Ebꞌnaj 144 mil Israel alaxiko yechel
7
Lahwi tuꞌ xin,
wilnihan kanhwanh ebꞌnaj ángel linhankanh yinhla iskanhebꞌal istxikin txꞌo txꞌotxꞌ.
Chispahnito ebꞌnaj jaqꞌeqꞌ yunhe mach chꞌekꞌ yibꞌanh txꞌo txꞌotxꞌ yebꞌ yibꞌanh haꞌ mar,
yebꞌ yibꞌanh ej teꞌ qꞌebꞌtaj.a
2 Wilnihan yahilo huneꞌxa naj ángel bꞌay chiꞌahilo tzꞌayik,
iqꞌbꞌil xin issello Komam Dios yu naj,
Komam itzitznhetikꞌa.
Yahwi naj yinh kaw ip tet ebꞌnaj kanhwanh aqꞌlax yip yetanto tzet ay sat txꞌo txꞌotxꞌ yebꞌ tzet ay xol haꞌ mar,
yebꞌ ej teꞌ qꞌebꞌtaj,
yalni naj hakaꞌ tiꞌ:
3 «¡Maxhtonhe cheyetato tzet ay sat txꞌo txꞌotxꞌ yebꞌ tzet ay xol haꞌ mar,
yebꞌ ej teꞌ qꞌebꞌtaj masanto chiꞌok isselloc Komam Dios yinh ispalanh ebꞌnaj ischejabꞌb koDiosal!»
xhi naj.
4 Wabꞌenan ta xol ebꞌnaj 12 (kabꞌlahonhebꞌ) majan Israel 144 mil ebꞌnaj alaxiko yechel.
5 Yinh ebꞌnaj titna yinh yuninal yaꞌ Judá 12 (kabꞌlahonhebꞌ) mil ebꞌnaj alaxiko yechel,
yebꞌ 12 (kabꞌlahonhebꞌ) mil ebꞌnaj titna yinh yuninal yaꞌ Rubén,
yebꞌ 12 (kabꞌlahonhebꞌ) mil ebꞌnaj titna yinh yuninal yaꞌ Gad.
6 12 (Kabꞌlahonhebꞌ) milpaxo ebꞌnaj titna yinh yuninal yaꞌ Aser,
12 (kabꞌlahonhebꞌ) mil ebꞌnaj titna yinh yuninal yaꞌ Neftalí,
12 (kabꞌlahonhebꞌ) mil ebꞌnaj titna yinh yuninal yaꞌ Manasés.
7 12 (Kabꞌlahonhebꞌ) mil ebꞌnaj titna yinh yuninal yaꞌ Simeón,
12 (kabꞌlahonhebꞌ) mil ebꞌnaj titna yinh yuninal yaꞌ Leví,
12 (kabꞌlahonhebꞌ) mil ebꞌnaj titna yinh yuninal yaꞌ Isacar.
8 12 (Kabꞌlahonhebꞌ) mil ebꞌnaj titna yinh yuninal yaꞌ Zabulón,
12 (kabꞌlahonhebꞌ) mil ebꞌnaj titna yinh yuninal yaꞌ José,
yebꞌ xin 12 (kabꞌlahonhebꞌ) mil ebꞌnaj titna yinh yuninal yaꞌ Benjamín.
Kaw tzetkꞌa anma saj xil isqꞌap aykoj
9 Lahwi tuꞌ,
wilnihan kaw hantanhe anma ayko sata istzꞌonhobꞌal Komam Dios,
yebꞌ sata Komam ok xahanbꞌalil.
Xol anma tuꞌ ay anma nananta konhobꞌal,
nananta yichmam,
nananta yabꞌxubꞌal,
kaw xin hantanhekano anma tuꞌ,
machi mak chiqꞌoji isbꞌisni,
kaw saj xil isqꞌap anma aykoj,
iqꞌbꞌil xin xaj teꞌ chꞌibꞌ yu.
10 Chalni anma tuꞌ yinh kaw yip:
«¡Komam Dios tzꞌonhan yul istzꞌonhobꞌal yebꞌ Komam ok xahanbꞌalil,
haꞌ aqꞌni kokolbꞌanil!»
xhi anma.
11 Sunil ebꞌnaj ángel linhaniko yinh ishoyanil bꞌay tzꞌonhan Komam Dios,
yebꞌ yinh ebꞌnaj anciano yebꞌ yinh ebꞌnaj kanhwanh querubín,
ay jahno ebꞌnaj,
yay xulno sat txꞌotxꞌ sata Komam tzꞌonhan yul istzꞌonhobꞌal;
yalni ebꞌnaj kꞌul-la tzotiꞌ yinh Komam.
12 Yalni ebꞌnaj hakaꞌ tiꞌ:
«¡Hakojabꞌ tuꞌ!
Hanhehojabꞌ yinh Komam Dios chal-lax tzotiꞌ kꞌul,
yebꞌ ta kaw ay ismay,
yebꞌ ta kaw ay yitzꞌatil iswiꞌ.
Hanhehojabꞌ tet Komam Dios chiꞌaqꞌlax yuchꞌandiosal,
hanhe Komam kaw ay yelapnoj yebꞌ kaw ay yip,
yebꞌ kaw ay ishelanil yinh sunilbꞌal tiempo.
¡Hakojabꞌ tuꞌ!»
xhi ebꞌnaj.
13 Isqꞌambꞌen huneꞌ naj anciano wetan:
«¿Mak anmahil hunteqꞌan saj xil isqꞌap tiꞌ yebꞌ bꞌay titnakoj?»
xhi naj wetan.
14 Intaqꞌwihan tet naj:
«Mamin,
hach hawohtaj,
wal hinan mach wohtajojan,»
kinchihan.
Yalni naj wetan:
«Haꞌ hunteqꞌan mak chawil tiꞌ ispeto xol huneꞌ niman isyaꞌtajil,
xatxꞌahlaxilo ismul yu ischikꞌil Komam ok xahanbꞌalil,
hakaꞌta xaꞌistxꞌah xil isqꞌap,
kaw xin saj elkanikoj.
15 Yuxin ayko anma tuꞌ sata Komam ayko yul istzꞌonhobꞌal,
chixinmunla yul Yatut Komam tzꞌayikal aqꞌbꞌalil.
Haꞌ xin Komam tzꞌonhan yul istzꞌonhobꞌal chitanhen anma tuꞌ
yuto ayko Komam Dios yetbꞌihoj.
16 Matxa xin chaqꞌle anma wahil yebꞌ tajintiꞌal,
yebꞌ matxa chaqꞌle anma qꞌaꞌ nitam chitzꞌato yu yoj tzꞌayik.d
17 Yuto Komam ok xahanbꞌalil ayko yiktabꞌal bꞌay tzꞌonhan Komam Dios,
haꞌ Komam chitanheni,
hakaꞌ chu istanhelax noꞌ meꞌ kat yilaxto noꞌ ukꞌu haꞌ,
hak tuꞌ xin chu yinito Komam anma tuꞌ yinh huneꞌ ha haꞌ chiꞌaqꞌni qꞌinale.
Haxa Komam tuꞌ chisunilo yal sat anma,»e
xhi naj.