Huneꞌ ishuj sello
8
Haxa yet istzilnilo Komam ok xahanbꞌalil ishuj sello ayko yinh teꞌ hum tuꞌ,
aymi yiktajo hora matxa tzet bꞌili yul satkanh.
2 Lahwi tuꞌ wilnihan hujwanh ebꞌnaj ángel linhankanh sata Komam Dios,
yaqꞌlax hujebꞌ chꞌen trompeta tet ebꞌnaj.
3 Lahwi tuꞌ yul huneꞌxa naj ángel iqꞌbꞌil huneꞌ chꞌen lesen nabꞌa oro yu naj,
yok linhno naj sata mexha ayko sata istzꞌonhobꞌal Komam Dios,
kaw xin txꞌiꞌal pom aqꞌlax tet naj.
Yok naj isnhusno yibꞌanh mexha nabꞌa oro,
yalten naj tet Komam Dios yebꞌ istxah anma yetxa Komam yehi.
4 Chixin ah topton isnhubꞌal pom yul isqꞌabꞌ naj,
yapni isxuqꞌal sam sata Komam Dios yebꞌ istxah anma yetxa Komam.
5 Lahwi tuꞌ,
isnohtzen naj ángel chꞌen lesen yu tzaqꞌaqꞌ ayahto yibꞌanh mexha,
isqꞌojnayto naj yibꞌanh txꞌo txꞌotxꞌ;
yinhnhena tuꞌ xin isbꞌili kꞌuh,
isnhirlahi isjepla kꞌuh yekꞌpaxo txixkabꞌ.
Yet yoqꞌtzelax chꞌen trompeta
6 Iswatxꞌen isbꞌa ebꞌnaj hujwanh ángel yunhe yoqꞌtzen ebꞌnaj istrompeta.
7 Hayet yoqꞌtzen naj bꞌabꞌel ángel istrompeta,
yalaxti chꞌen sajbꞌat yebꞌ qꞌa qꞌaꞌ soman ye yebꞌ chikꞌ yibꞌanh txꞌo txꞌotxꞌ,
istzꞌato huneꞌ isyox majan txꞌo txꞌotxꞌ yebꞌ huneꞌ isyox majan te teꞌ,
istzꞌapaxkanto sunil ej teꞌ telaj kaw yax.
8 Haxa yet yoqꞌtzen naj iskabꞌ ángel istrompeta,
isqꞌojlaxayto huneꞌ hakaꞌ witz ayko qꞌaꞌ yinh xol haꞌ mar;
hak tuꞌ xin huneꞌ yox majan haꞌ mar tuꞌ meltzoko chikꞌal.
9 Hanikꞌxanhe mach yiktajo no noqꞌ ay xol haꞌ mar tuꞌ kamiloj.
Hanikꞌxanhepaxo mach yiktajo teꞌ barco etaxtoj.
10 Haxa yet yoqꞌtzen naj yox ángel istrompeta,
yaykꞌayti huneꞌ niman txꞌumel yul satkanh,
ayko qꞌaꞌ yinh hakaꞌ hunu antorcha.
Huneꞌ txꞌumel tuꞌ,
hanikꞌxanhe mach yiktajo ha haꞌ bꞌay aykꞌayi yebꞌpaxo yibꞌanh isnuqꞌ ha haꞌ.
11 Huneꞌ txꞌumel tuꞌ Kꞌah isbꞌi,
hanikꞌxanhe mach yiktajo haꞌ kꞌahbꞌilo yu,
kaw xin hantanhe anma kamilo yu haꞌ yuto kꞌahbꞌilo haꞌ.
12 Haxa yet yoqꞌtzen naj iskanh ángel istrompeta,
kaw etza hanikꞌxanhe mach yiktajo ismujlubꞌal tzꞌayik tanhiloj yebꞌpaxo xin ixahaw yebꞌ ej txꞌumel.
Hak tuꞌ xin hanikꞌxanhe mach yiktajo tzꞌayikal mujli tzꞌayik,
yebꞌpaxo xin etza yiktaxanhe aqꞌbꞌalil mujli ixahaw yebꞌ ej txꞌumel.
13 Lahwi tuꞌ wilnihan yekꞌ huneꞌ naj ángel hakaꞌ noꞌ tꞌiw satkanh,
wabꞌenan yel yaw yinh kaw ip:
«¡Kꞌanchꞌan anma ay yul sat yibꞌanhqꞌinal yuto oxebꞌto isyaꞌtajil chihuli yet chiyoqꞌtzen ebꞌnaj oxwanh ángel istrompeta!»
xhi naj.