3 Ta chikoyije kuybꞌanile aqꞌbꞌilkano yu Komam Dios,

chal yelapnoj huneꞌ tuꞌ ta xajohtanhelo Komam.

4 Yajaꞌ tato chijala ta kaw johtaxa Komam Dios,

yaj ta mach chikoyije kuybꞌanile aqꞌbꞌilkano jet yu Komam,

kaw leqꞌtiꞌonh chal tuꞌ,

mach isyelal ayko jinh.

5 Wal tato kaw chikoyije tzet chal Komam tuꞌ xin,

yinh kaw yeli hak tuꞌ chu isyenilo iskꞌulchꞌanil iskꞌul Komam jinh yinh istoholal.

Hak tuꞌ xin chiyu johtanheniloj tato kaw hunxa je yebꞌ Komam.

6 Ta chijala tato kaw hunxa je yebꞌ Komam Dios,

kaw yilal kobꞌeybꞌalnhen hakaꞌ tzet iswatxꞌe Komam Jesucristo yet yekꞌ Komam yul sat yibꞌanhqꞌinal tiꞌ.

7 Wuxhtaj,

wanabꞌ,

huneꞌ chejbꞌanile chiwaltojan teyet tiꞌ,

kaw mach akꞌto heyabꞌeni.

Kaw xatikꞌa hal-lax heyabꞌeꞌ yettaxtikꞌa heyaniko hebꞌa yul isqꞌabꞌ Komam Dios.

Kaw xin heyohtaxa huneꞌ chejbꞌanile tiꞌ,

huneꞌ chihalni tato kaw yilal koxahannhen kobꞌa hununonh.

8 Walka xin payxa aqꞌbꞌilkano huneꞌ chejbꞌanile tiꞌ,

yaj hakaꞌ hunu kaw akꞌto chiwute walnitojan teyet,

yuto haꞌ Komam Jesucristo hul watxꞌenokano yinh kaw istꞌinhanil.

Lanhanpaxo xin isyenilo isbꞌa huneꞌ kuybꞌanile tiꞌ texol,

yuxin haxa huneꞌ issajilqꞌinal,

haꞌxa chimujli yinh heyanma,

hak tuꞌ xin chu yelkano qꞌejholo teyinh.

9 Tato chijala ta kaw ayxako issajilqꞌinal Komam Dios yinh janma,

yaj ta chito chíwa kokꞌul yinh hunu juxhtaj maka janabꞌ,

kaw aytoko qꞌejholo yinh janma.

10 Wal tato kaw xahan chijil juxhtaj yebꞌ janabꞌ,

kaw ayxako issajilqꞌinal yul janma,

matxa tzet chonhaqꞌni aykꞌayoj.

11 Yajaꞌ ta chichiwa kokꞌul jinh hununonh,

chaliloj ta ayonhtoko xol qꞌejholo,

yebꞌ ta lanhan kobꞌelwi xol qꞌejholo tuꞌ,

mach johtajo bꞌay kaw kotokoj yuto qꞌejholo tuꞌ chiꞌaqꞌni tanho komujlubꞌal.

12 Hex xahan ay wuhtiꞌan,

chintzꞌibꞌnhetojan hunteqꞌan tiꞌ teyet,

yuto xaꞌel hemul teyibꞌanh yu Komam Dios yu Komam Jesucristo.

13 Hex mame miꞌe,

chintzꞌibꞌnhetojan huneꞌ tiꞌ teyet,

yuto kaw heyohtaxa Komam ayxatikꞌa yet maxhto chiwatxꞌi yul sat yibꞌanhqꞌinal tiꞌ.

Hakpax tuꞌ xin hex tzehtaj,

kaw chintzꞌibꞌnhepaxtojan huneꞌ tiꞌ teyet,

yuto kaw xakexqꞌoji yinh naj matzwalil.

Wal hex akꞌto hex yinh Istzotiꞌ Komam Dios,

kaw chintzꞌibꞌnhetojan huneꞌ tiꞌ teyet,

yuto heyohtaxa Komam ay bꞌey yul satkanh.

14 Hex mame miꞌe,

chintzꞌibꞌnhepaxtojan huneꞌ tiꞌ teyet,

yuto kaw heyohtaxatikꞌa Komam ayxatikꞌa yet yalanhto maxhto chiwatxꞌi yul sat yibꞌanhqꞌinal tiꞌ.

Hex tzehtaj,

kaw chintzꞌibꞌnhepaxtojan huneꞌ tiꞌ teyet yuto kaw ay heyip heyaniko Istzotiꞌ Komam Dios yinh heyanma.

Yu huneꞌ tuꞌ xin,

kexqꞌoji yinh naj matzwalil.

15 Wal xin mach cheyako heyanma yinh huneꞌ yul sat yibꞌanhqꞌinal tiꞌ,

yebꞌ sunil tzet ay sat.

Tato cheyako heyanma yinh tzet ay sat yibꞌanhqꞌinal tiꞌ,

mach ayoko heyanma yinh Komam Dios,

chal tuꞌ.

16 Yuto istxꞌojal chiyaqꞌ yul sat yibꞌanhqꞌinal tiꞌ,

yettikꞌa yul sat yibꞌanhqꞌinal tiꞌ yehi,

maxhtaj yinh Komam Dios chitita,

haꞌ ton xin hunteqꞌan tiꞌ:

Istxꞌojal tzet choche konimanil,

yebꞌ istxꞌojal tzet choche kosat yilaꞌ,

yebꞌpaxo kololoꞌnhen kobꞌa yinh tzettaj ay yul sat yibꞌanhqꞌinal tiꞌ.

17 Huneꞌ yul sat yibꞌanhqꞌinal tiꞌ yebꞌ sunil istxꞌojal chaqꞌa,

chiꞌapni istiempohal bꞌay chitanhiloj,

yaj tato haꞌ tzet choche iskꞌul Komam Dios chikowatxꞌe,

wal tuꞌ ay koqꞌinal mach istanhbꞌal.

18 Hex kaw xahan ay wuhtiꞌan chiwalan teyet,

kaw ayonhxako yinh islahobꞌal tiempo.

Hex tiꞌ xaheyabꞌe ta chihul naj Anticristo,

naj ayko ishowal yinh Komam Jesucristo.

Yajaꞌ tinanh xin txꞌiꞌalxa ebꞌnaj ayko ishowal yinh Komam xaꞌisyelo isbꞌa,

yuxin chikonaloj tato kaw yinhxa islahobꞌal tiempo ayonh.

19 Kaw koxol elna hunteqꞌan ebꞌnaj tuꞌ,

yaj yinh kaw yeli mach jetbꞌiho kobꞌa yebꞌ ebꞌnaj.

Qꞌinalo tato jetbꞌi kobꞌa yebꞌ ebꞌnaj,

kaw machim ispohilo isbꞌa ebꞌnaj koxol,

jetbꞌimi kobꞌa yebꞌ ebꞌnaj tinanh.

Yaj kaw ispohilo isbꞌa ebꞌnaj koxol yunhe isyenilo isbꞌa tato kaw mach jetbꞌiho kobꞌa yebꞌ ebꞌnaj.

20 Wal xin xayaqꞌ Komam Jesucristo Komam Espíritu Santo jet,

yuxin kaw kosunil johtaxa isyelal Komam Dios.

21 Kaw chintzꞌibꞌnhetojan huneꞌ incartatiꞌan teyet,

maxhtaj yu mach heyohtajoj bꞌaytet isyelal Komam Dios,

to kaw heyohtaxa;

kaw heyohtaxapaxoj tato machi hunu leqꞌtiꞌal chitit yinh kuybꞌanile isyelal chala.

22 Chiwalan teyet makta kaw leqꞌtiꞌwom tuꞌ,

haꞌ ton mak chihalni tato Komam Jesús mach Cristohoj.

Haꞌ ton mak tuꞌ ayko ishowal yinh Komam,

yuto mach chiyayto yul yanma yinh Komam Dios,

yebꞌ yinh Iskꞌahol Komam.

23 Haꞌ mak chihalni tato mach Iskꞌaholo Komam Dios ye Komam Jesucristo,

kaw mach ayayto Komam yul yanma.

Walpaxo mak chihalni tato Iskꞌahol Komam Dios ye Komam Jesucristo,

haꞌ huneꞌ mak tuꞌ yet Komam yehi.

24 Haꞌ huneꞌ kuybꞌanile jabꞌe yettax janiko kobꞌa yul isqꞌabꞌ Komam Dios,

kaw xin yilal wal yeko yul janma.

Tato kaw wal yeko huneꞌ kuybꞌanile tuꞌ yul janma,

wal tuꞌ hunelnhe jeko yinh Komam Dios,

yebꞌpaxo yul isqꞌabꞌ Iskꞌahol.

25 Haꞌ tzet haltebꞌilkano jet yu Komam Jesucristo,

haꞌ ton qꞌinal mach istanhbꞌal.

26 Kaw chintzꞌibꞌnhetojan hunteqꞌan tiꞌ teyet,

yuto ay mak choche kexyaqꞌaꞌ subꞌchahoj.

27 Wal hex hex tiꞌ,

aqꞌbꞌilxa Komam Espíritu Santo teyet yu Komam Jesucristo,

yuxinto mach yechelto ay mak chexkuyni;

yuto haꞌ Komam Espíritu Santo chexkuyni yinh sunil tzettaj ye tuꞌ.

Haꞌ xin kuybꞌanile chaqꞌ Komam Espíritu Santo kaw yeli,

machi nino leqꞌtiꞌal ayko yinh.

Yuxin kaw hunelnhehojabꞌ cheyutekaniko hebꞌa yul isqꞌabꞌ Komam Jesucristo,

hakaꞌ chute yalni Komam Espíritu Santo jet.

28 Tinanh xin hex kaw xahan ay wuhtiꞌan,

kaw hunelnhehojabꞌ jeko yinh Komam Jesucristo yunhe mach chonhxiw tet Komam yet chihul hunelxa yebꞌ mach chonhtxꞌixwikanh sataj yet chihul tuꞌ.

29 Wal xin johtaxa tato istoholalnhetikꞌa tzet chiswatxꞌe Komam,

yuxin tato kaw yinh istoholal chonhbꞌelwi,

haꞌ chiyeniloj ta yuninal Komam jehi.