Huneꞌ ix ix yebꞌ huneꞌ mak hakaꞌ noꞌ dragón
12
Lahwi tuꞌ xin,
isyeni isbꞌa huneꞌ niman yechel yul satkanh.
Wilnihan huneꞌ ix ix hoyaniko isqꞌaqꞌal tzꞌayik yinh hakaꞌ xilqꞌape,
ayayo ixahaw yalanh yoj ix,
ayko xin kabꞌlahonhebꞌ txꞌumel iscoronaho ix yinh iswiꞌ.
2 Huneꞌ ix tuꞌ ayxa tzet ye ix,
kaw xin chiꞌawi ix yu isyaꞌil yuto iswatxꞌixa iskꞌul ix.
3 Isyenipaxokanh isbꞌa huneꞌxa yechel yul satkanh,
wilnihan huneꞌ mak hakaꞌ noꞌ nimeta dragón kajinh,
hujebꞌ iswiꞌ yebꞌ xin 10 (lahonhebꞌ) yukꞌaꞌ,
ayahto xin corona yinh hunun iswiꞌ noꞌ.
4 Huneꞌ xin isyox majan txꞌumel isnhikꞌti noꞌ yu isnhe,
isqꞌojnayti noꞌ sat txꞌo txꞌotxꞌ tiꞌ.
Islinhbꞌakanh isbꞌa noꞌ sata ix iswatxꞌixa iskꞌul tuꞌ yunhe iskꞌuxnayto noꞌ nichꞌan unin tuꞌ yet chipitzkꞌahi.
5 Lahwi tuꞌ ispitzkꞌa nichꞌan iswinaj unin ix.
Haꞌ naj tuꞌ xin chiꞌok yahawilo sunil ej konhobꞌ,
ayko xin huneꞌ isvara naj nabꞌa hierro yul isqꞌabꞌ;
yaj ilaxilo nichꞌan yunin ix tuꞌ,
yilaxto tet Komam Dios bꞌay ay istzꞌonhobꞌal.
6 Wal ix tuꞌ elkanh ix,
isto ix bꞌey txꞌotxꞌ desierto.
Haꞌ bꞌey tuꞌ kꞌulxa ye huneꞌ yehobꞌal ix yu Komam,
yaqꞌlax tzet chislo ix yulbꞌal 1,260 tzꞌayik.
7 Lahwi tuꞌ yok huneꞌ niman howal yul satkanh.
Naj ángel Miguel yebꞌ ebꞌnaj ángel tzujan yintaj,
yaqꞌle ebꞌnaj howal yebꞌ noꞌ dragón yebꞌ yángel noꞌ.
8 Yajaꞌ xin mach qꞌoji noꞌ dragón tuꞌ yebꞌ yángel,
matxapaxo xin hamanil tet noꞌ yebꞌ yángel yul satkanh.
9 Hak tuꞌ xin yu yilaxilti noꞌ dragón tuꞌ yul satkanh.
Haꞌ ton huneꞌ mak tuꞌ yuteko isbꞌa labꞌahil yet payat,
chihal-lax Diablohal yebꞌ Satanás,
haꞌ xin chꞌaqꞌni subꞌchaho anma ay yul sat yibꞌanhqꞌinal tiꞌ.
Qꞌojlaxayti noꞌ dragón tuꞌ yebꞌ yángela sat txꞌo txꞌotxꞌ.
10 Lahwi tuꞌ,
wabꞌenan huneꞌ yul nuqꞌe yul satkanh yinh kaw ip,
yalni hakaꞌ tiꞌ:
«Wal tinanh mahul kolbꞌanile,
chisyelo Komam Dios yip kat yok yahawil,
kat isyelaxpaxilo yip Komam Cristo,
yuto xaqꞌojlaxayto naj aqꞌomkꞌule yinh ebꞌnaj juxhtaj yebꞌ yinh ebꞌix janabꞌ,
naj aytikꞌako aqꞌokꞌule hunun tzꞌayik yebꞌ hunun aqꞌbꞌal tet Komam Dios.b
11 Xaqꞌoji ebꞌnaj juxhta yinh naj yu ischikꞌil Komam ok xahanbꞌalil,
yebꞌ yu Istzotiꞌ Komam yalikꞌo ebꞌnaj.
Mach xiw ebꞌnaj yaniko isbꞌa yul isqꞌabꞌ kamikal,
to kaw ishin isbꞌa ebꞌnaj iskami.
12 ¡Yuxin tzalahojabꞌ satkanh yebꞌ mak ay yul satkanh!
Yajaꞌ kꞌanchꞌan hex ay hex sat txꞌo txꞌotxꞌ yebꞌ tzet ay xol haꞌ mar,
yuto sunil ishowal naj matzwalil maꞌayapno texol,
yuto yohta naj ta hanikꞌxanhe tiempo aykꞌo naj,»
xhihaytij.
13 Hayet yilni noꞌ dragón tuꞌ ta qꞌojlaxayti noꞌ sat txꞌotxꞌ,
yok noꞌ istzumbꞌenokꞌo ix pitzkꞌa nichꞌan iswinaj unin tuꞌ.
14 Yajaꞌ xin aqꞌlax kabꞌebꞌ isxikꞌ ix kaw nimej hakaꞌ xikꞌ noꞌ tꞌiw,
yah ix satkanh,
isto ix bꞌey txꞌotxꞌ desierto bꞌay ay huneꞌ yehobꞌal ix yu Komam,
yunhe nahat chiꞌelkano ix tet noꞌ dragón tuꞌ.
Haꞌ tuꞌ xin aqꞌlax tzet chislo ix yulbꞌal yikta iskanh tiempo.c
15 Wal noꞌ dragón tuꞌ yalti noꞌ huneꞌ niman haꞌ yul istiꞌ yunhe yijlaxto ix yu haꞌ niman haꞌ tuꞌ.
16 Yajaꞌ xin kolwa txꞌo txꞌotxꞌ yinh ix,
yuto yukꞌto txꞌotxꞌ haꞌ yalti noꞌ yul istiꞌ.
17 Kaw tit ishowal noꞌ dragón tuꞌ yinh ix,
isto noꞌ yanoko howal yinh hunteqꞌan yunin ix,
haꞌ ton mak chiyijen ischejbꞌanil Komam Dios yebꞌ ebꞌnaj chibꞌeybꞌalnhe iskuybꞌanil Komam Jesucristo.d