Ismul jaqꞌ
3
Hex wuxhtaj,
hex wanabꞌ,
mach komono cheyocheko heyok kuywawomal,
yuto heyohtaj ta hanhonh chonhkuywahi kaw ekꞌbꞌalto chiꞌil-lax yinh tzet chikowatxꞌe.
2 Kosunil ayto nixhtexa kotxꞌojal yinh tzet chikowatxꞌe,
yajaꞌ ta ay mak mach chꞌaykꞌay yinh istzoteli,
haꞌ huneꞌ mak tuꞌ kaw kꞌul,
yuto chupaxo isqꞌoji iskachni sunil isnimanil yinh ej istxꞌojal.
3 Chijakto chꞌen freno yul istiꞌ noꞌ cheh yunhe isyijen noꞌ tzet chijoche.
Hak tuꞌ xin sunil isnimanil noꞌ chito bꞌay chal kokꞌul.
4 Haktikꞌapax tuꞌ teꞌ barco kaw nimej teꞌ yaj waxanhka chul tinhna jaqꞌeqꞌ yinh teꞌ yaj hanhechꞌan nichꞌan timón chisbꞌaqꞌo naj chiꞌinikꞌo teꞌ haꞌ bꞌay chisyije teꞌ,
kat isto teꞌ bꞌay chal iskꞌul naj.
5 Hak tuꞌ ye nichꞌan jaqꞌ tiꞌ,
kaw nichꞌanchꞌan yaj kaw kanhye sikꞌlebꞌil,
hakaꞌ hunu nichꞌan tzꞌitqꞌaꞌ chu isnhusnilo hunu niman qꞌebꞌtalaj.
6 Hak tuꞌ ye jaqꞌ tiꞌ,
lahan yebꞌ qꞌa qꞌaꞌ,
mach isbꞌi hanta istxꞌojal ayko yinh;
yetbꞌi konimanil yehi yuxin sunil konimanil chu yetaxto yu.
Huneꞌ qꞌa qꞌaꞌ tuꞌ,
hakaꞌtikꞌa yul huneꞌ niman qꞌaꞌ mach istanhbꞌal chitit isqꞌaqꞌal,
hak tuꞌ xin chu yetaxkanto sunil kobꞌeybꞌal.
7 Hanhonh anmahonh tiꞌ chonhqꞌoji kokuyni sunil ej noꞌ xoltelajil noqꞌ;
noꞌ chꞌik,
noꞌ labꞌa yebꞌ ej no noqꞌ ay xol haꞌ mar.
8 Yajaꞌ wal jaqꞌ tiꞌ xin,
mach chonhqꞌoji kokuyni.
Lahan yebꞌ hunu istxꞌojal mach chaqꞌ kachaꞌ isbꞌa,
lahan hakaꞌ veneno chonhaqꞌni kamoj.
9 Haꞌtikꞌa jaqꞌ tiꞌ xin,
chalni kꞌul-la tzotiꞌ yinh Komam Dios Mame,
haꞌtikꞌa xin chihalni tzotiꞌ txꞌoj yinh jet anmahil watxꞌebꞌil yu Komam Dios.
Haꞌ anma tuꞌ xin,
yechel Komam yehi.
10 Yul kotiꞌ chꞌelti tzotiꞌ kꞌul,
yultikꞌapaxo kotiꞌ,
chꞌelpaxti tzotiꞌ txꞌoj.
Wal xin wuxhtaj,
wanabꞌ,
mach cheyute hebꞌa hakaꞌ tuꞌ.
11 Hakaꞌ hunu isnuqꞌ ha haꞌ tinanh,
mach chiꞌahilo ha haꞌ chiꞌ yebꞌ xin ha haꞌ kꞌah.
12 Hakpax tuꞌ hunu yoj teꞌ higo,
mach chu yaqꞌni teꞌ sat teꞌ aceituna,
yebꞌ hunu yoj teꞌ uva mach chu yaqꞌni teꞌ sat teꞌ higo.
Hakpax tuꞌ isnuqꞌ hunu ha haꞌ,
mach chu yahilo ha haꞌ chiꞌ yebꞌ xin haꞌ kꞌachiꞌ.
Kohelanil chitit tet Komam Dios
13 Ta ay hunu mak texol kaw ay isnabꞌal yebꞌ xin kaw ay ishelanil,
isyebꞌabꞌilo yinh iskꞌulal chiswatxꞌe,
yiqꞌabꞌayo isbꞌa yu huneꞌ ishelanil tuꞌ.
14 Yaj ta aynhetikꞌako chichonkꞌulal kaw kꞌah yul heyanma,
yebꞌ xin ekꞌbꞌal cheyute hebꞌa yibꞌanh heyet anmahil,
kat xin heyalnipaxo hebꞌa kꞌulal,
wal xin kaw leqꞌtiꞌ hex.
15 Matxataj tet Komam Dios chitit huneꞌ yitzꞌatil wiꞌe tuꞌ,
to yetxa sat yibꞌanhqꞌinal tiꞌ yehi,
yetxa anma ye huneꞌ yitzꞌatil hewiꞌ tuꞌ,
yinh naj matzwalil chitita.
16 Ta aytoko chichonkꞌulal jinh,
yebꞌ xin ta hanhonhnhe chijoche chꞌok kowinajil,
ta hak tuꞌ mach lanhano kobꞌelwi yinh istxolal,
kaw xin ayto sunil istxꞌojal jinh.
17 Ta tet Komam Dios chitit kohelanil,
matxa chonhekꞌ yinh istxꞌojal,
wal xin chonhekꞌ yinh aqꞌankꞌulal.
Kꞌulchꞌan chijute kokꞌul,
kat istzꞌay kokꞌul yinh jet anmahil,
lahanpaxo jet anmahil yul kosat,
yebꞌ xin istꞌinhanilnhetikꞌa chijala.
18 Ta aqꞌankꞌulal chikowatxꞌe,
chikochah ispaj,
haꞌ ton istoholal.