Ta ayko janma yinh Komam Dios chonhqꞌoji yinh sunil istxꞌojal
5
Mak chiꞌanayto yul yanma tato Komam Jesús,
haꞌ Cristo Kokolomal,
kaw yuninal Komam Dios yehi.
Tato chijoche Komam Dios Mame chijochepaxo Iskꞌahol.
2 Hayet chijochen Komam Dios,
kat xin koyijen tzet chala,
kaw johtaj tato kaw xahan chijilpaxo sunil yuninal Komam.
3 Tato chikoyije kuybꞌanile aykano jet yu Komam,
haꞌ chalniloj ta chijoche Komam.
Sunil kuybꞌanile yet Komam tuꞌ mach yaꞌtajo koyijeni.
4 Yuxin sunil mak yuninalxa Komam Dios,
chiqꞌoji yinh sunil istxꞌojal ay yul sat yibꞌanhqꞌinal tiꞌ,
yuto yet chijaniko janma yinh Komam Dios chonhqꞌoji yinh istxꞌojal ay yul sat yibꞌanhqꞌinal tiꞌ.
5 Haꞌ mak chiꞌanayto yul yanma tato haꞌ Komam Jesucristo kaw Iskꞌahol Komam Dios yehi,
chiqꞌoji yinh sunil istxꞌojal ay yul sat yibꞌanhqꞌinal tiꞌ.
Oxebꞌ tzet chiyeniloj tato iskꞌahol Komam Dios ye Komam Jesús
6 Yet yulikꞌo Komam Jesucristo yul sat yibꞌanhqꞌinal tiꞌ,
ah haꞌ iswiꞌ,
yelpaxo ischikꞌil,
haꞌ ton xin chiyeniloj tato Iskꞌahol Komam Dios yehi.
Mach tonheho hulikꞌo yaqꞌaꞌ aho haꞌ iswiꞌ,
to elpaxo ischikꞌil yet iskami.
Haꞌ xin Komam Espíritu Santo testigo yinh huneꞌ tiꞌ,
yuto Komam Espíritu tuꞌ isyelal chala.
7 Haꞌ yul satkanh oxwanh mak chaqꞌ isbꞌa testigohal yinh huneꞌ tiꞌ,
haꞌ ton Komam Dios Mame,
yebꞌ Komam Tzotiꞌ isbꞌi,
yebꞌ xin Komam Espíritu Santo.
Haꞌ oxwanh tiꞌ huneꞌnhe yehi.
8 Oxwanh mak xin chaqꞌpaxo isbꞌa testigohal sat txꞌo txꞌotxꞌ tiꞌ,
haꞌ ton Komam Espíritu Santo,
yebꞌ ha haꞌ yet yah haꞌ iswiꞌ Komam,
yebꞌ chikꞌ maltoj yet iskam Komam.
9 Chijabꞌeto yinh tzet chal komon anma,
hajxam xin yinh tzet chal Komam Dios,
to kaw ekꞌbꞌalto ay yelapno ye tzet chal Komam,
wal xin haꞌ kaw Komam Dios chitzotel yinh Iskꞌahol.
10 Mak chiꞌanayto yul yanma yinh Komam Dios,
lanhan yalni Komam Espíritu Santo yul yanma tato yel chal Komam yinh Iskꞌahol.
Wal mak mach chiꞌanayto yul yanma yinh Komam Dios xin,
kaw leqꞌtiꞌ Komam yul sat,
yuto mach chiyayto yul yanma yinh tzet chiyal Komam Dios yinh Iskꞌahol.
11 Huneꞌ tzet chal Komam Dios,
haꞌ ton koqꞌinal mach istanhbꞌal chaqꞌ Komam;
kaw xin yinhnhe Iskꞌahol Komam ay huneꞌ qꞌinale tuꞌ.
12 Yuxin haꞌ mak xaꞌischah Iskꞌahol Komam Dios yul yanma,
kaw ay huneꞌ isqꞌinal mach chitanhi.
Yaj wal mak machi Iskꞌahol Komam yul yanma xin,
machi huneꞌ isqꞌinal tuꞌ.
Kaw johtaj tato ay huneꞌ koqꞌinal mach istanhbꞌal
13 Hex chabꞌilxa Iskꞌahol Komam heyu,
chintzꞌibꞌnhetojan huneꞌ carta tiꞌ teyet yunhe heyohtanheniloj tato ay heqꞌinal mach istanhbꞌal.
14 Yuxin chikawxi kokꞌul yinh Komam Dios,
yuto ta chikoqꞌan hunu tzet ye tuꞌ tet Komam hakaꞌ tzet choche iskꞌul,
kaw chabꞌe Komam tzet chikoqꞌana.
15 Yuxin ta kaw johtaj tato kaw chabꞌe Komam Dios tzet chijala yet chonhtxahli tet Komam,
kaw johtapaxoj tato chiyaqꞌ Komam tzet chikoqꞌana.
16 Tato chijila ta ay hunu juxhtaj maka janabꞌ chako ismul,
yaj mule mach chonhyito yinh kamikal mach istanhbꞌal,
koqꞌanawe iskꞌulal iskꞌul Komam Dios yinh,
kat xin yaqꞌni Komam iskawil.
Wal xin ay mule chonhinito yul isqꞌabꞌ kamikal mach istanhbꞌal,
yinh huneꞌ mule tuꞌ,
kaw chiwalan teyet mach cheqꞌan iskꞌulal Komam Dios yibꞌanh mak chiwatxꞌeni,
mach chiwalan teyet ta chextxahli yinh.
17 Sunil ismachiswalilal,
muletoni,
yaj ay mule mach chonhinito yinh kamikal.
18 Kaw johtaj ta makta yuninalxa Komam Dios yehi,
matxa chissay yaniko ismul,
yuto haxa Iskꞌahol Komam Dios chitanheni.
Yuxin kaw matxa chu yok naj matzwalil yetanoj.
19 Kaw johtaj ta yetonhxa Komam Dios.
Wal anma yet yul sat yibꞌanhqꞌinal tiꞌ,
kaw ayayo yalanh yip naj matzwalil.
20 Kaw johtapaxoj tato xahulikꞌo Iskꞌahol Komam Dios,
haꞌ Komam aqꞌnhe konabꞌal johtanhenilo Komam Dios yinh kaw isyelal.
Yuxinto hunxa je yinh Komam kaw yel chala,
haꞌ ton Komam Jesucristo.
Iskꞌahol Komam Dios tuꞌ,
haꞌ Komam Dios yinh kaw isyelal,
haꞌ chiꞌaqꞌni koqꞌinal mach istanhbꞌal.
21 Hex xahan ay wuhtiꞌan,
kaw nannhe heyu,
mach chexoktzujno yinta tioxh yebꞌ sunil hunteqꞌan bꞌay chiꞌay jahno anma.
¡Hakojabꞌ tuꞌ!