Mach chu heyetbꞌinhen hebꞌa yebꞌ istxꞌojal
4
¿Bꞌay chititiko nimeta howal yebꞌ xin nixhte howal texol?
Wal xin yu hunteqꞌan istxꞌojal chimunla yul heyanma yuxin cheyaqꞌle howal.
2 Hex tiꞌ tzijxanhe tzet ye tuꞌ cheyochekoj,
yaj mach chexqꞌoji yinh,
yu huneꞌ tuꞌ xin chiꞌekꞌ yul hewiꞌ hepotxꞌwahi,
yebꞌ xin chichiwako hekꞌul yinh mak ay tzet aya.
Yu mach chu yok heyetoj,
yuxin chꞌah howal texol.
Wal xin mach chꞌaqꞌlax teyet tzet cheyoche tuꞌ yu mach cheqꞌan tet Komam Dios.
3 Waxanhka cheqꞌana,
yaj mach chꞌaqꞌlax teyet yuto mach kꞌulo chu heqꞌanni,
yuto yu heyetanto yinh istxꞌojal cheyoche.
4 Hex tiꞌ,
kaw mach yijemo hex,
yuto kaw cheyocheto heyok hewatxꞌeno tzet ye tuꞌ txꞌoj ay yul sat yibꞌanhqꞌinal tiꞌ.
Yu huneꞌ tuꞌ xin,
chexokkano howal yinh Komam Dios.
5 Tajka chꞌekꞌ yinh henabꞌal tato machi nichꞌano tzet yelapno ye Istzotiꞌ Komam Dios tzꞌibꞌnhebꞌilkano yul Hum,
bꞌay chala:
«Haꞌ Komam Dios anhekaniko Komam Espíritu Santo jinh,
Komam Espíritu tuꞌ xahan ayonh yu,
yuxin choche Komam ta hanhe Komam chikoxahannhe,»a
xhihayoj.
6 Yu iskꞌulchꞌanil iskꞌul Komam,
yuxin chikolwa Komam jinh.
Chalnipaxo yul Yum Komam hakaꞌ tiꞌ:
«Chitit ishowal Komam yinh anma kaw leqꞌtiꞌ chute isbꞌa.
Walpaxo mak chiyo isbꞌa xin,
kaw chitzala Komam Dios yinh,»b
xhihayoj.
7 Yuxin yijemojabꞌ chijute kobꞌa tet Komam Dios,
kat kopahnito naj matzwalil,
hak tuꞌ xin chꞌelkanh naj jet.
8 Hitzojonhweko iskꞌatanh Komam Dios,
haxinwal chihitziko Komam kokꞌatanh.
Hex mulum,
takojabꞌ hekꞌul teyinh yu istxꞌojal chewatxꞌe.
Hakaꞌ hexpaxo chito heyocheto yet yul sat yibꞌanhqꞌinal tiꞌ,
kat hexahannhenpaxo Komam heyalni,
kaw yilal hesajnhen heyanma yul sat Komam Dios.
9 Okojabꞌ bꞌiskꞌulal yinh heyanma,
takojabꞌ hekꞌul yet chenanitij.
Oqꞌanhwe sikꞌlebꞌil yu hemul hex kaw xakextzebꞌi yu heyochen istxꞌojal.
Okanhwe yinh oqꞌil hex kaw chextzala sikꞌlebꞌil yinh tzet chaqꞌ huneꞌ yul sat yibꞌanhqꞌinal tiꞌ,
meltzanhweko yinh bꞌiskꞌulal.
10 Iweyo hebꞌa tet Komam Dios,
hak tuꞌ xin chexilaxkanh yu Komam.
Machojabꞌ cheyal-le heqꞌumal
11 Hex wuxhtaj,
hex wanabꞌ,
mach cheyal-le heqꞌumal hunun hex;
yuto ta ay mak chihalni isqꞌumal yuxhtaj maka yanabꞌ,
lanhan yalni isqꞌumal chejbꞌanile yet Komam Dios.
Maka ta cheyala ta mach kꞌulo yeko hunu heyuxhtaj maka heyanabꞌ,
lanhan heyalni tato chejbꞌanile yet Komam mach kꞌuloj.
Hak tuꞌ xin lanhan heyaniko hebꞌa juesal yinh chejbꞌanile yet Komam tuꞌ,
mach xin lanhano heyijeni.
12 Haꞌ huneꞌ mak aqꞌnhe chejbꞌanile tuꞌ,
haꞌtikꞌa xin ayko juesal.
Haꞌ xin chu yaqꞌni kolbꞌanile yebꞌ xin chu konhyaniko yinh isyaꞌtajil.
Wal hunujonh xin mach chu jok jilno tzet chiꞌeliko hunu juxhtaj maka janabꞌ,
yuto hanhkꞌanhe Komam Dios chu yilni tzet chiꞌelikoj.
Mach johtajo tzet jeko hekal kabꞌe
13 Abꞌewekanoj hex cheyal hakaꞌ tiꞌ:
«Yet hekal maka yet kabꞌe chonhto munil yul huneꞌ niman konhobꞌ yinh hunu habꞌil.
Haꞌ bꞌey tuꞌ xin chijako hunu niman kotxonh,
hak tuꞌ xin kaw niman komelyu chikokutxbꞌa,»
kexchi.
14 Yajaꞌ mach heyohta tzet heyeko yet hekal maka kabꞌe.
Saqꞌal heyalni,
yajaꞌ kokawil yul sat yibꞌanhqꞌinal tiꞌ,
lahan yebꞌ nixhte moyan,
tonhe chisye isbꞌa hunep kat iskꞌaykanh.
15 Haꞌ huneꞌ wal heyalni:
«Ta chiꞌel yinh iskꞌul Komam Dios Jahawil,
aynhetikꞌa kokawil,
chikowatxꞌe huneꞌ tiꞌ maka huneꞌxa tuꞌ,»
haꞌ huneꞌ tuꞌ wal heyalni.
16 Yajaꞌ hex tiꞌ,
mach hako tuꞌ heyalni,
to haꞌ huneꞌ cheyala:
«Chikowatxꞌe huneꞌ tiꞌ,
kat kowatxꞌen huneꞌxa tuꞌ,»
kexchi yul heyet hechukil.
Haꞌ xin chalniloj ta mach cheyiyo hebꞌa tet Komam Dios.
Kaw xin txꞌoj huneꞌ tuꞌ yul sat Komam.
17 Ta johtaj ta kꞌul kowatxꞌen hunu tzet ye tuꞌ,
tzujan tuꞌ xin mach chikowatxꞌepaxoj,
chijako komul yul sat Komam Dios.