Hunteqꞌan vaso bꞌay ayayto ishowal Komam Dios
16
Lahwi tuꞌ wabꞌenan yelilti yaw huneꞌ yul nuqꞌe yinh kaw ip yul Yatut Komam Dios,
yalni tet ebꞌnaj hujwanh ángel:
«As jobꞌweyo ishowal Komam Dios ayayto yul hunun vaso tiꞌ yibꞌanh txꞌo txꞌotxꞌ,»
xhi.
2 Isto naj bꞌabꞌel ángel isjobꞌnoyo ishowal Komam ayayto yul isvaso yibꞌanh txꞌo txꞌotxꞌ.
Yelilo hunteqꞌan yabꞌil kaw how yebꞌ kaw txꞌoj yinh isnimanil anma ayko yechel naj Noqꞌ isbꞌi yinh,
yebꞌ makta yiyo isbꞌa tet yechel naj.
3 Lahwi tuꞌ isjobꞌnayo naj iskabꞌ ángel ishowal Komam ayayto yul isvaso yibꞌanh haꞌ mar,
yinhnhena tuꞌ xin,
iskajponhilo haꞌ hakaꞌ ischikꞌil hunu mak chipotxꞌlaxkamoj.
Iskamilo sunil no noqꞌ itzitz ay xol haꞌ.
4 Lahwi tuꞌ isjobꞌnayo naj yox ángel ishowal Komam Dios ayayto yul isvaso yibꞌanh ej haꞌ nimeta haꞌ,
yebꞌ yibꞌanh isnuqꞌ ha haꞌ,
ismeltzoko haꞌ chikꞌal.
5 Wabꞌenan yalni naj yahawil ha haꞌ:
«Mamin,
hach tiꞌ Dios hach,
machi nino istxꞌojal ayko tawinh.
Ayach tinanh yebꞌ xin ayachxatikꞌa yet yalanhtokanoj.
Hach tiꞌ kaw istoholal chawatxꞌe,
yuto maxawil yinh tzet chiꞌeliko anma tiꞌ.
6 Yuto haꞌ hunteqꞌan anma tiꞌ malnito ischikꞌil hunteqꞌan
mak hawetxa yehi yebꞌ ebꞌnaj hachejabꞌ halni hatzotiꞌ.
Tinanh xin yet ay anma tiꞌ hawaqꞌni chikꞌ yukꞌuꞌ,»
xhi naj.
7 Wabꞌenpaxojan yal-lax bꞌay ay ismexhahil xahanbꞌal hakaꞌ tiꞌ:
«Hoꞌ Mamin,
sunil chu hawu.
Hach tiꞌ xin chawil yinh istoholal yebꞌ isyelal yinh tzet chiꞌeliko anma,»
xhi.
8 Isjobꞌnayo naj iskanh ángel ishowal Komam Dios ayayto yul isvaso yibꞌanh tzꞌayik,
yaqꞌlax yip yoj tzꞌayik tuꞌ isnhusnito anma.
9 Kaw tzꞌato anma yu isqꞌaqꞌal tzꞌayik tuꞌ,
yajaꞌ maxhtikꞌa isnah isbꞌa,
yebꞌ maxhtikꞌa yiyo isbꞌa tet Komam Dios.
Wal xin ok anma bꞌuchwal yinh Komam,
Komam ay yip yibꞌanh hunteqꞌan isyaꞌtajil tiꞌ.
10 Isjobꞌnayo naj ishoꞌ ángel ishowal Komam Dios ayayto yul isvaso yibꞌanh bꞌay tzꞌonhan naj Noqꞌ isbꞌi,
iskan sunil tzet ayko yalanh yip naj yinh qꞌejholo.
Kaw xin chiskachꞌ yaqꞌ anma yu isyaꞌtajil;
11 yajaꞌ maxhtikꞌa isbꞌejkano anma iswatxꞌen istxꞌojal.
Wal xin ok anma yalaꞌ tzotiꞌ txꞌoj yinh Komam Dios yu isyaꞌil isyaꞌtajil,
yebꞌ yu hunteqꞌan howla yabꞌil elilo yinh.
12 Isjobꞌnayo naj iswaj ángel ishowal Komam Dios yayto yul isvaso yibꞌanh haꞌ niman Éufrates.
Istajkanh haꞌ yunhe iskankano isbꞌeh haꞌ isbꞌeho ebꞌnaj rey chitit bꞌay chiꞌahilo tzꞌayik.
13 Wilnihan oxwanh espíritu kaw machiswalil hakaꞌ jilni noꞌ pahtzaꞌ.
Huneꞌ elti yul istiꞌ naj chiyij dragón,
huneꞌxa elti yul istiꞌ naj Noqꞌ isbꞌi,
huneꞌxa xin elti yul istiꞌ naj chisbꞌaliko isbꞌa ischejabꞌo Komam Dios.
14 Hunteqꞌan espíritu tuꞌ yet naj matzwalil yehi,
chisye hunteqꞌan kꞌaybꞌalkꞌule.
Isto hunteqꞌan espíritu tuꞌ yul sat yibꞌanhqꞌinal,
yok iskutxbꞌaniko sunil ebꞌnaj rey yinh howal yinh huneꞌ tzꞌayik kaw ay yelapno yet Komam Dios,
Komam kaw aykano yip.
15 Yalni Komam ok xahanbꞌalil hakaꞌ tiꞌ:
«Abꞌewe tzet chiwalan,
chinapni lemnahan hakaꞌ chiyu yapni hunu elqꞌom.
Saqꞌal yet mak chimajwahi yebꞌ chisyaꞌilnhe xil isqꞌap yunhe mach chiꞌekꞌ tꞌiltꞌoni kat yel istxꞌixobꞌal sata anma,»
xhi Komam.
16 Hunteqꞌan espíritu machiswalil tuꞌ haꞌ kutxbꞌaniko ebꞌnaj rey sat huneꞌ txꞌo txꞌotxꞌ chiyij Armagedón yinh abꞌxubꞌal hebreo.a
17 Isjobꞌnayo naj ishuj ángel ishowal Komam Dios ayayto yul isvaso xol jaqꞌeqꞌ.
Wabꞌenan huneꞌ yul nuqꞌe yinh kaw ip elti yul Yatut Komam Dios bꞌay ay istzꞌonhobꞌal,
yalni hakaꞌ tiꞌ:
«Wal tinanh mayijkano isbꞌa sunil,»
xhi.
18 Lahwi tuꞌ isjeplahi,
isnhirlapaxoj,
isqꞌanhipaxoj,
isbꞌili txꞌo txꞌotxꞌ yu huneꞌ niman txixkabꞌ.
Maxhtotikꞌa xin hunu txixkabꞌ chiꞌekꞌ hakaꞌ huneꞌ tuꞌ yichitax ispitzkꞌa anma yul sat yibꞌanhqꞌinal tiꞌ.
19 Wal huneꞌ niman konhobꞌ kaw oxebꞌ ayikoj,
yaykꞌay sunil ej konhobꞌ ay yul sat yibꞌanhqꞌinal tiꞌ.
Isnahniti Komam Dios niman konhobꞌ Babilonia istit ishowal Komam yinh,
yaniti Komam isyaꞌtajil yibꞌanh hakaꞌtanhe aqꞌlax vino kaw how yukꞌuꞌ.b
20 Sunil konhobꞌ ayayo xol haꞌ mar yebꞌ xin ej witz kꞌaykanokanh.
21 Istit nimeta sajbꞌat yul satkanh yibꞌanh anma,
aymi hunu quintal yalil hunun chꞌen.
Yok anma istzꞌaktiꞌnhen Komam Dios yu chꞌen sajbꞌat tuꞌ,
yuto kaw aqꞌlax ekꞌoyaꞌ yanma anma.