Ebꞌnaj kawanh yaqꞌ isbꞌa yalni Istzotiꞌ Komam Dios
11
Lahwi tuꞌ yaqꞌlax huneꞌ teꞌ ah wetan hakaꞌ hunu teꞌ malbꞌal.
Yal-lax wetan hakaꞌ tiꞌ:
«Ahanhwanoj kat hawok hamalen Yatut Komam Dios yebꞌpaxo mexha yet xahanbꞌal,
kat habꞌisni hanta mak ayikto yinoyo isbꞌa tet Komam.
2 Yajaꞌ wal yamaqꞌil yebꞌ yinhla ishoyanil mach chamale yuto chiꞌaqꞌlax tet ebꞌnaj nan konhobꞌal,
kat isxanhnayo ebꞌnaj iskonhobꞌ Komam Dios yulbꞌal 42 (iskabꞌ yoxkꞌal) ixahaw.
3 Chiwatijan kawanh inchejabꞌan chaqꞌ isbꞌa yalnilo intzotiꞌan yulbꞌal 1,260 tzꞌayik.
Ayko hunteqꞌan xilqꞌape yet bꞌiskꞌulal yinh ebꞌnaj,»
xhi wetan.
4 Yechel ebꞌnaj kawanh tiꞌ ye teꞌ kabꞌebꞌ yoj olivo yebꞌ chꞌen kabꞌebꞌ candeleroa bꞌay chiꞌahto cantil ayko sata Komam Dios,
Komam yahaw txꞌo txꞌotxꞌ.
5 Ta ay mak choche chiꞌok etloko yinh ebꞌnaj kawanh tiꞌ chiꞌelti qꞌaꞌ yul istiꞌ ebꞌnaj,
kat isnhusnikanto ebꞌnaj mak chichiwa iskꞌul yinh ebꞌnaj.
Hak tuꞌ chu iskamkanilo makta chiwatxꞌen istxꞌojal yinh ebꞌnaj.
6 Aypaxo yip ebꞌnaj ismajchen satkanh yunhe matxa chaqꞌ haꞌ nhabꞌ yulbꞌal tzꞌayik bꞌay chal ebꞌnaj Istzotiꞌ Komam.
Aypaxo yip ebꞌnaj yaniko ha haꞌ chikꞌal,
yebꞌpaxo xin ay yip ebꞌnaj yaqꞌni ekꞌoyaꞌ yanma anma ay sat txꞌo txꞌotxꞌ yu ej isyaꞌtajil,
hantatikꞌa el choche iskꞌul ebꞌnaj.
7 Hayet chilahwi yalnikꞌo ebꞌnaj kawanh tuꞌ Istzotiꞌ Komam Dios,
ay huneꞌ naj Noqꞌ isbꞌi chiꞌahilo yul huneꞌ niman xabꞌ;
chako naj howal yinh ebꞌnaj kawanh tuꞌ kat isqꞌoji naj yinh ebꞌnaj,
kat ispotxꞌlax ebꞌnaj yu naj Noqꞌ isbꞌi tuꞌ.
8 Chikankano pakꞌno isnimanil ebꞌnaj yul iscallehal huneꞌ niman konhobꞌ bꞌay alaxkanh Komam Jesucristo yinh teꞌ kulus,
Komam Yahawil ebꞌnaj.b
Huneꞌ konhobꞌ tuꞌ chal-lax Sodoma yebꞌ Egipto yinh,
haꞌ chalniloj ta txꞌoj tzet chiswatxꞌe.
9 Sunil anma nananta konhobꞌal,
nananta anmahil,
nananta yabꞌxubꞌal,
nananta nime konhobꞌal chiꞌilni isnimanil ebꞌnaj yulbꞌal yikta iskanh tzꞌayik;
mach chisje anma ta chimujlax ebꞌnaj.
10 Yuxin sunil anma yul sat yibꞌanhqꞌinal tiꞌ kaw ok yinh tzalahilal yu iskamikal ebꞌnaj.
Yaqꞌni anma sabꞌehal tet hunun yu tzalahilal,
yuto ebꞌnaj kawanh ischejabꞌ Komam tuꞌ kaw yaqꞌ ebꞌnaj ekꞌoyaꞌ yanma anma.
11 Lahwinhe yikta iskanh tzꞌayik tuꞌ,
yulkanh iskꞌul ebꞌnaj kawanh tuꞌ yu Komam Dios,
yahwano ebꞌnaj.
Haꞌ xin sunil anma ilni huneꞌ tuꞌ kaw okkano xiwkilal yinh.
12 Yabꞌen ebꞌnaj kawanh tuꞌ huneꞌ yul nuqꞌe awi yinh kaw ip yul satkanh,
yalni hakaꞌ tiꞌ:
«Ahanhweti bꞌey tiꞌ,»
xhi tet ebꞌnaj.
Isto ebꞌnaj satkanh xol huneꞌ moyan,
sunil ebꞌnaj ayko ishowal yinh ebꞌnaj ilni huneꞌ tuꞌ.
13 Yinhnhena tuꞌ yekꞌ huneꞌ niman txixkabꞌ istanhilo huneꞌ 10 (islahonhebꞌ) majan teꞌ nha yul huneꞌ niman konhobꞌ tuꞌ,
hujebꞌ mil anma kam yu huneꞌ txixkabꞌ tuꞌ.
Wal anma mach kami kaw xiwi,
yaniko ismay Komam Dios ay yul satkanh.
14 Hak tuꞌ yu yekꞌto iskabꞌ isyaꞌtajil;
tinanh xin yichixapaxiko huneꞌ isyox isyaꞌtajil.
Yet yoqꞌtzelax chꞌen ishuj trompeta
15 Hayet yoqꞌtzen naj ishuj ángel istrompeta yabꞌelax hunteqꞌan yul nuqꞌe awi yinh kaw ip yul satkanh,
yalni:
«Sunil tzet ay yip yul sat yibꞌanhqꞌinal tiꞌ chiꞌokkano yul isqꞌabꞌ Komam Dios Jahawil
yebꞌ yul isqꞌabꞌ Komam Jesucristo,
kat yokkano yahawil yinh sunilbꞌal tiempo,»
xhi.
16 Wal ebꞌnaj 24 (iskanh iskawinaj) anciano tzꞌonhan yul istzꞌonhobꞌal sata Komam Dios ay jahno ebꞌnaj,
yay xulno ebꞌnaj,
yaniko ebꞌnaj ismay Komam.
17 Yalni ebꞌnaj:
«Mam Jahawil,
hach tiꞌ koDiosalanh,
kaw aykano hawip.
Ayach tinanh,
ayach yet yalanhtokanoj yebꞌ yinh sunilbꞌal tiempo.
Chijaqꞌanh yuchꞌandiosal tawet yuto chaxhok hayébꞌaloj ta kaw aykano hawip,
yebꞌ xin kaxhichiko hawok yahawil.
18 Kaw tit ishowal ej konhobꞌ tawinh,
yajaꞌ maꞌapni istiempohal hawanayo isyaꞌtajil yibꞌanh anma.
Maꞌapnipaxo istiempohal hawilni yinh tzet chiꞌeliko ej kamom,
kat hawaqꞌni ispaj selel tet ebꞌnaj hachejabꞌ halni Hatzotiꞌ.
Chawaqꞌnipaxo ispaj selel tet sunil mak hawetxa yehi yebꞌ makta chixiw tawet,
makta ay yelapnoj,
yebꞌ makta mach yelapnoj,
kat hatanhtzenkanilo makta chiꞌetanto txꞌo txꞌotxꞌ,»
xhi ebꞌnaj.
19 Lahwi tuꞌ,
ishajni isbꞌa Yatut Komam Dios yul satkanh,
chixin jilikto huneꞌ Kaxha yet istrato Komam ayikto yul yatut tuꞌ.
Yichiko isjepla kꞌuh,
isqꞌanhi satkanh,
isnhirlapaxoj,
yekꞌ huneꞌ txixkabꞌ,
yaqꞌnipaxo huneꞌ niman sajbꞌat.