Tanhtzelaxilo niman konhobꞌ Babilonia
18
Lahwi tuꞌ xin wilnihan yayilo huneꞌ naj ángel yul satkanh kaw ay yip.
Kaw xin sajbꞌilo sat txꞌo txꞌotxꞌ tiꞌ yu isqꞌaqꞌal naj.
2 Yalni naj yinh kaw ip:
«¡Maꞌaykꞌay niman konhobꞌ Babilonia,
wal tinanh maꞌaykꞌaykanoj!
Maꞌok yatuto ebꞌnaj ischejabꞌ naj matzwalil yebꞌ yehobꞌalo espíritu txꞌoj,
yebꞌ yatuto noꞌ chꞌik yahbꞌetaj,
yebꞌ mach kꞌuloj.
3 Yuto sunil ej konhobꞌ xaꞌaykꞌay yinh mule yu istxꞌojal huneꞌ konhobꞌ tuꞌ,
hakaꞌtanhe kaw xaꞌiskamtzekanilo iswiꞌ hunteqꞌan konhobꞌ tuꞌ yu istxꞌojal.
Haxa ebꞌnaj rey ay yul sat yibꞌanhqꞌinal tiꞌ xaꞌaykꞌay ebꞌnaj yinh ixloj yu huneꞌ konhobꞌ tuꞌ.
Sunil ebꞌnaj txonhwom ay yul sat yibꞌanhqꞌinal tiꞌ,
xaꞌok ebꞌnaj qꞌalomal yu istxonhni tzettaj ye tuꞌ kaw ay istohol,
yuto huneꞌ konhobꞌ tuꞌ kaw loloꞌ isqꞌaptzen isbꞌa yebꞌ yekꞌtzen qꞌinh,»a
xhi naj ángel tuꞌ.
4 Lahwi tuꞌ wabꞌenpaxojan huneꞌxa yul nuqꞌe satkanh,
halni hakaꞌ tiꞌ:
«Hex wetxahan,
elanhwe yul huneꞌ konhobꞌ tiꞌ
yunhe mach cheyilto hewatxꞌen istxꞌojal chiswatxꞌe,
yebꞌ yunhe maxhtaj hunex chechah isyaꞌtajil chul yibꞌanh.
5 Huneꞌ konhobꞌ tiꞌ kaw xaꞌahtenno ismul,
xaꞌahilo satkanh,
yajaꞌ wal tinanh xin manalaxti ismul yu Komam Dios.
6 Hakaꞌtikꞌa yute yaqꞌni tet anma,
hak tuꞌ chu heyaqꞌni tet,
kayelto ekꞌbꞌal ispaj selel cheyaqꞌ tet.
Hunteqꞌan howla tzet ye tuꞌ ayayto yul isvaso yaqꞌ yukꞌuꞌ anma,
pajtzewe tet,
yaj kayelto ekꞌna kaw how cheyute.
7 Hakaꞌtikꞌa yu isloloꞌnhen isbꞌa yebꞌ yaqꞌni tzet yoche yanma,
hak tuꞌ chu heyaqꞌni ekꞌoyaꞌ yanma kat heyaqꞌni isyaꞌtajil tet,
yuto chal huneꞌ konhobꞌ Babiloniab tuꞌ hakaꞌ tiꞌ:
“Hanintiꞌan kaw reina hinan,
tzꞌonhan hinan yul intzꞌonhobꞌalan,
man hunixojan,
mach bꞌaqꞌinhal chiꞌekꞌyaꞌ wanmahan,”
xhi.
8 Yuxinto huneꞌnhe tzꞌayikal chihul sunil isyaꞌtajil yibꞌanh,
chihul kamikal,
oqꞌil,
wahil,
kat isnhuslaxto xol qꞌa qꞌaꞌ,
yuto ay yip Komam Dios Jahawil yanayo isyaꞌtajil yibꞌanh huneꞌ konhobꞌ tuꞌ,»c
xhi huneꞌ yul nuqꞌe tuꞌ.
9 Wal sunil ebꞌnaj rey ay yul sat yibꞌanhqꞌinal tiꞌ,
ebꞌnaj yako ismul yebꞌ yaqꞌ yoche tzet chal isnimanil yebꞌ huneꞌ konhobꞌd tuꞌ,
kaw chꞌoqꞌ ebꞌnaj yebꞌ kaw chitzꞌay iskꞌul ebꞌnaj yilni yah isnhubꞌal yet chitzꞌatoj.
10 Nahat xin chikankano linhno ebꞌnaj yu xiwkilal yilni isyaꞌtajil chiꞌay yibꞌanh konhobꞌ tuꞌ,
chalni ebꞌnaj:
«¡Ay,
kaw kꞌanchꞌan niman konhobꞌ Babilonia,
huneꞌ konhobꞌ kaw aykano yip!
Yuto kaw yinh anhe mahul isyaꞌtajil yibꞌanh,»e
xhi ebꞌnaj.
11 Hakpax tuꞌ ebꞌnaj txonhwom ay yul sat yibꞌanhqꞌinal tiꞌ,
kaw chitzꞌay iskꞌul ebꞌnaj,
yebꞌ kaw chiꞌoqꞌ ebꞌnaj yuto matxa mak chiloqꞌni tzet chistxonh ebꞌnaj.
12 Yuto kaw yijatzilxa chistxonh ebꞌnaj chꞌen oro,
chꞌen plata,
yebꞌ ej chꞌen chꞌen kꞌulejchꞌan jilni,
yebꞌ chꞌen perla.
Chistxonhnipaxo ebꞌnaj qꞌap lino kaw ay istohol,
qꞌap qꞌap kajmutzꞌmunhe jilni,
yebꞌ qꞌap seda,
yebꞌ qꞌap qꞌap kaj jilni.
Chistxonhnipaxo ebꞌnaj sunil ej te teꞌ xuqꞌ sam,
yebꞌ tzettaj ye tuꞌ watxꞌebꞌil yinh istxꞌiꞌeh noꞌ elefante,f
yebꞌ yinh ej te teꞌ kaw ay istohol,
yebꞌ yinh chꞌen bronce,
yinh chꞌen hierro yebꞌ yinh chꞌen mármol.
13 Chistxonhnipaxo ebꞌnaj teꞌ canela yebꞌ yanhal itah kaw xuqꞌ sam,
yebꞌ teꞌ pom,
yebꞌ mirra,
yebꞌ anh kaw xuqꞌ sam,
yebꞌ teꞌ vino,
yebꞌ teꞌ aceite,
yebꞌ ixim harina kaw ay istohol,
yebꞌ ixim trigo.
Chistxonhnipaxo ebꞌnaj noꞌ wakax,
noꞌ meꞌ yebꞌ noꞌ cheh,
yebꞌ teꞌ carruaje.
Chistxonhnipaxo ebꞌnaj anma chejabꞌo tet huneꞌ konhobꞌ tuꞌ.
14 Chalni ebꞌnaj txonhwom tet huneꞌ konhobꞌ tuꞌ:
«¡Matxa chiꞌapni teꞌ lobꞌehal tawet tinanh,
hunteqꞌan teꞌ kaw chawoche halobꞌ.
Kaw makꞌaykanilo haloloꞌal yebꞌ haqꞌalomal,
matxa bꞌaqꞌinhal chawil yinh!»
xhi ebꞌnaj.
15 Ebꞌnaj txonhwom kaw okkano qꞌalomal yu huneꞌ konhobꞌ tuꞌ,
nahat kan linhno ebꞌnaj yu xiwkilal yilni isyaꞌtajil chiꞌay yibꞌanh konhobꞌ tuꞌ,
kaw xin chiꞌoqꞌ ebꞌnaj yebꞌ chitzꞌay iskꞌul ebꞌnaj yinh konhobꞌ tuꞌ.
16 Chalni ebꞌnaj:
«¡Ay,
kaw kꞌanchꞌan huneꞌ niman konhobꞌ tiꞌ!
Huneꞌ konhobꞌ tiꞌ lahantikꞌa hakaꞌ hunu ix ix chiꞌaniko qꞌap lino kaw ay istohol xilo isqꞌap,
yebꞌ hunteqꞌan xilqꞌape kajmutzꞌmunhe yebꞌ kaj jilni,
aypaxiko chꞌen oro yebꞌ chꞌen perla yebꞌ chꞌen chꞌen kaw ay istohol yelawiloj,
17 yajaꞌ xin yinh kaw hunepnhe matanhkanilo isqꞌalomal,»
xhi ebꞌnaj.
Sunil ebꞌnaj yahaw barco yebꞌ anma ayikto yul barco tuꞌ,
yebꞌ ebꞌnaj chibꞌaqꞌon teꞌ,
yebꞌ hunteqꞌanxa mak chimunla yibꞌanh haꞌ mar,
nahat kankano linhnoj.
18 Yet yilni ebꞌnaj yah isnhubꞌal huneꞌ konhobꞌ tuꞌ yah yaw ebꞌnaj,
yalni ebꞌnaj:
«Kaw machi hunuxa konhobꞌ hakaꞌ huneꞌ niman konhobꞌ tiꞌ,»
xhi ebꞌnaj.
19 Yanahto ebꞌnaj pojoj xol xil iswiꞌ yu bꞌiskꞌulal,
kaw xin chꞌoqꞌ ebꞌnaj,
yebꞌ kaw chitzꞌay iskꞌul ebꞌnaj yinh konhobꞌ tuꞌ,
chalni ebꞌnaj:
«¡Ay,
kaw kꞌanchꞌan huneꞌ niman konhobꞌ!
Yu isqꞌalomal yuxin qꞌalombꞌikanh ebꞌnaj ay isbarco xol haꞌ mar.
¡Yajaꞌ xin yinh kaw hunepnhechꞌan matanhiloj!»g
xhi ebꞌnaj.
20 Yuxin tzalahanhwe hex ay hex yul satkanh yu maꞌaykꞌay huneꞌ konhobꞌ tuꞌ.h
Tzalahanhwepaxo hex yet hexxa Komam Dios,
hex ischejabꞌ Komam yet payat yebꞌ hex ischejabꞌ Komam Jesús,
yuto hakaꞌ yu yaqꞌni huneꞌ konhobꞌ tuꞌ ekꞌoyaꞌ heyanma,
hak tuꞌ yu yaqꞌlax ekꞌoyaꞌ yanma yu Komam Dios.
21 Lahwi tuꞌ wilnihan yinikanh huneꞌ naj ángel kaw ay yip,
huneꞌ chꞌen niman chꞌen hakaꞌ chꞌen molino yet trigo,
isqꞌojnayto naj chꞌen xol haꞌ mar,
yalni naj:
«Hak tiꞌ chu isqꞌojlaxayo huneꞌ niman konhobꞌ Babilonia,
matxa bꞌaqꞌinhal xin chiꞌil-laxi.
22 Matxa bꞌaqꞌinhal chiꞌabꞌelax yok teꞌ arpa,
yebꞌ teꞌ suꞌ yebꞌ chꞌen trompeta yulaj iscallehal konhobꞌ tuꞌ.i
Matxa xin hunu naj munlawom chiꞌil-lax ismunla yinh tzettaj munilal,
yebꞌ matxa chiꞌabꞌelax yok chꞌen molino yul konhobꞌ tuꞌ.
23 Matxa xin chiꞌil-lax isqꞌaqꞌal hunu cantil,
matxa xin chiꞌabꞌelax iswejcha anma yinh mohyilal.j
Matxa xin chiꞌil-lax ebꞌnaj txonhwom yul konhobꞌ tuꞌ
waxanhka xin kaw ay yelapno ye ebꞌnaj sata anma yul sat yibꞌanhqꞌinal tiꞌ.
Yaqꞌnipaxo subꞌchaho huneꞌ konhobꞌ tuꞌ sunil anma yul sat yibꞌanhqꞌinal tiꞌ yu isnawalil.
24 »Alaxpaxayo huneꞌ niman isyaꞌtajil yibꞌanh konhobꞌ Babilonia tuꞌ yuto haꞌ bꞌey tuꞌ ilcha ischikꞌil ebꞌyaꞌ ischejabꞌ Komam Dios potxꞌbꞌilkamoj,
yebꞌ ischikꞌil makta yetxa Komam yehi,
yebꞌ ischikꞌil ebꞌnaj potxꞌlax yul sat yibꞌanhqꞌinal tiꞌ,»
xhi naj ángel tuꞌ.