9
Haxa yet yoqꞌtzen naj ishoꞌ ángel istrompeta,
wilnihan yaykꞌayti huneꞌ txꞌumel satkanh,
yaqꞌlax islawehal huneꞌ niman xabꞌ tet txꞌumel tuꞌ.
2 Ishajni txꞌumel tuꞌ istiꞌ huneꞌ niman xabꞌ tuꞌ,
yichiko yahti topton nhubꞌ yebꞌ jaqꞌeqꞌ yul,
hakaꞌ yelti nhubꞌ yul hunu horno,
isqꞌejholilo yul sat yibꞌanhqꞌinal tiꞌ.
3 Xol nhubꞌ tuꞌ xin ahilo hunteqꞌan no noqꞌ hakaꞌ noꞌ qꞌul,
ispujnato noꞌ yul sat yibꞌanhqꞌinal tiꞌ.
Yaqꞌlax yip noꞌ ischiwa yinh anma;
hakaꞌ istzahwal noꞌ kꞌolotx,
hak tuꞌ istzahwal noꞌ.
4 Yal-lax tet noꞌ ta mach chetato noꞌ teꞌ telaj ay sat txꞌo txꞌotxꞌ yebꞌ ej yaxla tzꞌunubꞌ,
yebꞌ ej te teꞌ.
Kachannhe anma mach ayoko issello Komam Dios yinh ispalanh,
haꞌ cheta noꞌ.
5 Yajaꞌ hal-lax tet noꞌ ta mach maqꞌbꞌil ispotxꞌni noꞌ anma,
to tonhe chꞌaqꞌlax ekꞌoyaꞌ yanma anma yulbꞌal howebꞌ ixahaw;
haꞌ xin isyaꞌil chichiwa noꞌ lahan isyaꞌil hakaꞌ bꞌay chitzahwa noꞌ kꞌolotx.
6 Yinh huneꞌ tiempohal tuꞌ chissay anma yinh tzet chu iskami,
yajaꞌ matxa naj kamikal,
yebꞌ waxanhka kaw choche chikami yajaꞌ mach chikami.
7 Hunteqꞌan noꞌ qꞌul tuꞌ,
lahan jilni noꞌ hakaꞌ noꞌ cheh istoxa yinh howal,
ayahto hunun corona nabꞌa oro yinh iswiꞌ noꞌ,
lahan xin jilni sat noꞌ yebꞌ anma.
8 Haxa xil iswiꞌ noꞌ lahan jilni hakaꞌ xil iswiꞌ ebꞌix ix,
haxa yeh noꞌ lahan hakaꞌ yeh noꞌ bꞌalam.
9 Ayko hunteqꞌan chꞌen chꞌen nabꞌa hierro yet howal yinh istxam iskꞌul noꞌ.
Hakaꞌ xin isnhirnhon txꞌiꞌal teꞌ carruaje iqꞌbꞌil yu noꞌ cheh chiyaqꞌ anhe yet chito noꞌ yinh howal,
hak tuꞌ isbꞌili isxikꞌ noꞌ.
10 Wal isnhe noꞌ lahan jilni hakaꞌ isnhe noꞌ kꞌolotx,
nohnako istzahwal noꞌ yinh.
Haꞌ xin isnhe noꞌ tuꞌ ay yip yaqꞌni ekꞌoyaꞌ yanma anma yulbꞌal howebꞌ ixahaw.
11 Haꞌ naj yahawil yinh hunteqꞌan no noqꞌ tuꞌ,
haꞌ naj aypaxiko yahawilo yinh huneꞌ niman xabꞌ tuꞌ,
Abadóna isbꞌi naj yinh abꞌxubꞌal hebreo,
haxa yinh abꞌxubꞌal griego Apolión isbꞌi naj.b
12 Ekꞌto huneꞌ bꞌabꞌel isyaꞌtajil,
yajaꞌ ayto kabꞌebꞌxa.
13 Hayet yoqꞌtzen naj iswaj ángel istrompeta,
wabꞌenan yahwi xolbꞌal kanhebꞌ yukꞌaꞌ huneꞌ mexha nabꞌa oro ayko sata Komam Dios.
14 Yalni huneꞌ yul nuqꞌe tet naj iswaj ángel yoqꞌtze istrompeta tuꞌ:
«As puhilo ebꞌnaj kanhwanh ángel kꞌalan bꞌey istiꞌ haꞌ Éufrates,»
xhi.
15 Ispuhlaxilo ebꞌnaj kanhwanh ángel tuꞌ yunhe istanhtzenilo ebꞌnaj huneꞌ yox majan anma ay yul sat yibꞌanhqꞌinal tiꞌ.
Tꞌinhanxatikꞌa ye ebꞌnaj iswatxꞌen huneꞌ tuꞌ yinh huneꞌ hora tuꞌ,
yinh huneꞌ tzꞌayik tuꞌ,
yinh huneꞌ ixahaw tuꞌ,
yebꞌ yinh huneꞌ habꞌil tuꞌ.
16 Wabꞌenan yal-laxi tato kabꞌ cien millón isbꞌisil ebꞌnaj aqꞌom howal ayahto yibꞌanh cheh.
17 Wilnihan noꞌ cheh tuꞌ.
Haꞌ xin ebꞌnaj ayahto yibꞌanh noꞌ ayko hunteqꞌan chꞌen xilqꞌape yet howal yinh istxam iskꞌul ebꞌnaj.
Haꞌ chꞌen tuꞌ kaj jilni chꞌen hakaꞌ qꞌa qꞌaꞌ,
yaxmutzꞌmunhe jilnipaxo chꞌen hakaꞌ chꞌen azufre,
qꞌan jilnipaxo chꞌen hakaꞌ chꞌen bronce.
Wal noꞌ cheh tuꞌ,
lahan jilni iswiꞌ noꞌ hakaꞌ iswiꞌ noꞌ bꞌalam,
Chixinelti qꞌa qꞌaꞌ yebꞌ nhubꞌ yebꞌ azufre yul istiꞌ noꞌ.
18 Kaw xin huneꞌ yox majan anma kamilo yul sat yibꞌanhqꞌinal tiꞌ yu oxebꞌ isyaꞌtajil tiꞌ,
haꞌ ton qꞌa qꞌaꞌ,
yebꞌ nhubꞌ,
yebꞌ azufre chiꞌelti yul istiꞌ noꞌ cheh tuꞌ.
19 Yuto yinh istiꞌ noꞌ yebꞌ yinh isnhe noꞌ aqꞌbꞌil yip;
isnhe noꞌ tuꞌ ay iswiꞌ hakaꞌ iswiꞌ labꞌa,
haꞌ xin isnhe noꞌ chiꞌaqꞌni ekꞌoyaꞌ yanma anma.
20 Yajaꞌ hunteqꞌan anma mach kam yu hunteqꞌan isyaꞌtajil tuꞌ,
maxhtikꞌa isbꞌejkano istxꞌojal,
yebꞌ maxhtikꞌa xin isbꞌej yinayo isbꞌa tet ischejabꞌ naj matzwalil,
yebꞌ tet ej tioxh watxꞌebꞌil yinh chꞌen oro,
chꞌen plata,
chꞌen bronce,
yebꞌ yinh ej chꞌen chꞌen yebꞌ yinh te teꞌ.
Hunteqꞌan tioxh tuꞌ mach chu yilni,
mach chabꞌe,
yebꞌ mach chu yekꞌi.
21 Maxhtikꞌa xin isbꞌejpaxkano anma ispotxꞌwahi,
iskunli,
yixli yebꞌ iswinajli,
yebꞌ xin yelqꞌawi.