Tzet chꞌeliko ebꞌnaj qꞌalom
5
Hex qꞌalom hex tiꞌ,
abꞌewekanoj.
¡Oqꞌanhwe yinh kaw ip teyinh yuto lanhan yul istiempohal bꞌay chꞌekꞌoyaꞌ heyanma!
2 Sunil heqꞌalomal lanhan isqꞌatoj,
haxa sunil xil heqꞌap lanhan iskꞌuxnito noꞌ ih.
3 Sunil hemelyu tenbꞌabꞌil xin,
ayxa isqꞌuxewal chꞌen,
haꞌ chinhuswaho teyinh yul sat Komam Dios kat kexistanhtzeniloj,
hakaꞌ istzꞌato hunu tzet ye tuꞌ yul qꞌaꞌ.
Haꞌ heqꞌalomal tenbꞌabꞌil heyu tuꞌ,
haꞌ chꞌoko aqꞌokꞌule teyinh yinh islahobꞌal tzꞌayik.
4 Hanta istohol ebꞌnaj hemunlawom mach heyaqꞌ yinh hemunil.
Haꞌ huneꞌ tuꞌ xin chitit istzꞌaktiꞌal teyibꞌanh,
yuto xayabꞌe Komam Dios yel yaw ebꞌnaj munlawom tuꞌ,
Komam yahawil yinh ebꞌnaj ángel ay satkanh.
5 Hex qꞌalom hex tiꞌ,
kaw xaheyaqꞌ yoche heyanma yul sat yibꞌanhqꞌinal tiꞌ,
yinh sunil tzet cheyoche.
Kaw bꞌaqꞌich hexxa,
hakaꞌ noꞌ wakax kaw bꞌaqꞌich,
lanhanxa yapni istiempohal ispotxꞌlaxi.
6 Hex qꞌalom hex tiꞌ chekawxeko ismul anma yibꞌanh,
hunteqꞌan iskꞌulalnhe chiswatxꞌe.
Cheyaqꞌnipaxo kamo ebꞌnaj yu mach chu iskolni isbꞌa ebꞌnaj teyet.
Nimanojabꞌ cheyute hekꞌul masanta yet chul Komam Jesucristo
7 Hex wuxhtaj,
hex wanabꞌ,
niman cheyute hekꞌul masanto yet chul Komam Jesucristo;
hakaꞌ chu hunu naj munlawom niman iskꞌul naj yechman yaqꞌni haꞌ bꞌabꞌel nhabꞌ yebꞌ haꞌ islahobꞌal nhabꞌ.
Nimanpaxo chute iskꞌul naj yechman yelilo sat istzꞌunubꞌ.
8 Hakojabꞌ tuꞌ cheyute,
nimanojabꞌ cheyute hekꞌul.
Linhbꞌawe hebꞌa yinh Komam,
yuto toxa chul Komam Jahawil.
9 Wuxhtaj,
wanabꞌ,
mach chexok aqꞌokꞌule teyinh hunun hex,
haxinwal yet chꞌapni istzꞌayikal yil-laxi tzet chexelikoj,
mach hemul chꞌilcha yu Komam.
Yuto haꞌ Komam alkal yekoj,
kawilxa yeti Komam.
10 Wuxhtaj,
wanabꞌ haꞌ ebꞌyaꞌ ischejabꞌ Komam Dios halni Istzotiꞌ Komam yet payat techa yu ebꞌyaꞌ yijlen isyaꞌtajil,
kaw aypaxo isnimanil iskꞌul ebꞌyaꞌ;
yuxin techahojabꞌ heyu hakaꞌ yaqꞌle ebꞌyaꞌ tuꞌ.
11 Haꞌ mak ay isnimanil iskꞌul istecha isyaꞌtajil yu,
chijalanh ta kaw saqꞌal yet.
Hex tiꞌ xaheyabꞌe yinh tzet yu istecha isyaꞌtajil yu yaꞌ Job,
heyabꞌenpaxoj tzet yu iskolwa Komam Dios yinh yaꞌ yet tzujanxa,
yuto kaw kꞌul Komam Dios yebꞌ xin chitzꞌay iskꞌul Komam yinh anma.
12 Wal xin hex wuxhtaj hex wanabꞌ,
ay huneꞌ kaw yilal yehi,
ta ay tzet choche hekꞌul cheyala mach cheyaqꞌ bꞌinaho satkanh maka txꞌo txꞌotxꞌ maka hunuxa tzet ye tuꞌ yaqꞌni isbꞌa yinh tzet cheyala.
Hayet cheyalni hoꞌ yelojabꞌ cheyala.
Hayet cheyalni machoj,
machojabꞌi;
haxinwal mach chexyato Komam yinh isyaꞌtajil.
13 Ta ay hunujex bꞌiskꞌulal heyehi,
okanhwe txahloj.
Taka tzalahilal heye xin,
bꞌitnhewe Komam Dios.
14 Ta ay mak yaꞌay,
yawtehabꞌ ebꞌyaꞌ anciano yet iglesia.
Haxa ebꞌyaꞌ anciano tuꞌ xin,
chitxahli yinh,
kat ismasniko ebꞌyaꞌ aceite yinh mak yaꞌay tuꞌ yinh isbꞌi Komam Jesucristo Jahawil.
15 Hayet chextxahli yinh sunil heyanma xin,
chikawxikanh huneꞌ mak yaꞌay tuꞌ,
haꞌ Komam Jahawil chiꞌinikanh,
ta ay ismul xin,
chaqꞌkano nimankꞌulal Komam yinh.
16 Yuxin yilal heyal-lenati hemul teyet hunun hex,
kat hetxahli yinh ebꞌnaj juxhtaj yebꞌ ebꞌix janabꞌ tet Komam,
kat heyanhchakanoj.
Yuto ebꞌnaj tohol isbꞌeybꞌal yul sat Komam Dios,
hayet chitxahli ebꞌnaj yinh sunil yanma,
kaw niman isyaxil chaqꞌkano Komam yu istxah ebꞌnaj tuꞌ.
17 Hakaꞌ yaꞌ Elías ischejabꞌ Komam Dios yet payat,
anma yaꞌ hakaꞌ hanhonh tiꞌ,
yajaꞌ yinh sunil yanma yaꞌ txahli tet Komam Dios yunhe mach chaqꞌ haꞌ nhabꞌ.
Yuxin mach yaqꞌ haꞌ nhabꞌ yikta iskanh habꞌil.
18 Hato yet istxahlipaxo yaꞌ hunelxa yichipaxiko yaqꞌni nhabꞌ.
Hak tuꞌ xin yaqꞌni sat tzꞌunubꞌ hunelxa.
19 Hex wuxhtaj,
hex wanabꞌ,
ta ay hunu mak texol chishekꞌilo isbꞌa yinh Istzotiꞌ Komam,
aypaxo xin hunujex chexok tzotelo tet,
kat ismeltzoko yul isqꞌabꞌ Komam hunelxa.
20 Ohtanhewekaniloj tato haꞌ huneꞌ mak chꞌinilo hunu naj mulum yinh istxꞌojal bꞌay aykoj,
lanhan iskolchalo huneꞌ mak mulum tuꞌ yul isqꞌabꞌ kamikal.
Hak tuꞌ xin txꞌiꞌalpaxo ismul huneꞌ mak tuꞌ chitanhkano yul sat Komam Dios.