Chiꞌok Komam Jesús yahawilo yulbꞌal mil habꞌil
20
Lahwi tuꞌ,
wilnihan yayilo huneꞌ naj ángel yul satkanh,
iqꞌbꞌil islawehal huneꞌ niman xabꞌ yu naj,
iqꞌbꞌilpaxo huneꞌ niman cadena yu naj.
2 Istzabꞌnayo naj huneꞌ mak chiyij dragón,
haꞌ ton noꞌ payat labꞌa chihal-lax Diablohal yebꞌ Satanás,
iskꞌalbꞌanayo naj ángel tuꞌ naj yulbꞌal mil habꞌil.
3 Isqꞌojlaxayto naj yul huneꞌ niman xabꞌ,
ismajchenkano naj ángel tuꞌ istiꞌ.
Yaniko naj issellohal yunhe mach chꞌahti naj dragón tuꞌ yaqꞌaꞌ subꞌchaho ej konhobꞌ.
Haxa yet chiꞌekꞌto mil habꞌil tuꞌ kat isbꞌejtzolax naj hanikꞌxa tiempohal.
4 Lahwi tuꞌ wilnihan hunteqꞌan tzꞌonhobꞌal bꞌay tzꞌonhan ebꞌnaj aqꞌlax yip yu yilni yinh tzet chiꞌeliko anma.
Wilnipaxojan yanma ebꞌnaj ilaxilo iswiꞌa yu yaqꞌ isbꞌa testigohal yinh Komam Jesús,
yebꞌ yu yalikꞌo Istzotiꞌ Komam Dios.
Haꞌ ton ebꞌnaj tuꞌ mach yiyo isbꞌa tet mak Noqꞌ isbꞌi,
mach xin aypaxo jahno tet yechel.
Mach xin ischahpaxiko ebꞌnaj yechel mak Noqꞌ isbꞌi tuꞌ yinh ispalanh maka yinh isqꞌabꞌ.
Wilnihan yitzitzbꞌikanh ebꞌnaj tuꞌ,
yok ebꞌnaj yahawilo yinta Komam yulbꞌal mil habꞌil.
5 Haꞌ ton hunteqꞌan ebꞌnaj tuꞌ bꞌabꞌel pitzkꞌakanh,
wal hunteqꞌanxa kamom xin mach pitzkꞌakanh masanto chiꞌelto mil habꞌil tuꞌ,
kat ispitzkꞌakanh.
6 ¡Saqꞌal yet mak bꞌabꞌel chipitzkꞌakanh yuto yetxa Komam yehi!
Matxa xin chiqꞌoji iskabꞌ kamikal yinh,
wal xin chiꞌok sacerdotehal yinh ismunil Komam Dios yebꞌ Komam Jesucristo,
chiꞌokpaxo yahawilo yinta Komam yulbꞌal mil habꞌil.
7 Lahwi yekꞌto mil habꞌil xin kat isbꞌejtzolax naj matzwalil bꞌay majan,
8 kat xin yahti naj yaqꞌno subꞌchaho anma ay yul sat yibꞌanhqꞌinal tiꞌ yebꞌpaxo xin Gog yebꞌ Magogb kat iskutxbꞌaniko naj yinh howal.
Haꞌ xin isbꞌisil ebꞌnaj aqꞌom howal chikutxiko tuꞌ lahan hakaꞌ yarenahil istiꞌ haꞌ mar.
9 Yet chito ebꞌnaj yinh howal tuꞌ chismajto ebꞌnaj sunil sat txꞌo txꞌotxꞌ tiꞌ kat ishoynoyo ebꞌnaj iscampamento ebꞌnaj yetxa Komam Dios yehi yebꞌ huneꞌ niman konhobꞌ xahan ay yu Komam;
yajaꞌ chati Komam qꞌa qꞌaꞌ yibꞌanh ebꞌnaj kat istzꞌakanto ebꞌnaj sunil.
10 Wal naj matzwalil aqꞌni subꞌchaho anma tuꞌ qꞌojlaxayto naj xol huneꞌ niman qꞌaꞌ chiꞌah xaj yu azufre,
huneꞌ bꞌay qꞌojlaxayto mak Noqꞌ isbꞌi yebꞌ naj isbꞌaliko isbꞌa ischejabꞌo Komam Dios.
Haꞌ bꞌey tuꞌ xin chiꞌaqꞌlax ekꞌoyaꞌ yanma ebꞌnaj tzꞌayik aqꞌbꞌal yinh sunilbꞌal tiempo.
Yet chilni Komam Dios yinh tzet chiꞌeliko sunil anma
11 Lahwi tuꞌ,
wilnihan huneꞌ niman tzꞌonhobꞌal saj jilni yebꞌ huneꞌ mak tzꞌonhanayo yul huneꞌ tzꞌonhobꞌal tuꞌ.
Yinhnhena tuꞌ iskꞌaykanh txꞌo txꞌotxꞌ yebꞌ satkanhc sata mak tzꞌonhan tuꞌ,
wiyom xin iskꞌaykaniloj.
12 Wilnihan anma kamnaj linhankanh sata Komam,
anma niman yelapnoj yebꞌ anma mach yelapnoj.
Ishajlax hunteqꞌan teꞌ hum,
yil-lax yinh tzet chiꞌeliko anma kamom tuꞌ hatatikꞌa tzet iswatxꞌe hunun,
hakaꞌ yehayo yul hunteqꞌan teꞌ hum tuꞌ.
Ishajlaxpaxo teꞌ hum bꞌay ayayo isbꞌi anma ayxa isqꞌinal yinh hunelnhe.d
13 Yaniko haꞌ mar sunil mak kamna yul haꞌ tet Komam,
hakpax tuꞌ naj kamikal yebꞌ kambꞌal yapaxiko sunil kamom tet Komam.
Yilni Komam yinh tzet elikoj hatatikꞌa tzet iswatxꞌe hunun.
14 Lahwi tuꞌ isqꞌojlaxayto naj kamikal yebꞌ kambꞌal xol huneꞌ niman qꞌaꞌ.
Huneꞌ qꞌa qꞌaꞌ tuꞌ,
haꞌ ton iskabꞌ kamikal.
15 Haxa mak mach ayayo isbꞌi yul teꞌ hum yet qꞌinale qꞌojlaxayto xol huneꞌ niman qꞌaꞌ tuꞌ.