Hujebꞌ sello
6
Lahwi tuꞌ,
wilnihan istzilnilo Komam ok xahanbꞌalil huneꞌ bꞌabꞌel sello,
wabꞌenan yalni naj bꞌabꞌel querubín yinh kaw ip hakaꞌ isbꞌili kꞌuh,
yalni naj:
«¡Kata!»
xhi naj.
2 Hayet inhakxitojan wilnihan huneꞌ noꞌ cheh sajinh,
ayahto huneꞌ naj yibꞌanh noꞌ,
iqꞌbꞌil xin huneꞌ teꞌ litꞌ yu naj,
yaqꞌlax huneꞌ corona tet naj.
Isto naj yinh howal,
chilannhetikꞌa xin isqꞌoji naj.
3 Haxa yet istzilnilo Komam ok xahanbꞌalil iskabꞌ sello,
wabꞌenan yalni naj iskabꞌ querubín:
«¡Kata!»
xhi naj.
4 Wilnipaxojan huneꞌ noꞌ cheh kajinh,
yaqꞌlax yip naj ayahto yibꞌanh noꞌ yinilo aqꞌankꞌulal yul sat yibꞌanhqꞌinal tiꞌ.
Yunhe yok anma ispotxꞌleno isbꞌa;
yaqꞌlax huneꞌ niman espada tet naj.
5 Haxa yet istzilnilo Komam ok xahanbꞌalil isyox sello,
wabꞌenan yalni naj yox querubín hakaꞌ tiꞌ:
«¡Kata!»
xhi naj.
Wilnihan huneꞌ noꞌ cheh qꞌejinh,
haꞌ naj ayahto yibꞌanh noꞌ iqꞌbꞌil huneꞌ chꞌen libra malbꞌal yu naj.
6 Xol ebꞌnaj kanhwanh querubín tuꞌ wabꞌehan huneꞌ yul nuqꞌe halni:
«Kabꞌnhe libra trigo maka wajebꞌ libra cebada chiqꞌ naj munlawom yinh tzꞌayik.
Mach xin cheyetato teꞌ aceite yebꞌ teꞌ vino,»a
xhi.
7 Haxa yet istzilnilo Komam ok xahanbꞌalil iskanh sello,
wabꞌenan yalni naj iskanh querubín:
«¡Kata!»
xhi naj.
8 Wilnipaxojan huneꞌ noꞌ cheh qꞌaninh,
haꞌ xin naj ayahto yibꞌanh noꞌ,
kamikal isbꞌi naj,
yinta naj xin tzujan naj yahawil bꞌay ay kamom.
Yaqꞌlax yip ebꞌnaj istanhtzenilo huneꞌ iskanh majan anma ay yul sat yibꞌanhqꞌinal tiꞌ yu ej howal,
wahil,
yebꞌ ej yabꞌil yebꞌpaxo yu ej noꞌ howla noqꞌ ay sat txꞌo txꞌotxꞌ tiꞌ.
9 Haxa yet istzilnilo Komam ok xahanbꞌalil ishoꞌ sello,
wilnihan huneꞌ mexha bꞌay chꞌaqꞌlax xahanbꞌal,
yalanh huneꞌ mexha tuꞌ wilan yanma ebꞌnaj potxꞌbꞌilkamo yu yalnikꞌo Istzotiꞌ Komam Dios,
yebꞌ yu yaqꞌ isbꞌa ebꞌnaj testigohal yinh.
10 Chalni ebꞌnaj yinh kaw ip:
«Mam Jahawil,
Mam mach istxꞌojal ayko tawinh,
wal xin isyelalnhetikꞌa chawala.
¿Bꞌaqꞌinh chawil yinh tzet chꞌeliko anma ay yul sat yibꞌanhqꞌinal kat hawaqꞌni ispaj tet mak konhpotxꞌnikamojanh?»
xhi.
11 Yaqꞌlax hunteqꞌan xil isqꞌap ebꞌnaj kaw saj jilni,
yal-lax tet ebꞌnaj ta chito xew ebꞌnaj hanikꞌoxa tiempo masanto chitzꞌajna isbꞌisil ebꞌnaj juxhta yilal yaqꞌlax kamoj,
yu chaqꞌ chejaꞌ isbꞌa tet Komam Cristo.
12 Haxa yet istzilnilo Komam ok xahanbꞌalil iswaj sello,
yekꞌ huneꞌ niman txixkabꞌ,
isqꞌejholilo tzꞌayik hakaꞌ hunu qꞌap qꞌap qꞌej,
iskajponhilo ixahaw hakaꞌ chikꞌ.
13 Yaykꞌay ejti txꞌumel satkanh hakaꞌ yay hona sat teꞌ higuera yu hunu niman jaqꞌeqꞌ yet yaxto teꞌ.
14 Iskꞌaykanh satkanh,
hakaꞌ chu ischul-laxayo hunu xaj hum.
Sunil witz yebꞌ ej txꞌo txꞌotxꞌ ay xol haꞌ mar ishekꞌilo isbꞌa yul yehobꞌal.
15 Sunil ebꞌnaj rey yul yibꞌanhqꞌinal tiꞌ yebꞌ ebꞌnaj winaj kaw ay yelapnoj,
yebꞌ ebꞌnaj qꞌalom,
yebꞌ ebꞌnaj yahawil soldado,
yebꞌ ebꞌnaj kaw aykano yip,
yebꞌ ebꞌnaj chejabꞌ,
yebꞌ ebꞌnaj yet isbꞌa ischukil,
yebꞌato isbꞌa ebꞌnaj yulaj chꞌen nhachꞌen yebꞌ xolaj chꞌen chꞌen ay iswiꞌla witz.
16 Chalni ebꞌnaj tet ej witz yebꞌ tet chꞌen nimeta chꞌen hakaꞌ tiꞌ: