19
Lahwi tuꞌ wabꞌenan yul isnuqꞌ txꞌiꞌal anma yul satkanh yalni yinh kaw ip:
«¡Kaw niman yelapno Komam Dios Jahawil,
Komam bꞌay chitit kolbꞌanile!
Hanhkꞌanhe Komam Dios ay ismay yebꞌ kaw ay yip.
2 Yuto yinh kaw isyelal yebꞌ yinh kaw istoholal chil Komam yinh tzet chiꞌeliko anma.
Mayayo Komam isyaꞌtajil yibꞌanh ix txꞌoj ye iswiꞌ,
ix ayko yechelo konhobꞌ Babilonia,
ix etanto anma ay yul sat yibꞌanhqꞌinal tiꞌ yu istxꞌojal chiswatxꞌe,
yebꞌ yaqꞌ Komam Dios ispaj selel tet ix yu ebꞌnaj ischejabꞌ Komam potxꞌbꞌil yu ix,»a
xhi.
3 Yalnipaxo hunteqꞌan yul nuqꞌe tuꞌ hakaꞌ tiꞌ:
«Kaw niman yelapno Komam Dios Jahawil.
Huneꞌ ix ix tuꞌ maxhtikꞌa chisbꞌej yah isnhubꞌal,»
xhi.
4 Wal ebꞌnaj 24 (iskanh iskawinaj) anciano yebꞌ ebꞌnaj kanhwanh querubín ay jahno ebꞌnaj,
yay xulno ebꞌnaj,
yaniko ebꞌnaj ismay Komam Dios,
Komam tzꞌonhan yul istzꞌonhobꞌal.
Yalni ebꞌnaj:
«Hakojabꞌ tuꞌ,
kaw niman yelapno Komam Dios Jahawil,»
xhi ebꞌnaj.
5 Wabꞌenan huneꞌ yul nuqꞌe elti bꞌay tzꞌonhan Komam Dios,
yalni hakaꞌ tiꞌ:
«Aweko ismay Komam Dios sunil hex yijem hex tet Komam yebꞌ hex chexxiw tet Komam,
walka ay heyelapnoj maka machi heyelapnoj,»b
xhi.
Isqꞌinhal ismohyilal Komam ok xahanbꞌalil
6 Wabꞌenpaxojan hantanhe yul nuqꞌe hakaꞌ ishaxon txꞌiꞌal ej ha haꞌ yebꞌ hakaꞌ isnhirla kꞌuh,
chalni hakaꞌ tiꞌ:
«Kaw niman yelapno isbꞌi Komam Dios Jahawil,
yuto Komam kaw aykano yip maschahko yok yahawil.
7 Tzalajonhwej,
kaw jaqꞌaꞌwe tzala kokꞌul,
kat janiko ismay Komam Dios yuto maꞌapni istzꞌayikal ismohyi Komam ok xahanbꞌalil.
Haꞌ mak chiꞌok yixalo Komam tuꞌ kaw watxꞌebꞌilxa isbꞌa.
8 Yuto xahal-laxi ta chako ix xil isqꞌap,
qꞌap lino kaw aykanh istohol yebꞌ kaw saj yehi,
yebꞌ kaw chitzejtzoni.
Huneꞌ xilqꞌape tuꞌ yechel istoholal chisbꞌeybꞌalnhe makta yetxa Komam Dios yehi,»c
xhi.
9 Yalni huneꞌ naj ángel wetan:
—Tzꞌibꞌnhe huneꞌ tiꞌ:
“Saqꞌal yet makta awtebꞌil yinh ismohyilal Komam ok xahanbꞌalil,”
xhi naj.
Yalnipaxo naj:
—Hunteqꞌan tzotiꞌ tiꞌ yet Komam Dios yehi,
isyelal chala,
xhi naj.
10 Lahwi tuꞌ way jahnojan sata naj ángel tuꞌ yu winayo inbꞌahan sata naj walnihan,
yajaꞌ xin yal naj wetan:
—Mach chaxhay jahno yinh insatan yuto ischejabꞌ Komam Dios wehan hakaꞌ hach tiꞌ,
yebꞌ hakaꞌ ebꞌnaj hawuxhta chaqꞌ isbꞌa yalnilo Istzotiꞌ Komam Jesús.
Wal xin kachannhe tet Komam Dios bꞌay chawiyo habꞌa.
Yuto haꞌ Istzotiꞌ Komam Jesús,
haꞌ chiꞌiptzen ebꞌnaj ischejabꞌ Komam,
xhi naj.
Huneꞌ mak ayahto yibꞌanh huneꞌ noꞌ sajinh cheh
11 Lahwi tuꞌ ishajni isbꞌa satkanh,
wilnihan huneꞌ noꞌ cheh sajinh,
ayahto huneꞌ mak yibꞌanh noꞌ.
Huneꞌ mak tuꞌ xin Yijem yebꞌ Isyelal isbꞌi,
yuto yinh kaw istoholald chil yinh tzet chiꞌeliko anma,
chaqꞌnipaxo howal yinh istoholal.
12 Wal isbꞌaqꞌ sat lahan hakaꞌ xaj qꞌa qꞌaꞌ,
hantanhe xin corona ayahto yinh iswiꞌ.
Tzꞌibꞌnhebꞌiliko xin huneꞌ bꞌihe yinh,
huneꞌ bꞌihe tuꞌ hanhkꞌanhe huneꞌ mak tuꞌ ohtanhe.
13 Wal xil isqꞌap xin bꞌakbꞌiliko chikꞌ yinh.
Huneꞌ mak tuꞌ Istzotiꞌ Komam Dios isbꞌi.
14 Tzujan xin ebꞌnaj ángel aqꞌom howal yintaj,
ayko qꞌap lino kaw ay istohol xilo isqꞌap ebꞌnaj,
yebꞌ kaw saj jilni,
machi nichꞌano tzꞌil ayko yinh.
Ayahto ebꞌnaj yibꞌanh hunun noꞌ cheh sajinh.
15 Chixinelti huneꞌ chꞌen espada kaw ay yeh yul istiꞌ huneꞌ mak tuꞌ,
haꞌ chꞌen xin chaqꞌbꞌalnhe yinhej konhobꞌ.
Chꞌok yahawiloj yebꞌ sunil yip,
yebꞌ huneꞌ isvara nabꞌa hierro.
Hakaꞌ chu isxanhlaxilti yal teꞌ uva yunhe yok teꞌ vinohal,
hak tuꞌ chu yanayo isyaꞌtajil yibꞌanh ej konhobꞌ yu ishowal Komam Dios,
Komam kaw aykano yip.
16 Wal yinh xil isqꞌap yebꞌ yinh isbꞌul tzꞌibꞌnhebꞌiliko huneꞌ bꞌihe hakaꞌ tiꞌ:
Yahawil yinh ebꞌnaj yahaw,
Iswiꞌehal yinh ebꞌnaj ayko iswiꞌehaloj,
xhikoj.
17 Lahwi tuꞌ wilnihan huneꞌ naj ángel linhankanh yibꞌanh tzꞌayik,
yalni naj tet ej noꞌ chꞌik chiꞌekꞌ yiktabꞌal satkanh hakaꞌ tiꞌ:
«Katawej,
kutxbꞌaweti hebꞌa,
kat hekꞌuxni chibꞌe chaqꞌ Komam Dios teyet.
18 Kꞌuxwe ischibꞌehal ebꞌnaj rey,
yebꞌ ebꞌnaj yahawil soldado,
yebꞌ ischibꞌehal ebꞌnaj kaw kanhyehi,
yebꞌ ischibꞌehal ej noꞌ cheh yebꞌ ebꞌnaj chiꞌahto yibꞌanh noꞌ.
Kꞌuxwe ischibꞌehal tzijxanhe anmahil,
anma yet isbꞌa ischukil,
anma chejabꞌ,
anma machi yelapnoj,
yebꞌ anma ay yelapnoj,»e
xhi naj.
19 Wilnihan naj Noqꞌ isbꞌi yebꞌ sunil ebꞌnaj rey ay yul sat yibꞌanhqꞌinal tiꞌ,
yebꞌ sunil issoldado,
kutxanxako ebꞌnaj yu yaniko howal yinh huneꞌ mak ayahto yibꞌanh noꞌ cheh yebꞌ yinh ebꞌnaj aqꞌom howal tzujan yintaj.
20 Istzabꞌlaxayo naj Noqꞌ isbꞌi yebꞌ naj isbꞌaliko isbꞌa ischejabꞌo Komam Dios,
naj yeni nimeta kꞌaybꞌalkꞌule sata naj Noqꞌ isbꞌi.
Yu hunteqꞌan nimeta kꞌaybꞌalkꞌule isye naj yaqꞌ subꞌchaho naj anma yunhe yalaxiko yechel naj Noqꞌ isbꞌi tuꞌ yinh,
yinipaxayo isbꞌa anma tet yechel naj.
Kaw xin itzitz naj Noqꞌ isbꞌi,
yebꞌ naj isbꞌaliko isbꞌa ischejabꞌo Komam Dios isqꞌojlaxto ebꞌnaj xol huneꞌ niman qꞌaꞌ chiꞌah xaj yu azufre.
21 Wal sunilxa ebꞌnaj xin potxꞌlax ebꞌnaj yu chꞌen espada chiꞌelti yul istiꞌ mak ayahto yibꞌanh noꞌ cheh.
Kaw xin sunil noꞌ chꞌik tuꞌ nohkano iskꞌul iskꞌuxnito ischibꞌehal sunil anma tuꞌ.