Huneꞌ akꞌ satkanh yebꞌ huneꞌ txꞌo txꞌotxꞌ akꞌ
21
Lahwi tuꞌ xin,
wilnihan huneꞌ akꞌ satkanh yebꞌ huneꞌ txꞌo txꞌotxꞌ akꞌ,a
yuto haꞌ bꞌabꞌel satkanh yebꞌ txꞌotxꞌ bꞌabꞌel txꞌotxꞌ kꞌaykanh,
hakpax tuꞌ xin haꞌ mar kꞌaykanh haꞌ.
2 Hanin Juan intiꞌan wilan iskonhobꞌ Komam Dios,
haꞌ ton akꞌ Jerusalén,
wilan istit yul satkanh bꞌay ay Komam Dios.b
Kaw kꞌul yehi,
hakaꞌ hunu ix ix watxꞌebꞌilxa isbꞌa yuto yokxa yinh mohyilal yebꞌ naj chiꞌiqꞌni.
3 Wabꞌenan huneꞌ yul nuqꞌe elti bꞌay tzꞌonhan Komam,
yalni yinh kaw ip:
«Wal tinanh ayxako Komam Dios xol anma,
chixin kankano Komam xol,
iskonhobꞌxa Komam chukanikoj.
Chiꞌehayo Komam xol anma,
kat yokkano Komam isDiosaloj.
4 Haꞌ Komam xin chisunilo yal sat anma,
matxa kamikal,
matxa oqꞌil,
matxa mak chiꞌah iskꞌul,
matxa isyaꞌtajil,
yuto sunil tzet aytikꞌa yet yalanhtokanoj,
xatanhiloj,»
xhi.
5 Yalni Komam tzꞌonhan yul istzꞌonhobꞌal wetan:
«Hanintiꞌan chiwaqꞌ akꞌbꞌojan sunil tzettaj ye tuꞌ,»
xhi Komam.
Yalnipaxoj:
«Tzꞌibꞌnhekano hunteqꞌan tzotiꞌ tiꞌ yuto isyelal yehi,
yebꞌ chu iskawxi iskꞌul anma yinh,»
xhi.
6 Lahwi tuꞌ yalnipaxo Komam wetan:
«Sunil watxꞌebꞌilxa.
Hanintiꞌan yichebꞌanil yebꞌ islahobꞌal,
hakaꞌ tzꞌibꞌ A yebꞌ Z.
Makta chitaj istiꞌ,
chiwaqꞌan ha haꞌ matanil yukꞌuꞌ,
huneꞌ ha haꞌ chiꞌaqꞌni qꞌinale.
7 Haꞌ mak chiqꞌoji,
chiwaqꞌan sunil hunteqꞌan tuꞌ ismajuloj.
Haninan xin chinokan isDiosaloj,
kat yok wuninalojan.
8 Yajaꞌ wal mak chixiw yaniko isbꞌa yul inqꞌabꞌan,
yebꞌ mak mach chayto yul yanma winhan,
yebꞌ mak chiwatxꞌen isyahbꞌetajil,
yebꞌ makta potxꞌom anma,
yebꞌ makta chiꞌixli yebꞌ chiwinajli,
yebꞌ makta chikunnhen yet anmahil,
yebꞌ makta chiꞌay jahno sata tioxh,
yebꞌ sunil makta leqꞌtiꞌwom,c
haꞌ hunteqꞌan mak tuꞌ chiꞌalaxto xol huneꞌ niman qꞌaꞌ chiꞌah xaj yu azufre,
haꞌ ton iskabꞌ kamikal,»
xhi Komam.
Huneꞌ akꞌ Jerusalén
9 Lahwi tuꞌ yul naj ishuj ángel inkꞌatanhan,
naj iqꞌnhe chꞌen ishuj vaso bꞌay ayayto islahobꞌal isyaꞌtajil,
yalni naj wetan:
«Kata,
chinyehan tawet mak chiꞌok yixalo Komam ok xahanbꞌalil,»
xhi naj.
10 Yinh huneꞌ isye Komam Espíritu wettuꞌan wilan kinyinitojan naj ángel tuꞌ yinh iswiꞌ huneꞌ niman witz kaw nahat yekanh.d
Isyeni naj niman konhobꞌ Jerusalén wetan,
iskonhobꞌ Komam Dios.
Huneꞌ konhobꞌ tuꞌ wilan istit yul satkanh bꞌay ay Komam Dios.
11 Kaw xin chitzejlako isqꞌaqꞌal Komam yinh konhobꞌ tuꞌ,
lahan hakaꞌ istzejla chꞌen chꞌen kꞌulchꞌan jilni yebꞌ hakaꞌ istzejla chꞌen jaspe,
chiqꞌaxpon kosat yul hakaꞌ chꞌen cristal.
12 Huneꞌ konhobꞌ tuꞌ hoyaniko huneꞌ niman kꞌubꞌ yinh kaw xin nahat yekanh,
12 (kabꞌlahonhebꞌ) ispultahil aykoj,
12 (kabꞌlahonhwanh) ebꞌnaj ángel ayko istanhenoj,
hunun ebꞌnaj yinh istiꞌ hunun pulta tuꞌ.
Yinh hunun pulta tuꞌ tzꞌibꞌnhebꞌiliko hunun isbꞌi ebꞌnaj 12 (kabꞌlahonhebꞌ) majan Israel.
13 Oxebꞌ ispultahil ayko yinh yetkꞌulal bꞌay chiꞌahilo tzꞌayik,
oxebꞌpaxo xin ayko yinh yetkꞌulal bꞌay chito tzꞌayik,
oxebꞌ xin ayko yinh norte,
oxebꞌpaxo xin ayko yinh sur.
14 Huneꞌ niman kꞌubꞌ tuꞌ ayko 12 (kabꞌlahonhebꞌ) chꞌen chꞌen isxeꞌoj,
ayko xin isbꞌi hunun ebꞌnaj 12 (kabꞌlahonhwanh) ischejabꞌ Komam ok xahanbꞌalil yinh hunun chꞌen.
15 Naj ángel tzotel wettuꞌan iqꞌbꞌil huneꞌ vara nabꞌa oro yu naj yunhe ismalen naj huneꞌ konhobꞌ tuꞌ yebꞌ ispultahil yebꞌpaxo iskꞌubꞌal.
16 Huneꞌ niman konhobꞌ tuꞌ kanhebꞌ istxikin,
lahan xin yeko ismalil hunun istxikin tuꞌ.
Hayet ismalen naj ángel huneꞌ konhobꞌ tuꞌ 600 legua yekoj.
Huneꞌ konhobꞌ tuꞌ hakaꞌ yeko ismalil ispakꞌul hak tuꞌ yeko ismalil istxikin,
hak tuꞌ yepaxokanh istel.
17 Haxa yet ismalen naj iskꞌubꞌal konhobꞌ tuꞌ 65 (howebꞌ iskanhwinaj) metro elikoj.
Huneꞌ malbꞌal yako naj tuꞌ lahan hakaꞌ ismalbꞌal anma.
18 Huneꞌ kꞌubꞌ tuꞌ,
chꞌen jaspe ayko ischꞌenaloj.
Wal huneꞌ konhobꞌ tuꞌ kaw nabꞌa oro,
hakaꞌ istzejla chꞌen vidrio hak tuꞌ istzejlahi.
19 Chꞌen chꞌen ayko isxeꞌalo iskꞌubꞌal konhobꞌ tuꞌ sunil ej chꞌen chꞌen kaw kꞌulchꞌan jilni ayko yelawiloj.
Chꞌen bꞌabꞌel jaspe chꞌen,
chꞌen iskabꞌ zafiro,
chꞌen isyox ágata,
chꞌen iskanh esmeralda.
20 Chꞌen ishoꞌ ónice,
chꞌen iswaj cornalina,
chꞌen ishuj crisólito,
chꞌen iswaxaj berilo,
chꞌen isbꞌalonhebꞌ topacio,
chꞌen 10 (islahonhebꞌ) crisopraso,
chꞌen 11 (ishunlahonhebꞌ) jacinto,
haxa chꞌen 12 (iskabꞌlahonhebꞌ) xin amatista;
haꞌ sunil chꞌen tiꞌ ayko yelawiloj.
21 Kabꞌlahonhebꞌ ispultahil iskꞌubꞌal konhobꞌ tuꞌ,
haꞌ ton 12 (kabꞌlahonhebꞌ) chꞌen perla,
hunun pulta tuꞌ hunun chꞌen perla ayko yinh.
Wal huneꞌ niman calla chiꞌekꞌto yiktabꞌal konhobꞌ tuꞌ nabꞌa oronhe,
chiqꞌaxpon kosat yul hakaꞌ vidrio.
22 Machi xin Yatut Komam Dios wilan yul huneꞌ konhobꞌ tuꞌ,
yuto haꞌ Komam Dios kaw aykano yip,
yebꞌ Komam ok xahanbꞌalil,
ayko xol anma tuꞌ.
23 Huneꞌ konhobꞌ tuꞌ matxa chiꞌokniko yoj tzꞌayik yebꞌ yoj ixahaw yu,
wal xin to haꞌ isqꞌaqꞌal yip Komam Dios haꞌ ayayo xol anma,
yebꞌ xin haꞌ issajilqꞌinal Komam ok xahanbꞌalil haꞌ chitzejnheni.
24 Yinhxa issajilqꞌinal huneꞌ konhobꞌ tuꞌ chibꞌelwi ej konhobꞌ kolbꞌilxa;e
yebꞌ xin sunil ebꞌnaj rey ay yul sat yibꞌanhqꞌinal tiꞌ chato isqꞌalomal tet huneꞌ konhobꞌ tuꞌ.
25 Maxhtikꞌa chipebꞌalax ispultahil hunun tzꞌayik yuto matxa aqꞌbꞌal bꞌey tuꞌ.
26 Haꞌ tet huneꞌ konhobꞌ tuꞌ chiꞌalaxto sunil isqꞌalomal yebꞌ yip sunil ej konhobꞌ.
27 Maxhtikꞌa nino istxꞌojal chiꞌokto bꞌey tuꞌ,
mach hunu mak chiwatxꞌen tzettaj chisyah Komam Dios chiꞌapni yul huneꞌ konhobꞌ tuꞌ,
yebꞌ matxa leqꞌtiꞌal.
Wal xin hanhkꞌanhe mak tzꞌunbꞌilayo isbꞌi yul hum yet qꞌinale yet Komam ok xahanbꞌalil,
haꞌ chiꞌokto yul huneꞌ konhobꞌ tuꞌ.