Naj ángel iqꞌnhe huneꞌ teꞌ nichꞌan hum
10
Lahwi tuꞌ,
wilnihan huneꞌ naj ángel kaw ay yip,
tit yul satkanh xol moyan,
aykanh xin huneꞌ noꞌ chꞌer yibꞌanh iswiꞌ naj.
Kaw xin chitzejla sat naj hakaꞌ istzejla tzꞌayik,
haxa yoj naj xin hakaꞌ xaj qꞌa qꞌaꞌ chiꞌah joplahi,
hak tuꞌ jilni.
2 Ay xin huneꞌ teꞌ nichꞌan hum iqꞌbꞌil yu naj,
leyanto teꞌ;
yanayo naj huneꞌ yoj yinh iswatxꞌqꞌabꞌ yibꞌanh haꞌ mar,
haxa hunxa yoj naj yinh ismekqꞌabꞌ yayo yibꞌanh txꞌo txꞌotxꞌ.
3 Yahwi naj yinh kaw ip hakaꞌ yel yaw noꞌ bꞌalam.
Hayet yahwi naj isnhirla hujebꞌ kꞌuh,
yalni tzotiꞌ.
4 Hayet lahwi istzotel hujebꞌ kꞌuh tuꞌ,
wokan intzꞌibꞌnhenojan walnihan;
yajaꞌ wabꞌehan huneꞌ yul nuqꞌe satkanh halni hakaꞌ tiꞌ:
«Tonhe chakꞌubꞌakano hunteqꞌan maxawabꞌe tiꞌ,
mach chatzꞌibꞌnhekanoj,»
xhi wetan.
5 Naj ángel ayayo yoj yibꞌanh haꞌ mar yebꞌ yibꞌanh txꞌo txꞌotxꞌ wiltuꞌan,
yikanh naj iswatxꞌqꞌabꞌ satkanh,
6 yaniko naj Komam testigohal,
Komam itzitznhetikꞌa yinh sunilbꞌal tiempo,
Komam watxꞌenhe satkanh yebꞌ sunil tzet ay satkanh,
Komam watxꞌenhe txꞌo txꞌotxꞌ yebꞌ sunil tzet ay sat txꞌotxꞌ,
Komam watxꞌenhe haꞌ mar yebꞌ sunil tzet ay xol haꞌ,
yalni naj hakaꞌ tiꞌ:
«Tinanh matxa chiꞌekꞌ tiempo,
7 yuto hayet choqꞌtzeno naj ishuj ángel istrompeta kat yijnokano isbꞌa tzet ewanyehi,
hunteqꞌan nabꞌiltikꞌa yu Komam Dios,
hakaꞌtikꞌa yu yalni Komam tet ebꞌnaj ischejabꞌ yet payat,»a
xhi naj.
8 Huneꞌ yul nuqꞌe wabꞌetikꞌahan yul satkanh,
tzotelpaxayti wetan,
yalni hakaꞌ tiꞌ:
«As ilo huneꞌ nichꞌan hum leyanayo yul isqꞌabꞌ naj ángel linhankanh yibꞌanh haꞌ mar yebꞌ yibꞌanh txꞌo txꞌotxꞌ,»
xhi wetan.
9 Intohan inqꞌannolojan huneꞌ nichꞌan hum tuꞌ tet naj,b
istaqꞌwi naj wetan:
«Ay teꞌ lah,
loto teꞌ,
hayet chalono teꞌ kaw chiꞌ chiꞌeloko yul hatiꞌ yu teꞌ,
hakaꞌ ischiꞌal noꞌ kabꞌ,
wal yul hakꞌul xin kaw kꞌah chiꞌelikoj,»
xhi naj wetan.
10 Inchahnilojan teꞌ tet naj ángel tuꞌ,
inlonitojan teꞌ,
kaw xin chiꞌeliko yul intiꞌan yu teꞌ,
wal yul inkꞌulan xin kaw kꞌah elikoj yet lahwi inlonihan teꞌ.
11 Lahwi tuꞌ yal-laxpaxo wetan:
«Kaw yilal hawalni hunelxa yinh tzet chute yalni Komam Dios yinh txꞌiꞌal ej nixhte konhobꞌ yebꞌ nimeta konhobꞌ,
yebꞌ txꞌiꞌal abꞌxubꞌal yebꞌ yinh ebꞌnaj rey,»
xhi wetan.