Huneꞌ akꞌ bꞌit yako ebꞌnaj 144 mil
14
Lahwi tuꞌ wilnihan Komam ok xahanbꞌalil linhankanh yibꞌanh iswiꞌ witz Sión;
ayko 144 mil anma iskꞌatanh.
Tzꞌibꞌnhebꞌiliko isbꞌi Komam ok xahanbꞌalil yebꞌ isbꞌi Ismam Komam ok xahanbꞌalil tuꞌ yinh ispalanh hunteqꞌan anma tuꞌ.
2 Wabꞌenan huneꞌ yul nuqꞌe yul satkanh hakaꞌ isbꞌili haꞌ nime haꞌ,
yebꞌ hakaꞌ isnhirla kꞌuh,
yebꞌ hakaꞌ yet kaw txꞌiꞌal mak chiꞌaniko teꞌ arpa.
3 Chaniko huneꞌ akꞌ bꞌit sata istzꞌonhobꞌal Komam Dios,
yebꞌ sata ebꞌnaj kanhwanh querubín,
yebꞌ sata ebꞌnaj anciano.
Kaw xin machi hunu mak chu iskuyni huneꞌ bꞌit tuꞌ,
kachannhe ebꞌnaj 144 mil kolchalo xol anma ay yul sat yibꞌanhqꞌinal tiꞌ.
4 Hunteqꞌan ebꞌnaj tuꞌ,
maxhtikꞌa hunu ix yiqꞌ ebꞌnaj,
machi hunu mule iswatxꞌe ebꞌnaj yebꞌ hunu ix.
Kaw tzujannhetikꞌa ebꞌnaj yinta Komam ok xahanbꞌalil bꞌayxanhetuꞌwal chꞌekꞌ Komam.
Ebꞌnaj tuꞌ kolchalo ebꞌnaj xol anma,
yuxin lahan ebꞌnaj hakaꞌ bꞌabꞌel sat tzꞌunubꞌ chiꞌaqꞌlax tet Komam Dios yebꞌ tet Komam ok xahanbꞌalil.
5 Kaw machi nichꞌano leqꞌtiꞌal ilchalo yinh ebꞌnaj,
kaw machi nichꞌano ismul ebꞌnaj sata Komam Dios.
Chejbꞌanile yal ebꞌnaj oxwanh ángel
6 Lahwi tuꞌ wilnihan huneꞌxa naj ángel chiꞌekꞌ yiktabꞌal satkanh,
iqꞌbꞌil Tzotiꞌ yet kolbꞌanile mach istanhbꞌal yu naj yu yalnikꞌo naj tet anma ay yul sat yibꞌanhqꞌinal tiꞌ;
tzijxanhe nime konhobꞌal,
tzijxanhe anmahil,
tzijxanhe abꞌxubꞌal chala,
yebꞌ tzijxanhe nixhte konhobꞌal.
7 Chalni naj ángel tuꞌ yinh kaw ip:
«Xiwanhwe tet Komam Dios kat heyaniko ismay,
yuto maꞌapni yorahil yilni Komam yinh tzet chiꞌeliko anma.
Iweyo hebꞌa tet Komam watxꞌenhe satkanh yebꞌ txꞌo txꞌotxꞌ yebꞌ haꞌ mar yebꞌ ej isnuqꞌ ha haꞌ,»
xhi naj.
8 Tzujan huneꞌxa naj ángel yinta naj bꞌabꞌel tuꞌ,
yalni naj iskabꞌ tuꞌ:
«Wal tinanh maꞌaykꞌay niman konhobꞌ Babilonia,
yuto haꞌ ok ukꞌtzenokanh sunil ej konhobꞌ yu istxꞌojal iswiꞌ yinh ixloj yebꞌ yinh winajloj,»
xhi naj.
9 Tzujanxa xin yalni huneꞌxa naj yox ángel yinh kaw ip:
«Ta ay mak chiyiyo isbꞌa tet naj Noqꞌ isbꞌi yebꞌ tet yechel naj,
kat ischahniko yechel isbꞌi naj yinh ispalanh maka yinh isqꞌabꞌ,
10 chitit huneꞌ niman isyaꞌtajil yibꞌanh yu Komam Dios.
Hakaꞌ vino kaw how chiꞌukꞌlaxi kaw machi nino issomil ayayto xol,
hak tuꞌ ishowal Komam Dios chiꞌay yibꞌanh hunteqꞌan anma tuꞌ.
Chiꞌaqꞌlax ekꞌoyaꞌ yanma xol qꞌa qꞌaꞌ yebꞌ azufre yinh sat sunil ebꞌnaj yángel Komam Dios,
yebꞌ yinh sat Komam ok xahanbꞌalil.
11 Huneꞌ bꞌay chiꞌaqꞌlax ekꞌoyaꞌ yanma ebꞌnaj tuꞌ aynhetikꞌako yah isnhubꞌal yinh sunilbꞌal tiempo.
Tzꞌayik,
aqꞌbꞌal machi nino xewilal chiꞌaqꞌlax tet makta chiyo isbꞌa tet naj Noqꞌ isbꞌi tuꞌ yebꞌ chiyo isbꞌa tet yechel naj,
yebꞌ chichahni yechel isbꞌi naj yinh ispalanh maka yinh isqꞌabꞌ,»
xhi naj.
12 Yuxin sunil makta yetxa Komam Dios yehi,
makta chiyijen ischejbꞌanil Komam yebꞌ chako yanma yinh Komam Jesús,
yilal niman chute iskꞌul yaqꞌni techahoj.
13 Lahwi tuꞌ wabꞌenan huneꞌ yul nuqꞌe awi yul satkanh,
yalni wetan hakaꞌ tiꞌ:
—Tzꞌibꞌnhekano huneꞌ tiꞌ:
“Saqꞌal yet mak chikam yinh ismunil Komam Dios yinh tzꞌayik chihul kosata tiꞌ,”
xhi.
Yalnipaxo Komam Espíritu hakaꞌ tiꞌ:
“Hoꞌ kaw yeli,
hunteqꞌan anma chikam tuꞌ chixew yinh sunil ismunil.
Sunil iskꞌulal iswatxꞌe yul sat yibꞌanhqꞌinal tiꞌ chiꞌaqꞌlax ispaj selel tet yu Komam Dios,”
xhi Komam Espíritu,
xhi yul satkanh.
Huneꞌ hakaꞌ yet chiꞌilaxkanh sat tzꞌunubꞌ chu sat txꞌo txꞌotxꞌ tiꞌ
14 Lahwi tuꞌ wilnihan huneꞌ moyan kaw saj,
tzꞌonhanayo huneꞌ mak hakaꞌ anma jilni yibꞌanh huneꞌ moyan tuꞌ.
Ayahto huneꞌ corona nabꞌa oro yinh iswiꞌ,
iqꞌbꞌil huneꞌ chꞌen kꞌupbꞌal trigo yu,
kaw ayahti yeh.
15 Lahwi tuꞌ yelti huneꞌxa naj ángel yul Yatut Komam Dios,
yahwi naj yinh kaw ip tet mak tzꞌonhanayo yibꞌanh huneꞌ moyan tuꞌ hakaꞌ tiꞌ:
«Okanh hakꞌupukanh ixim trigo,
yuto qꞌanxa ixim,
istiempohalxa iskꞌuplaxkanh ixim sat txꞌo txꞌotxꞌ,»
xhi naj.
16 Yinhnhena tuꞌ yanikto huneꞌ mak tzꞌonhanayo yibꞌanh moyan tuꞌ iskꞌupom trigo xol ixim,
iskꞌupnikanh naj ixim trigo sat txꞌo txꞌotxꞌ tiꞌ.
17 Lahwi tuꞌ yelilo huneꞌxa naj ángel yul Yatut Komam Dios yul satkanh,
yetbꞌipaxo naj huneꞌ chꞌen kꞌupbꞌal uva kaw ay yeh.
18 Yelpaxilo huneꞌxa naj ángel bꞌay ay mexha yet xahanbꞌal,
huneꞌ naj ángel tuꞌ ay yip naj yibꞌanh qꞌa qꞌaꞌ.
Yahwi naj yinh kaw ip tet naj iqꞌnhe chꞌen kꞌupom uva:
«Akto haꞌ kꞌupom uva xol teꞌ uva ay sat txꞌo txꞌotxꞌ kat hakꞌupnilo teꞌ,
yuto qꞌanxa teꞌ,»
xhi naj.
19 Yok naj ángel tuꞌ iskꞌupno sunil teꞌ uva ay sat txꞌo txꞌotxꞌ tiꞌ,
yanayto naj teꞌ yul huneꞌ niman bꞌay chixanhlaxilti yal teꞌ.
Huneꞌ tiꞌ chal yelapno yinh huneꞌ niman isyaꞌtajil chitit yu Komam Dios.
20 Haꞌ xin istxam konhobꞌ xanhlaxilti yal teꞌ uva tuꞌ,
yelilo chikꞌ bꞌay yatzꞌlax yal teꞌ,
isto lehno chikꞌ tuꞌ,
kaw nahat ah ispimal,
ahapno yinh istiꞌ noꞌ cheh bꞌay kachan yekꞌ isfreno noꞌ,
wal bꞌay to lehno chikꞌ tuꞌ aymi hunu 80 (iskanhwinaj) legua yukoj.