Ebꞌnaj ángel iqꞌnhe hujebꞌ majan islahobꞌal isyaꞌtajil
15
Wilnihan huneꞌxa yechel yul satkanh,
kaw ay yelapnoj yebꞌ kaw kꞌaybꞌalkꞌule jilni.
Wilan hujwanh ebꞌnaj ángel iqꞌnhe hujebꞌ majan islahobꞌal isyaꞌtajil,
haꞌ yinh hunteqꞌan isyaꞌtajil tuꞌ bꞌay chiyijkano isbꞌa ishowal Komam Dios.
2 Wilnipaxojan huneꞌ hakaꞌ haꞌ mar leyantoj,
hakaꞌ chꞌen vidrio jilni,
soman ye yebꞌ qꞌa qꞌaꞌ.
Ay xin hunteqꞌan anma linhankanh yibꞌanh huneꞌ hakaꞌ haꞌ mar tuꞌ,
iqꞌbꞌil yarpa aqꞌbꞌil yu Komam Dios.
Hunteqꞌan anma tuꞌ haꞌ ton sunil mak qꞌoji yinh naj Noqꞌ isbꞌi yebꞌ yinh yechel naj,
yebꞌ yinh isnumerohal isbꞌi naj.
3 Chaniko anma tuꞌ isbꞌit yaꞌ Moisés ischejabꞌ Komam Dios,
yebꞌ isbꞌit Komam ok xahanbꞌalil,
chalni anma hakaꞌ tiꞌ:
«Hach Jahawil,
yebꞌ hach koDiosalanh kaw sunil tzettaj ye tuꞌ chisje hawatxꞌeni.
Kaw aykano yelapno sunil tzet ye tuꞌ watxꞌebꞌil hawu yebꞌ chikꞌay kokꞌul jilni.
Kaw tohol yebꞌ kaw tꞌinhankano habꞌeybꞌal.
Hach tiꞌ Rey hach yinh sunil ej konhobꞌ.
4 Mam Jahawil,
kaw sunil anma chixiw tawet kat yaniko hamay,
yuto hachnhechꞌan kaw kꞌulach,
machi nichꞌano istxꞌojal tawinh.
Chitit anma yul hunun konhobꞌ kat yinayo isbꞌa tasataj,
yuto maxawil yinh istoholal yinh tzet chiꞌeliko anma,»a
xhi anma tuꞌ.
5 Lahwi tuꞌ wilnihan ishajni isbꞌa Yatut Komam Dios yul satkanh,
huneꞌ bꞌay kꞌuwan istrato Komam Dios.
6 Yul Yatut Komam tuꞌ elilo hujwanh ebꞌnaj ángel yebꞌ hujebꞌ majan isyaꞌtajil.
Kaw saj ye qꞌap lino ayko xilo isqꞌap ebꞌnaj,
kaw xin chitzejtzoni,
yebꞌ xin nabꞌa oro issincho ebꞌnaj aykoj,
nime ispaqꞌo sat chiꞌahapno yalanh istxam iskꞌul ebꞌnaj.
7 Huneꞌ naj xol ebꞌnaj kanhwanh querubín aqꞌni hunun vaso nabꞌa oro tet hunun ebꞌnaj hujwanh ángel tuꞌ.
Hunteqꞌan vaso tuꞌ nohna yu ishowal Komam Dios,
Komam itzitznhetikꞌa yinh sunilbꞌal tiempo.
8 Kaw nohilo yul Yatut Komam Dios tuꞌ yu nhubꞌ yu isqꞌaqꞌal yip Komam.
Machi xin hunu mak chu yokto bꞌey tuꞌ masanta chijkano isbꞌa hujebꞌ majan isyaꞌtajil iqꞌbꞌil yu ebꞌnaj hujwanh ángel tuꞌ.