3 Yinh huneꞌ isye Komam Espíritu wettuꞌan,

wilan kinyinitojan naj ángel tuꞌ bꞌey txꞌotxꞌ desierto.

Wilnihan huneꞌ ix ix ayahto yibꞌanh huneꞌ noꞌ niman noqꞌ.

Huneꞌ no noqꞌ tuꞌ kajinh yinh noꞌ,

hantanhe xin hunteqꞌan bꞌihe txꞌoj istzotel yinh Komam Dios ayko yinh noꞌ,

hujebꞌ xin iswiꞌ noꞌ,

yebꞌ 10 (lahonhebꞌ) yukꞌaꞌ noꞌ.

4 Huneꞌ ix ix tuꞌ kajmutzꞌmunhe yebꞌ kajyolyonhe jilni xil isqꞌap ix,

hantanhe xin yelawil aykoj;

ayko chꞌen oro yebꞌ chꞌen perla yelawiloj,

yebꞌ hunteqꞌan chꞌen chꞌen kꞌulchꞌan jilni.

Iqꞌbꞌil xin huneꞌ chꞌen vaso nabꞌa oro yu ix,

nohna yu sunil isyahbꞌetajil yebꞌ mule chiswatxꞌe ix.

5 Tzꞌibꞌnhebꞌiliko huneꞌ bꞌihe yinh ispalanh ix,

machi mak ohtanhe,

chalni hakaꞌ tiꞌ:

«Huneꞌ niman konhobꞌ Babilonia,

miꞌe yinh sunil ebꞌix txꞌoj ye iswiꞌ yebꞌ sunil tzet machiswalil ay yul sat yibꞌanhqꞌinal tiꞌ,»

xhikoj.

6 Haxa wilnihan xin kaw ukꞌum ix yu ischikꞌil ebꞌnaj yetxa Komam Dios potxꞌbꞌilkamoj,

yebꞌ yu ischikꞌil ebꞌnaj yaqꞌ isbꞌa testigohal yinh Komam Jesús.

Kaw xin kꞌayilo inkꞌulan yet wilnihan ix.

7 Yalni naj ángel wetan:

«¿Tzet yinh xin kaw chikꞌayilo hakꞌul hawilni ix?

Wal xin chiwalan tawet yinh tzet yelapno ye huneꞌ ix tiꞌ yebꞌ no noqꞌ hujebꞌ iswiꞌ yebꞌ 10 (lahonhebꞌ) yukꞌaꞌ ayikto yalanh ix.

8 No noqꞌ maxawil tuꞌ,

haꞌ ton huneꞌ naj aytikꞌa yet payxa,

yajaꞌ matxa naj aykꞌo tinanh,

yaj chiꞌahilo naj yul huneꞌ niman xabꞌ yet yalanhto maxhto chitokano naj yinh isyaꞌtajil.

Haxa anma ay sat txꞌo txꞌotxꞌ tiꞌ,

hunteqꞌan mach ayayo isbꞌi yul teꞌ hum yet qꞌinale mach istanhbꞌal yettaxtikꞌa iswatxꞌi huneꞌ yul sat yibꞌanhqꞌinal tiꞌ,

kaw chikꞌay iskꞌul yilni naj Noqꞌ isbꞌi tuꞌ,

naj aytikꞌa payxa,

yajaꞌ machi naj tinanh,

yajaꞌ xin chihulupaxoj.

9 »Mak ay yitzꞌatil iswiꞌ,

istxumabꞌilo huneꞌ tiꞌ:

Haꞌ hujebꞌ iswiꞌ noꞌ tuꞌ,

yechel hujebꞌ witz bꞌay tzꞌonhan ix ix tuꞌ,

yechelpaxo hujwanh ebꞌnaj yahawil konhobꞌ yehi.

10 Howanh ebꞌnaj yahawil tuꞌ xatanhiloj,

huneꞌ naj xin ayko yahawil tinanh,

hunxa naj xin chiꞌok naj yahawilo tzujanilxa,

yajaꞌ xin hanikꞌxanhe tiempohal.

11 Haxa huneꞌ naj Noqꞌ isbꞌi,

naj aytikꞌa payxa,

yajaꞌ machi tinanh,

yet chihul naj tuꞌ haꞌ naj chiꞌok yahawilo yinhxa iswaxajwanh,

yuto yetbꞌi isbꞌa naj yebꞌ ebꞌnaj hujwanh.

Hayet chiꞌok naj yahawilo tuꞌ bꞌehxa isto naj yinh isyaꞌtajil yinh hunelnhe.

12 »Haxa 10 (lahonhebꞌ) yukꞌaꞌ noꞌ hawil tuꞌ,

yechel yinh 10 (lahonhwanh) ebꞌnaj rey maxhto chiꞌok yahawiloj,

yaj xin hun chu yaqꞌlax yip ebꞌnaj yebꞌ naj Noqꞌ isbꞌi yok yahawil yinh hanikꞌ tiempohal.

13 Ebꞌnaj 10 (lahonhwanh) tuꞌ,

hunlahanxanhe chute ebꞌnaj isnabꞌal kat yaqꞌni ebꞌnaj yip yebꞌ yahawilal tet naj Noqꞌ isbꞌi,

14 kat yaniko ebꞌnaj howal yinh Komam ok xahanbꞌalil.

Yajaꞌ chiqꞌoji Komam yinh ebꞌnaj,

yuto haꞌ Komam tuꞌ,

Yahawil yinh ebꞌnaj yahawil yebꞌ xin Rey Komam yinh ebꞌnaj rey.

Wal makta awtebꞌil yu Komam yebꞌ mak sikꞌbꞌililoj,

yebꞌ makta yijem tet Komam,

ayko iskꞌatanh yet chiqꞌoji Komam yinh ebꞌnaj tuꞌ,»

xhi naj ángel.

15 Yalnipaxo naj ángel tuꞌ wetan:

«Wal hunteqꞌan ha haꞌ hawil bꞌay tzꞌonhanayo ix ix txꞌoj ye iswiꞌ tuꞌ,

yechel ej anma,

yebꞌ ej nime konhobꞌ yebꞌ nixhte konhobꞌ,

yebꞌ ej anma nananta yabꞌxubꞌal.

16 Haꞌ 10 (lahonhebꞌ) yukꞌaꞌ naj Noqꞌ isbꞌi hawil tuꞌ yechel ebꞌnaj rey,

haꞌ ebꞌnaj chiyahnikanh ix txꞌoj ye iswiꞌ tuꞌ kat istꞌilbꞌalax ix kat isbꞌejlaxkano ix.

Chikꞌuxlaxto isnimanil ix kat isnhuslaxto xol qꞌa qꞌaꞌ.

17 Komam Dios aniko yinh iskꞌul ebꞌnaj rey tuꞌ iswatxꞌen hakaꞌ tzet choche Komam yuxin hunlahan yute ebꞌnaj isnabꞌal,

yaqꞌni ebꞌnaj sunil yip tet naj Noqꞌ isbꞌi masanta chij isbꞌa tzet halbꞌilxatikꞌa yu Komam Dios.

18 Wal huneꞌ ix ix hawil tuꞌ,

yechel huneꞌ niman konhobꞌ ay yip yibꞌanh sunil ebꞌnaj rey ay yul sat yibꞌanhqꞌinal tiꞌ ye ix,»

xhi naj ángel.