Anma yet Komam Dios yebꞌ anma yet naj matzwalil
4
Wuxhtaj wanabꞌ,
tato ay ebꞌnaj chalni ta haꞌ tzet chalikꞌoj yet Komam Dios yehi,
kaw mach tonheho cheyayto tzet chal ebꞌnaj tuꞌ yul heyanma.
Kaw bꞌabꞌel cheyabꞌe istzotel ebꞌnaj tato Istzotiꞌ Komam Dios chal ebꞌnaj,
yuto kaw txꞌiꞌal ebꞌnaj leqꞌtiꞌwom yul sat yibꞌanhqꞌinal tiꞌ chalni tato ischejabꞌ Komam Dios yehi.
2 Hak tiꞌ chu hetxumniloj tato ayko Yespíritu Komam Dios yinh ebꞌnaj,
ta chal ebꞌnaj hakaꞌ tiꞌ:
«Kaw anma yute isbꞌa Komam Jesucristo yet yulikꞌo yul sat yibꞌanhqꞌinal tiꞌ,»
ta xhi ebꞌnaj,
wal tuꞌ ayko Yespíritu Komam yinh ebꞌnaj.
3 Wal mak mach chihalni yinh Komam Jesús hakaꞌ tuꞌ xin,
kaw mach ayoko Yespíritu Komam Dios yinh,
haꞌ yespíritu naj chikajni Komam Jesucristo ayko yinh.
Huneꞌ espíritu tuꞌ xaheyabꞌe tato chihuli,
mach yetto bꞌaqꞌinh chihul hun tuꞌ,
wal xin ayxakꞌo yul sat yibꞌanhqꞌinal tiꞌ tinanh.a
4 Hex xahan ay wuhan,
kaw yetxa Komam Dios je tinanh.
Wal xin xakonhqꞌoji yinh ebꞌnaj leqꞌtiꞌwom tuꞌ,
yuto ekꞌna kaw ay yip Komam ayayto yul janma satapaxo naj ayko yul yanma anma yet yul sat yibꞌanhqꞌinal tiꞌ.
5 Kaw yet yul sat yibꞌanhqꞌinal tiꞌ ye ebꞌnaj,
yuxinto hanhkꞌanhe tzet ay yul sat yibꞌanhqꞌinal tiꞌ kaw chiyalobꞌtanhe ebꞌnaj.
Wal anma yet yul sat yibꞌanhqꞌinal tiꞌ,
kaw saqꞌal yabꞌento tzet chal ebꞌnaj.b
6 Yaj walonh tiꞌ xin,
yetxa Komam Dios jehi,
yuxin haꞌ mak ohtanhenxa Komam Dios,
haꞌ chiyabꞌeto tzet chijala,
wal anma mach yeto Komam Dios xin,
kaw mach chiyoche yabꞌeꞌ tzet chijala.
Hak tuꞌ xin,
chiyu johtanhenilo makta ayko isyelal Yespíritu Komam Dios yinh,
yebꞌ xin mak ayko yespíritu naj yahawil leqꞌtiꞌal yinh.
Kaw xahan ayonh yu Komam Dios
7 Hex xahan ay wuhtiꞌan,
xahanojabꞌ chijil kobꞌa hununonh yuto yinh Komam Dios chitit huneꞌ koxahannhen kobꞌa tiꞌ.
Tato kaw xahan chijil kobꞌa hununonh,
chal yelapnoj tato ayonhxako yuninalo Komam Dios,
johtaxa Komam.
8 Yajaꞌ tato mach xahano chijil kobꞌa,
kaw maxhto johtajo Komam Dios chal tuꞌ,
yuto wal Komam Dios kaw xahan ay anma yu.
9 Isyelo Komam tato kaw xahan ayonh yu,
yuto yati hunpilan Iskꞌahol yul say yibꞌanhqꞌinal tiꞌ yunhe yaqꞌni koqꞌinal mach istanhbꞌal.
10 Haꞌ xin chiyenilo tzet kaw yu konhyochen Komam Dios.
Wal xin,
kaw maxhtajonh bꞌabꞌel koyelo jochen Komam Dios,
to haꞌ Komam konhochen bꞌabꞌel,
yuxin yati Komam Iskꞌahol yaqꞌni isbꞌa yinh xahanbꞌalil,
yaqꞌnikano tanho komul.
11 Hex wuxhtaj hex wanabꞌ,
hex xahan ay wuhtiꞌan,
yilal koxahannhen kobꞌa hununonh,
yuto hak tuꞌ yu konhisxahannhen Komam.
12 Waxanhka maxhto hunu mak chiꞌilni Komam Dios huneloj,
yajaꞌ tato xahan chijil kobꞌa hununonh,
kaw ayko Komam yul janma.
Hak tuꞌ chu isyenilo iskꞌulal iskꞌul Komam Dios jinh yinh istoholal.
13 Hak tiꞌ chu johtanheniloj ta ayonhxako yul isqꞌabꞌ Komam Dios,
yebꞌ ta aypaxiko Komam yul janma,
yuto xayaqꞌ Komam Yespíritu jet.
14 Yuto hanhkawonhanh jilanh yinh Iskꞌahol Komam Dios,
yuxinto chijalanh tato haꞌ Komam Dios anheti Iskꞌahol iskolno anma ay yul sat yibꞌanhqꞌinal tiꞌ.
15 Maknhetikꞌa chalni tato Iskꞌahol Komam Dios ye Komam Jesucristo,
ayxako yul isqꞌabꞌ Komam Dios chal tuꞌ,
yebꞌ ayxapaxiko Komam yul yanma.
16 Hak tuꞌ xin chu johtanheniloj kat janipaxayto yul janma ta kaw chonhyoche Komam Dios.
Wal Komam Dios,
kaw chiyoche Komam anma,
yuxinto haꞌ mak chixahannhe yet anmahil,
kaw ayko Komam Dios yul yanma,
yebꞌ xin aypaxiko yinh Komam.
17 Hak tuꞌ chu ischꞌibꞌ koxahannhen kobꞌa hununonh,
yunhe yet chiꞌapni istzꞌayikal huneꞌ isyaꞌtajil chihuli,
mach chonhxiwkanh,
yuto kaw hakaꞌ ye Komam Jesucristo,
hak tuꞌ jehikꞌo yul sat yibꞌanhqꞌinal tiꞌ.
18 Hayet chijochen Komam Dios yinh kaw istꞌinhanil,
wal tuꞌ machi bꞌay chalti isbꞌa xiwkilal,
yuto yet chonhxiwi chonhnanon tet isyaꞌtajil.
Yuxin ta ay mak chixiwi,
yinh hak tuꞌ maxhto iskꞌulchꞌanil iskꞌul Komam yinh,
yinh kaw istoholal.
19 Walonh hanhonh tiꞌ chijoche Komam Dios,
yuto haꞌ Komam bꞌabꞌel konhocheni.
20 Yajaꞌ tato ay hunujonh chijal hakaꞌ tiꞌ:
«Wal hanintiꞌan kaw chiwochehan Komam Dios,»
ta konhchi,
yaj kaw kaj chijilpaxo juxhtaj,
yinh hakaꞌ tuꞌ leqꞌtiꞌonh.
Yuxin tato mach chikoxahannhe hunu juxhta chijiliko yinh,
¿tzet xin chiyu jochen Komam Dios mach chijiliko yinh?
21 Komam Jesucristo aqꞌnhekano huneꞌ kuybꞌanile tiꞌ jet:
«Haꞌ mak chiꞌochen Komam Dios,
kaw yilal isxahannhenpaxo yuxhtaj,»
xhi Komam.