Alaxiko ismay Komam Dios yul satkanh
4
Lahwi tuꞌ,
wilnihan huneꞌ pulta hajan yul satkanh,
haꞌ xin huneꞌ yul nuqꞌe wabꞌehan yet bꞌabꞌelal,
huneꞌ hakaꞌ yoqꞌ chꞌen trompeta halni wetan:
«Ahanhti bꞌey tiꞌ kat inyenihan tawet hunteqꞌan tzet chiyubꞌ yintajilo tiꞌ,»
xhi wetan.
2 Yinhnhena tuꞌ wokan yalanh yip Komam Espíritu,
wilnihan huneꞌ tzꞌonhobꞌal yul satkanh,
yul huneꞌ tzꞌonhobꞌal tuꞌ tzꞌonhan huneꞌ mak.a
3 Komam tzꞌonhan tuꞌ,
lahan jilni istzejla hakaꞌ chꞌen jaspe yebꞌ hakaꞌ jilni chꞌen cornalina.
Yinh ishoyanil istzꞌonhobꞌal Komam tuꞌ aykanh huneꞌ noꞌ chꞌer chitzejla hakaꞌ chꞌen esmeralda.b
4 Wilnipaxojan 24 (kanhebꞌ iskawinaj) tzꞌonhobꞌal yinhla ishoyanil istzꞌonhobꞌal Komam,
yul hunteqꞌan tzꞌonhobꞌal tuꞌ tzꞌonhanayo 24 (kanhebꞌ iskawinaj) ebꞌnaj anciano,c
saj xil isqꞌap ayko yebꞌ ayahto corona nabꞌa oro yinh iswiꞌ ebꞌnaj.
5 Yul istzꞌonhobꞌal Komam tuꞌ chiꞌelti jepla yoj kꞌuh,
kaw ay yip isnhirlahi.
Haxa sata tzꞌonhobꞌal tuꞌ kaw chiꞌah xaj qꞌaꞌ yinh hujebꞌ antorcha,d
haꞌ ton hujebꞌ Yespíritu Komam Dios.
6 Sata tzꞌonhobꞌal tuꞌ aypaxo huneꞌ hakaꞌ haꞌ mar jilni,
chiqꞌaxpon komujlubꞌal yul hakaꞌ chꞌen vidrio.e
Haxa yiktabꞌal bꞌay ay tzꞌonhobꞌal tuꞌ yebꞌ yinh ishoyanil ay kanhwanh ebꞌnaj querubín.
Kaw txꞌiꞌalkano isbꞌaqꞌ sat ebꞌnaj,
ay isbꞌaqꞌ sat ayko sataj,
aypaxo isbꞌaqꞌ sat ebꞌnaj yintaj.
7 Naj bꞌabꞌel querubín lahan jilni naj hakaꞌ noꞌ bꞌalam,
naj iskabꞌ hakaꞌ noꞌ toro,
naj yox hakaꞌ sat anma,
hak tuꞌ jilni sat naj,
haxa naj iskanh hakaꞌ noꞌ tꞌiw leyanilto xikꞌ chiꞌekꞌ satkanh,
hak tuꞌ jilni naj.f
8 Ebꞌnaj kanhwanh querubín tuꞌ wajata xikꞌ hunun ebꞌnaj,
nohnako bꞌaqꞌ sate yalanh yebꞌ yibꞌanh isxikꞌ ebꞌnaj.
Tzꞌayikal yebꞌ aqꞌbꞌalil maxhtikꞌa chisbꞌej ebꞌnaj yalni hakaꞌ tiꞌ:
«Mach istxꞌojal Komam Dios Jahawil,
mach istxꞌojal,
mach istxꞌojal Komam;
Komam kaw aykano yip,
Komam ayxatikꞌa yet yalanhtokanoj,
yebꞌ ay tinanh,
yebꞌ chihuli,»g
xhi ebꞌnaj.
9 Chalni ebꞌnaj querubín tuꞌ ta kaw ay ismay,
yebꞌ ta kaw ay yelapno Komam,
Komam tzꞌonhan yul yehobꞌal,
yebꞌ xin chaqꞌni ebꞌnaj yuchꞌandiosal tet Komam aynhetikꞌa yinh sunilbꞌal tiempo.
10 Hunta el yet chalni ebꞌnaj hakaꞌ tuꞌ chiꞌay jahno ebꞌnaj 24 (iskanh iskawinaj) anciano sata Komam,
chanayo ebꞌnaj iscorona sata Komam,
chalni ebꞌnaj:
11 «Mam Dios Jahawil,
hatzan yal-laxi ta kaw ay hamay,
yebꞌ ta kaw ay yelapno hawehi,
yebꞌ ta kaw ay hawip,
yuto hach watxꞌenhe sunil tzet ye tuꞌ,
yuto hak tuꞌ el yinh hakꞌul yuxin aya;
hach xin watxꞌenhekanoj,»
xhi ebꞌnaj.