Kaw yuninalxa Komam Dios jehi
3
Wal xin txumweloj yinh ta mach isbꞌi hanta kaw isxahanil ayonh yu Komam Dios,
yuxin chonhyal Komam Dios yuninaloj.
Wal anma yet yul sat yibꞌanhqꞌinal tiꞌ,
kaw mach chiqꞌoji istxumniloj tato yuninalxa Komam Dios jehi.
Hakpax tuꞌ yaqꞌle Komam Jesucristo,
maxhtikꞌa txumchalo yu anma tato Iskꞌahol Komam Dios ye Komam.
2 Hex wuxhtaj,
hex wanabꞌ,
hex kaw xahan ay wuhtiꞌan,
kaw yuninalxa Komam Dios jehi,
yaj maxhto chisyelo isbꞌa sunil iskꞌulal Komam chiyaqꞌ jet.
Kaw johtaj tato yet chihul Komam Jesucristo tuꞌ,
kaw lahanxa chonheliko yebꞌi,
yuto chijilaꞌ yinh Komam hakaꞌ kaw yehi.
3 Sunilonh ayko huneꞌ tuꞌ yipo kokꞌul chikosajnhe janma yinh istxꞌojal,
hakaꞌ Komam Jesucristo kaw machi nino istxꞌojal yinh.
4 Haꞌ mak chako ismul chismanhkꞌo kuybꞌanile yet Komam Dios,
yuto yet chijaniko komul,
chikomanhkꞌo kuybꞌanile aykano jet yu Komam.
5 Johtaxa ta yu yinilo Komam Jesucristo mule,
yuxin hulikꞌo yul sat yibꞌanhqꞌinal tiꞌ,
machi xin nino ismul Komam.
6 Yuxin hanhonh ayonhxako yul isqꞌabꞌ Komam matxa chikowatxꞌe istxꞌojal.
Wal mak chito watxꞌen istxꞌojal,
maxhto yohtajo Komam,
maxhto chitxumchapaxo Komam yu.
7 Hex xahan ay wuhtiꞌan,
mach cheyaqꞌ subꞌchaho hebꞌa tet hunuxa maka.
Tato haꞌ istoholal chikowatxꞌe,
kaw kꞌulonhpaxo hakaꞌ Komam Jesucristo,
yuto hanhkꞌanhe kaw istoholal iswatxꞌe Komam.
8 Wal mak chito watxꞌen istxꞌojal,
kaw yet naj matzwalil yehi,
yuto kaw mulumtikꞌa naj matzwalil tuꞌ yettax iswatxꞌi yul sat yibꞌanhqꞌinal tiꞌ.
Wal Komam Jesucristo Iskꞌahol Komam Dios,
hulikꞌo yul sat yibꞌanhqꞌinal yunhe yetanto ismunil naj matzwalil tuꞌ.
9 Hanhonh pitzkꞌanajonhxa yinh Komam Dios,
matxa chikowatxꞌe istxꞌojal,
yuto ayxa isqꞌinal Komam yul janma,
matxa xin chikowatxꞌepaxo istxꞌojal yuto yuninalxa Komam jehi.
10 Hak tuꞌ xin,
chiyu isyenilo isbꞌa mak yuninal Komam Dios,
yebꞌ xin mak yuninal naj matzwalil,
yuto haꞌ mak mach chiwatxꞌen iskꞌulal yebꞌ xin mach xahano chil yet anmahil,
kaw mach yeto Komam Dios yehi.
Yilal koxahannhen kobꞌa hununonh
11 Huneꞌ kuybꞌanile tiꞌ heyabꞌe yettax heyaniko hebꞌa yul isqꞌabꞌ Komam Dios tato yilal koxahannhen kobꞌa hununonh.
12 Mach chijutewe kobꞌa hakaꞌ yute isbꞌa naj Caín,
naj tuꞌ yet naj matzwalil ye naj,
yuto ismaqꞌkamo naj yuxhtaj.
¿Tzet yinh ismaqꞌkamo naj yuxhta tuꞌ?
Yuto kaw iskꞌulal iswatxꞌe yuxhta naj,
wal naj Caín tuꞌ machiswalil tzet iswatxꞌe naj.a
13 Hex wuxhtaj,
hex wanabꞌ,
mach cheyaqꞌ kꞌayo hekꞌul ta chichiwako iskꞌul anma yet sat yibꞌanhqꞌinal tiꞌ teyinh.
14 Yet yalanhto,
ayonhiko yul isqꞌabꞌ kamikal mach istanhbꞌal,
wal tinanh xin,
kaw xaꞌaqꞌlax huneꞌ koqꞌinal mach istanhbꞌal.
Kaw johta huneꞌ tuꞌ yuto kaw xahan chijil kobꞌa hununonh.
Tato mach xahano chijil kobꞌa hununonh,
kaw ayonhtoko yul isqꞌabꞌ kamikal.
15 Tato chichiwa kokꞌul jinh hununonh,
kaw lahan yebꞌ maqꞌomkamo anmahonh.
Wal hex hex tiꞌ xin,
kaw heyohtaj ta mach hunu naj maqꞌomkamo anma chischah isqꞌinal tet Komam Dios.
16 Johtaxa tzet chalilo koxahannhen kobꞌa,
yuto yaqꞌkamo isbꞌa Komam Jesucristo jinh;
hakonhpax tuꞌ hinanojabꞌonh jaqꞌni kamo kobꞌa yinh hunu juxhtaj.
17 Yajaꞌ qꞌinalo ta ay hunu mak ay tzet aya,
tonhe xin chil yekꞌ yuxhta yinh manhtzetal,
machi xin chikolwa yinh,
chal yelapnoj tato kaw machi iskꞌulchꞌanil Komam Dios yul yanma.
18 Hex kaw xahan ay hex wuhtiꞌan,
kaw machnhehojabꞌtaj kotiꞌ chalni ta xahan chijil juxhtaj,
kaw yilal kokolwa yinh,
hak tuꞌ xin chiyu koyeniloj tato kaw xahan chijil kobꞌa hununonh yinh kaw isyelal.
Ayxako janma yinh Komam Dios
19-20 Hakton tuꞌ xin,
chiyu johtanheniloj tato kaw yinh istꞌinhanil ayonhikoj,
yuxin matxa chonhxiw yinh sat Komam Dios yet chitzotel janma tato ay hunu istxꞌojal ayko jinh,
yuto ekꞌbꞌal Komam kosataj,
yohta Komam sunil tzet chiꞌekꞌ yul janma.
21 Yajaꞌ xin hex wuxhtaj hex wanabꞌ,
hex xahan ay wuhtiꞌan,
tato kaw aqꞌankꞌulal ye janma,
ta kaw machi kotxꞌojal chijabꞌe,
kaw mach chonhxiw jok sata Komam Dios.
22 Hak tuꞌ xin chaqꞌ Komam sunil tzet chikoqꞌan tet,
yuto chikoyije sunil ischejbꞌanil Komam,
yebꞌ chikowatxꞌe tzet choche iskꞌul.
23 Haꞌ ischejbꞌanil Komam Dios halbꞌilkano jet,
haꞌ ton janayto yul janma yinh Iskꞌahol Jesucristo,
yebꞌ xin koxahannhen kobꞌa hununonh,
hakaꞌ yute yalnikano Komam jet.
24 Tato chikoyije tzet chal Komam,
kaw ayxako Komam jetbꞌiho chal tuꞌ,
yebꞌ ayonhxako yul isqꞌabꞌ Komam.
Kaw xin johtaj tato ayko Komam Dios jinh,
yu Komam Espíritu Santo xayaqꞌ Komam jet.