Komam Meꞌ isbꞌi yebꞌ huneꞌ teꞌ hum
5
Wilnihan Komam tzꞌonhan yul istzꞌonhobꞌal tuꞌ,
ayko huneꞌ teꞌ hum yul isqꞌabꞌ,
ayayo tzꞌibꞌ yul teꞌ yebꞌ yinta teꞌ.
Kaw chulbꞌilayo teꞌ,
ayiko hujebꞌ sello yinh teꞌ.a
2 Wilnihan huneꞌ naj ángel kaw aykano yip,
isqꞌambꞌen naj yinh kaw ip:
«¿Maktaxka ay yelapno yok yinilo issellohal teꞌ hum tiꞌ,
kat isholnito teꞌ?»
xhi naj.
3 Yajaꞌ nitam satkanh yebꞌ yul sat yibꞌanhqꞌinal tiꞌ yebꞌ yalanh txꞌo txꞌotxꞌ ilcha hunu mak chu isholnito teꞌ,
nitam yilni tzet ayayo yul teꞌ.
4 Kaw xin chinoqꞌan yuto mach ilcha mak ay yelapno yok ishajni teꞌ,
nitam yilni tzet chal teꞌ.
5 Yalni huneꞌ naj anciano wetan:
«Mach chaxhoqꞌi,
ay huneꞌ mak xaqꞌoji,
Bꞌalam isbꞌi,
titna yinh yaꞌ Judá,
titnapaxo yinh yaꞌ rey David.b
Haꞌ chu istzilnilo hujebꞌ sello tuꞌ,
kat isholnito teꞌ,»
xhi naj wetan.
6 Wilnihan huneꞌ mak hakaꞌ meꞌ linhankanh yiktabꞌal tzꞌonhobꞌal,
yebꞌ yiktabꞌal ebꞌnaj kanhwanh querubín,
yebꞌ xolbꞌal ebꞌnaj anciano.
Huneꞌ mak tuꞌ hakaꞌtanhe xaꞌalaxiko yinh xahanbꞌalil,c
hujebꞌ yukꞌaꞌ yebꞌ hujebꞌ isbꞌaqꞌ sat,d
haꞌ ton hujwanh Yespíritu Komam Dios alaxti yul sat yibꞌanhqꞌinal tiꞌ.
7 Komam Meꞌ isbꞌi,
haꞌ inilo teꞌ hum ayko yul iswatxꞌqꞌabꞌ Komam tzꞌonhanayo yul istzꞌonhobꞌal.
8 Hayet yinilo Komam teꞌ,
yay jahno ebꞌnaj kanhwanh querubín yebꞌ ebꞌnaj 24 (iskanh iskawinaj) anciano sata Komam Meꞌ isbꞌi tuꞌ.
Sunil ebꞌnaj iqꞌbꞌil yarpa,
yebꞌ isvaso nabꞌa oro nohna yu pom.
Haꞌ pom tuꞌ yechel istxah anma yetxa Komam yehi.e
9 Yaniko ebꞌnaj huneꞌ akꞌ bꞌit,
chalni hakaꞌ tiꞌ:
«Mamin,
hachnhechꞌan chu hachahni huneꞌ teꞌ hum tiꞌ,
kat hatzilnilo issellohal teꞌ,
yuto hach tiꞌ kaxhok xahanbꞌalil,
ismalto hachikꞌil,
yu haloqꞌni anma yeto Komam Dios,
tzijxanhe anmahil,
nananta yabꞌxubꞌal,
nixhte konhobꞌ yebꞌ nimeta konhobꞌ.f
10 Hawaniko anma tuꞌ reyalil yebꞌ sacerdotehal yu isyijen tzet chal Komam Dios,
kat yok yahawilo yul sat yibꞌanhqꞌinal tiꞌ,»g
xhi ebꞌnaj.
11 Lahwi tuꞌ,
wilnihan hayebꞌtam millón ebꞌnaj ángel hoyaniko yinh istzꞌonhobꞌal Komam yebꞌ yinh ebꞌnaj kanhwanh querubín yebꞌ ebꞌnaj anciano.
Wabꞌenan yul isnuqꞌ ebꞌnaj ángel tuꞌ,
12 chalni ebꞌnaj yinh kaw ip hakaꞌ tiꞌ:
«Komam Meꞌ isbꞌi,
Komam ok xahanbꞌalil,
yet ay yal-lax yinh ta Yahawil,h
ta ay isqꞌalomal,
ta ay ishelanil,
ta ay yip,
ta ay yelapnoj,
ta ay ismay yebꞌ yal-lax tzotiꞌ kꞌul yinh,»
xhi ebꞌnaj.
13 Wabꞌenpaxojan yalni tzet watxꞌebꞌil yu Komam Dios yul satkanh yebꞌ tzet ay sat txꞌo txꞌotxꞌ yebꞌ yalanh txꞌo txꞌotxꞌ,
yebꞌ tzet ay xol haꞌ mar,
chalni hakaꞌ tiꞌ:
«Hal-laxojabꞌ tzotiꞌ kꞌul yinh Komam tzꞌonhanayo yul istzꞌonhobꞌal,
yebꞌ yinh Komam Meꞌ isbꞌi.
Hal-laxojabꞌi ta kaw ay yelapnoj,
ta kaw ay ismay,
ta kaw ay yip yinh sunilbꞌal tiempo,»
xhi.
14 Yalnipaxo ebꞌnaj kanhwanh querubín:
«Hakojabꞌ tuꞌ,»
xhi ebꞌnaj.
Haxa ebꞌnaj 24 (iskanh iskawinaj) anciano ay jahno ebꞌnaj,
yalni ebꞌnaj tzotiꞌ kꞌul yinh Komam.