Kawanh ebꞌnaj Noqꞌ isbꞌi
13
Lahwi tuꞌ isto noꞌ dragón islinhbꞌanokanh isbꞌa xol arena istiꞌ haꞌ mar.
Wilnihan yahilo huneꞌ mak Noqꞌ isbꞌia xol haꞌ mar tuꞌ,
hujebꞌ iswiꞌ,
10 (lahonhebꞌ) xin yukꞌaꞌ.
Ayahto hunun iscorona hunun yukꞌaꞌ mak Noqꞌ isbꞌi tuꞌ.
Yinh hunun iswiꞌ tuꞌ tzꞌibꞌnhebꞌiliko huneꞌ bꞌihe,
txꞌoj istzotel yinh Komam Dios.
2 Huneꞌ mak Noqꞌ isbꞌi wiltuꞌan,
lahan jilni yebꞌ noꞌ nime tzꞌibꞌinh bꞌalam,b
wal yoj xin lahan jilni yebꞌ yoj noꞌ oso,
haxa istiꞌ lahan jilni hakaꞌ istiꞌ noꞌ bꞌalam.
Yaqꞌni noꞌ dragón tuꞌ sunil yip yebꞌ istzꞌonhobꞌal,
yebꞌ iskanhil ye tet huneꞌ mak Noqꞌ isbꞌi tuꞌ.
3 Ay xin huneꞌ iswiꞌ mak Noqꞌ isbꞌi tuꞌ,
ayko huneꞌ islahwilal chiꞌaqꞌnikamoj,
yajaꞌ xin anhcha islahwilal.
Kaw xin kꞌayilo iskꞌul sunil anma ay yul sat yibꞌanhqꞌinal tiꞌ yu huneꞌ tuꞌ.
Yok tzujno anma yinta huneꞌ mak Noqꞌ isbꞌi tuꞌ.
4 Yok anma yinoyo isbꞌa tet noꞌ dragón yuto haꞌ aqꞌnhe yip naj Noqꞌ isbꞌi.
Yokpaxo anma yinoyo isbꞌa tet naj Noqꞌ isbꞌi tuꞌ,
chalni anma hakaꞌ tiꞌ:
«¿Mak hunu chu islahbꞌan isbꞌa yebꞌ huneꞌ mak Noqꞌ isbꞌi tiꞌ,
yebꞌ maktaxka chu yaqꞌlen howal yebꞌi?»
xhi anma.
5 Huneꞌ mak Noqꞌ isbꞌi tuꞌ chahlax tzoteloj,
isloloꞌnhen isbꞌa yalni nimeta tzotiꞌ,
yalnipaxo tzotiꞌ txꞌoj yinh Komam Dios.
Yaqꞌlaxpaxo yip yok yahawilo yulbꞌal 42 (iskabꞌ yoxkꞌal) ixahaw.
6 Yok yalno tzotiꞌ txꞌoj yinh Komam Dios,c
isbꞌahwapaxo yinh isbꞌi Komam,
yebꞌ yinh Yatut Komam,
yebꞌ yinh mak ay yul satkanh.
7 Ischahlaxpaxo yaniko naj howal yinh sunil makta yetxa Komam Dios,
isqꞌoji naj yinh.d
Yaqꞌlaxpaxo yip naj yibꞌanh sunil anma,
yibꞌanh ej konhobꞌ,
yibꞌanh ej anma nananta yabꞌxubꞌal,
yebꞌ yibꞌanh ej nime konhobꞌ.
8 Yinayo isbꞌa sunil anma ay yul sat yibꞌanhqꞌinal tiꞌ tet naj Noqꞌ isbꞌi tuꞌ,
haꞌ ton mak yettaxtikꞌa iswatxꞌi yul sat yibꞌanhqꞌinal tiꞌ mach ayoyo isbꞌi yul teꞌ hum yet qꞌinalee yet Komam ok xahanbꞌalil.
9 Makex cheyabꞌe huneꞌ tiꞌ aqꞌwe heyanma hetxumniloj:
10 Mak yetxatikꞌa isto preso,
chiꞌilaxto preso,
mak yetxatikꞌa ispotxꞌlax yu chꞌen espada,
chipotxꞌlax yu chꞌen espada.f
Yuxin hanhonh yuninal Komam Dios honh tiꞌ,
kaw yilal janiko janma yinh Komam,
yebꞌ niman chijute kokꞌul jaqꞌni techaho isyaꞌtajil.
11 Lahwi tuꞌ xin wilnihan yahilo huneꞌxa mak hakaꞌ hunu noꞌ niman noqꞌ yul txꞌotxꞌ.
Huneꞌ no noqꞌ tuꞌ ay kabꞌebꞌ yukꞌaꞌ noꞌ lahan jilni yebꞌ yukꞌaꞌ noꞌ Meꞌ.
Hakaꞌ xin istzotel noꞌ dragón hak tuꞌ istzotel noꞌ.
12 Kaw xin lahan yip noꞌ yebꞌ noꞌ bꞌabꞌel,
chisyenilo noꞌ yip yunhe isyijelax tet noꞌ bꞌabꞌel tuꞌ.
Hak tuꞌ xin sunil anma yul sat yibꞌanhqꞌinal tiꞌ chiyo isbꞌa tet noꞌ bꞌabꞌel tuꞌ,
noꞌ anhcha huneꞌ islahwilal.
13 Chisyeni noꞌ iskabꞌ tuꞌ hunteqꞌan nimeta kꞌaybꞌalkꞌule,
yebꞌ chu yinayti noꞌ qꞌa qꞌaꞌ satkanh yibꞌanh txꞌo txꞌotxꞌ yinh sat sunil anma.
14 Hak tuꞌ xin chu yaqꞌni subꞌchaho noꞌ anma yu hunteqꞌan kꞌaybꞌalkꞌule chiꞌaqꞌlax iswatxꞌeꞌ noꞌ yinh sat noꞌ bꞌabꞌel tuꞌ.
Ischejni noꞌ iskabꞌ tuꞌ sunil anma ay sat txꞌo txꞌotxꞌ iswatxꞌeno huneꞌ yechel noꞌ lahwina yu chꞌen espada,
yaj itzitztopaxoj.
15 Yaqꞌlax yip noꞌ iskabꞌ tuꞌ yaqꞌni isqꞌinal yechel noꞌ bꞌabꞌel tuꞌ yunhe istzoteli yebꞌ yu yaqꞌnikamo makta mach chiyo isbꞌa tet yechel noꞌ bꞌabꞌel tuꞌ.
16 Ischejni noꞌ yalaxoko yechel anma yinh iswatxꞌqꞌabꞌ maka yinh ispalanh.
Kaw sunil anma okkano yechel,
nixhte unin yebꞌ ichamta anma,
anma qꞌalom yebꞌ anma mebꞌaꞌ,
anma chejabꞌ yebꞌ anma yet isbꞌa ischukil.
17 Machi xin hunu mak chu isloqꞌwi yebꞌ istxonhwi ta mach ayoko yechel noꞌ yinh,
huneꞌ yechel tuꞌ haꞌ ton isbꞌi noꞌ,
maka isnumerohal isbꞌi noꞌ.
18 Huneꞌ tiꞌ choche yitzꞌatil wiꞌe.
Haꞌ mak ay yitzꞌatil iswiꞌ,
istxumabꞌilo yinh tzet yelapno isnumerohal mak Noqꞌ isbꞌi.
Huneꞌ numero tuꞌ isnumero anma yehi,
haꞌ ton numero 666.