chiꞌinilo ispaj selel chiꞌaqꞌlax teyet.
12 Haꞌ mak chiqꞌoji,
chiwakojan hakaꞌ yoyal yatut Inmaman,
machi xin bꞌaqꞌinh chiꞌilaxiloj;
chintzꞌibꞌnhenikojan isbꞌi Inmaman yinh yebꞌ isbꞌi iskonhobꞌ Inmaman,
huneꞌ akꞌ Jerusalén chitit yul satkanh bꞌay ay inDiosalan,
kat intzꞌibꞌnhenikojan inbꞌihan akꞌ yinh.
13 ¡Makex cheyabꞌe huneꞌ tiꞌ aqꞌwe heyanma hetxumnilo tzet chal Komam Espíritu tet makta ayxako yul inqꞌabꞌan!”
xhi,»
xhi Komam Jesús.
Chejbꞌanile tet makta ayxako yul isqꞌabꞌ Komam Jesucristo ay yul konhobꞌ Laodicea
14 Yalnipaxo Komam:
«Hak tiꞌ chu hatzꞌibꞌnhento tet inchejabꞌan chitanhen makta ayxako yul inqꞌabꞌan bꞌey konhobꞌ Laodicea:
“Komam istꞌinhanil chala,
Komam testigo kaw yijem yebꞌ chalni isyelal,
Komam watxꞌenhe sunil tzettaj ye tuꞌ yebꞌ Komam Dios,
haꞌ chalni hakaꞌ tiꞌ:
15 »”Wohtajan tzet chewatxꞌe,
wohtajan ta lahan hex hakaꞌ hunu tzet chiꞌukꞌlaxi mach chewoj,
mach xin kajopaxoj,
ayxikꞌa chew hex maka kaj hex.
16 Yajaꞌ yu naman hex,
mach chewoj hex mach kajohexpaxoj,
yuxin chexinpuchꞌiltijan yul intiꞌan.
17 Hex tiꞌ cheyala ta kaw qꞌalom hex,
kaw kꞌul heyinhbꞌal yebꞌ kaw sunil ay yul heqꞌabꞌ heyalni.
Mach xin heyohtajoj tato kaw kꞌanchꞌan hex yebꞌ kaw yaꞌta heyehi.
Kaw mebꞌaꞌ hex,
mach chu heyilni,
tꞌilanexpaxoj.
18 Wal xin chiwalan teyet loqꞌwe heoro wetan,
chꞌen kaw kꞌul watxꞌebꞌilxalo xol qꞌa qꞌaꞌ.
Hak tuꞌ xin chexok qꞌalomal yinh kaw isyelal,
kat xin heloqꞌni xil heqꞌap kaw sajhoponhe wetan,
kat heyaniko teyinh yunhe mach chiꞌel hetxꞌixobꞌal yuto tꞌilan hex.
Cheloqꞌnipaxo yanhal isbꞌaqꞌ hesat wetan yunhe chu heyilni.
19 Hanintiꞌan chinkachan yebꞌ chiwaqꞌan isyaꞌtajil yibꞌanh mak xahan ay wuhan.
Wal xin aweko heyanma winhan,
nawe hebꞌa,
bꞌejwekano istxꞌojal.b
20 Hanintiꞌan linhan inikojan sat pulta kat wawiktojan,
haꞌ mak chiꞌabꞌen yul innuqꞌan kat ishajni yatut wetan,
chinoktojan iskꞌatanh kat inwaꞌan yebꞌi kat iswaꞌpaxo yebꞌ hinan.
21 Haꞌ mak chiqꞌoji isyijeni chiwaqꞌan huneꞌ yehobꞌal bꞌay tzꞌonhan hinan,
hakaꞌ yu inqꞌojihan,
wok tzꞌonhnojan iskꞌatanh Inmaman bꞌay ay istzꞌonhobꞌal.
22 ¡Makex cheyabꞌe huneꞌ tiꞌ,
aqꞌwe heyanma hetxumniloj tzet chal Komam Espíritu tet ej makta ayxako yul inqꞌabꞌan!”
xhi,»
xhi Komam Jesús.