22
Lahwi tuꞌ isyeni naj ángel huneꞌ ha haꞌ kaw saj wetan,
haꞌ chiꞌaqꞌni qꞌinale.
Kaw xin chiqꞌaxpon kosat yul haꞌ hakaꞌ vidrio.
Huneꞌ ha haꞌ tuꞌ,
haꞌ bꞌay ay istzꞌonhobꞌal Komam Dios yebꞌ Komam ok xahanbꞌalil,
haꞌ tuꞌ chitit haꞌ.
2 Yiktabꞌal huneꞌ niman calla yul huneꞌ niman konhobꞌ tuꞌ chiꞌekꞌ haꞌ.
Haꞌ xin isqꞌaxqꞌepal istiꞌla haꞌ aykanh te teꞌ chiꞌaqꞌni qꞌinale,
hunun ixahaw xin yaqꞌni sat teꞌ,
12 (kabꞌlahonhel) chisatni teꞌ yulbꞌal habꞌil.
Wal xaj teꞌ xin haꞌ chiꞌokniko anhil yu anma ay yulaj txꞌotxꞌ konhobꞌ.a
3 Sunil tzettaj ay bꞌey tuꞌ matxa chiꞌay ishowal Komam Dios yibꞌanh.
Yul huneꞌ konhobꞌ tuꞌ ay istzꞌonhobꞌal Komam Dios yebꞌ Komam ok xahanbꞌalil.
Sunil ischejabꞌ Komam xin chiyiyo isbꞌa tet,
4 kat yilniko yinh Komam,
kat yinikꞌo isbꞌi Komam yinh ispalanh.
5 Bꞌey tuꞌ matxa aqꞌbꞌal,
matxa yilalo chiꞌokniko cantil yebꞌ yoj tzꞌayik,
yuto haxa isqꞌaqꞌal Komam Dios chitzejnheni,
kat yok yahawilo yinh sunilbꞌal tiempo.
Kawilxa yeti yulbꞌal Komam Jesucristo
6 Yalnipaxo naj ángel wetan:
«Hunteqꞌan tzotiꞌ tiꞌ kaw yeli,
iskawxobꞌal iskꞌul anma yehi.
Komam Dios Jahawil,
Komam chiꞌiptzen ischejabꞌ chalni Istzotiꞌ,
haꞌ chejniti yángel yalno tet ej ischejabꞌ yinh hunteqꞌan tzet toxa chiyuhi,»
xhi naj.
7 Chal Komam Jesús hakaꞌ tiꞌ:
«¡Kaw toxa chinhulan!
¡Saqꞌal yet mak chiyijen Istzotiꞌ Komam Dios halbꞌilkano yul huneꞌ hum tiꞌ!»
xhi Komam.
8 Hanin Juan intiꞌan,
haninan kaw wilan yebꞌ wabꞌehan hunteqꞌan tiꞌ.
Hayet wilnihan yebꞌ yet wabꞌenan way jahnojan sata naj ángel yeni hunteqꞌan tuꞌ wetan.
9 Yajaꞌ yal naj ángel tuꞌ wetan:
«Mach chaxhay jahno insatajan yuto ischejabꞌ Komam Dios wehan hakaꞌ hach tiꞌ,
yebꞌ hakaꞌ ebꞌnaj hawuxhta chihalnikꞌo Istzotiꞌ Komam,
yebꞌpaxo sunil makta chiyijen tzet tzꞌibꞌnhebꞌil yul huneꞌ hum tiꞌ.
Wal xin haꞌojabꞌnhe tet Komam Dios chawiyo habꞌa,»
xhi naj.
10 Yalnipaxo naj wetan:
«Mach chawebꞌato tzettaj tzꞌibꞌnhebꞌilkano yul huneꞌ hum tiꞌ,
yuto toxa chiyij isbꞌa yinh tzettaj tzꞌibꞌnhebꞌilkano tiꞌ.
11 Haꞌ mak chiwatxꞌen istxꞌojal,
islahabꞌiko iswatxꞌen istxꞌojal;
haxa mak chiwatxꞌen isyahbꞌetajil xin,
islahabꞌiko iswatxꞌen isyahbꞌetajil tuꞌ.
Haꞌ mak chiwatxꞌen istoholal,
islahabꞌiko iswatxꞌen istoholal.
Haꞌ mak yetxa Komam Dios yehi,
islahabꞌiko isyijen tzet chal Komam,»
xhi naj ángel.
12 Chalnipaxo Komam Jesús:
«Yinh kaw yeli toxa chinhulan,
iqꞌbꞌil ispaj selel tzettaj iswatxꞌe hunun mak wuhan,
hatatikꞌa tzet iswatxꞌe.
13 Hanintiꞌan yichebꞌanil yebꞌ islahobꞌal,
hakaꞌ tzꞌibꞌ A yebꞌ Z.
14 »Saqꞌal yet mak txꞌahbꞌilxa ismul,
hakaꞌtanhe xaꞌistxꞌah xil isqꞌap yuto ay yok yinh te teꞌ chiꞌaqꞌni qꞌinale,
yebꞌ xin chu yokto yul ispultahil huneꞌ konhobꞌ tuꞌ.
15 Yajaꞌ wal mak chiwatxꞌen isyahbꞌetajil chikankano yintalto huneꞌ konhobꞌ tuꞌ,
yebꞌ makta kunlum,
yebꞌ makta ixlom yebꞌ winajlom,
yebꞌ makta potxꞌwawom,
yebꞌ makta chisjahbꞌa isbꞌa sata tioxh,
yebꞌpaxo sunil mak choche yalaꞌ leqꞌtiꞌal.
16 »Hanin Jesús intiꞌan,
inchejtijan wángelan yalno sunil hunteqꞌan tiꞌ tet sunil mak ayxako yul inqꞌabꞌan.
Hanintiꞌan titnaj hinan yinh yuninal yaꞌ rey David,
hakaꞌ hunu teꞌ xeꞌ teꞌ xawolni,
hak tuꞌ wehan.
Lahan hinpaxojan hakaꞌ txꞌumel sajbꞌes chiꞌahilo yinh sakꞌayalil,»
xhi Komam.
17 Chal Komam Espíritu Santo yebꞌ yixal Komam ok xahanbꞌalil hakaꞌ tiꞌ:
«¡Hulanh!»
xhi.
Haꞌ mak chiꞌabꞌen huneꞌ tiꞌ yalabꞌpaxoj:
«¡Hulanh!»
xhihojabꞌi.
Haꞌ mak chitaj istiꞌ,
tijabꞌi kat yukꞌni ha haꞌ yinh matanil,
haꞌ chiꞌaqꞌni qꞌinale mach istanhbꞌal.
18 Sunil mak chiꞌabꞌen Istzotiꞌ Komam Dios tzꞌibꞌnhebꞌilkano yul huneꞌ hum tiꞌ,
kaw chintaqꞌekanojan hunteqꞌan tiꞌ tet:
Ta ay mak chiꞌaniko yaqꞌbꞌil hunteqꞌan tzet tzꞌibꞌnhebꞌilkano tiꞌ,
chati Komam Dios hunteqꞌan isyaꞌtajil tzꞌibꞌnhebꞌilkano yul huneꞌ hum tiꞌ yibꞌanh.
19 Yebꞌ ta ay mak chiꞌinilo yaqꞌbꞌil tzet halbꞌilkano yul huneꞌ hum tiꞌ,
chilo Komam Dios ismajul yinh te teꞌ chiꞌaqꞌni qꞌinale,
yebꞌ ismajul yul huneꞌ konhobꞌ yet Komam Dios yehi,
hakaꞌ yalni yul huneꞌ hum tiꞌ.
20 Komam chalni tzettaj ayayo yul huneꞌ Hum tiꞌ,
haꞌ chalni hakaꞌ tiꞌ:
«Hoꞌ toxa chinhulan,»
xhi Komam.
Hakojabꞌ tuꞌ.
¡Hulanh Mam Jesús Jahawil!
21 Yaqꞌabꞌayo Komam Jesús iskꞌulchꞌanil iskꞌul teyibꞌanh hesunil.