Lahannhehojabꞌ koxahannhen anma
2
Hex wuxhtaj,
hex wanabꞌ,
hex xahechah Komam Jesucristo yul heyanma,
Komam kaw ay yelapno yehi,
lahannhehojabꞌ hexahannhen hebꞌa hesunil.
2 Qꞌinalo ta kutxanexikoj kat yapni hunu naj qꞌalom,
kaw nanxa islow jilni xil isqꞌap aykoj yinh yebꞌ ayko hunu isjolqꞌabꞌ nabꞌa oro,
lahwi tuꞌ kat yokpaxapno hunu naj kaw mebꞌaꞌ,
kaw xilxa xil isqꞌap aykoj.
3 Kaw xin kꞌul chu hechahni naj nanxa islow jilni xil isqꞌap ayko yinh tuꞌ,
kat heyalni tet naj:
«Tzꞌonhyanh yibꞌanh huneꞌ xhila kaw kꞌul tiꞌ,»
ta kexchi.
Wal tet naj mebꞌaꞌ xin cheyal hakaꞌ tiꞌ:
«Wal halinhi bꞌey tuꞌ,»
maka «Ayanh tzꞌonhno sat txꞌotxꞌ,»
ta kexchi.
4 Ta hak tuꞌ cheyute,
mach lahano chexahannhe ebꞌnaj juxhtaj yebꞌ ebꞌix janabꞌ.
Haꞌ xin chalniloj ta chexok heyilaꞌ yinh tzet ye heyet anmahil,
txꞌoj xin chenako yinh.
5 Hex wuxhtaj,
hex wanabꞌ,
txumweloj tato haꞌ Komam Dios sikꞌnikanh anma mebꞌaꞌ ay yul sat yibꞌanhqꞌinal tiꞌ yu yaqꞌni Komam isqꞌalomal tet yinh yanayto yul yanma yinh Komam,
kat ischahnipaxo yehobꞌal bꞌay chꞌok Komam Yahawil,
huneꞌ yalte Komam tet mak chꞌocheni.
6 Wal hexpaxo xin cheyah ebꞌnaj mebꞌaꞌ,
machi yelapno ebꞌnaj yul hesat.
¿Mak anmahil chexetani,
kat kexyinito sata naj alkal?
Haꞌ ton ebꞌnaj qꞌalom.
7 ¿Tom mach heyohtajoj tato haꞌ ebꞌnaj tuꞌ txꞌoj istzotel yinh Komam Jesucristo ayxako yul janma?
8 Ta kaw yeli cheyije isley Komam Dios hakaꞌ yalni Yum Komam bꞌay chala:
«Xahan cheyil heyet anmahil hakaꞌ heyaꞌilnhen hebꞌa,»
xhikanoj.
Ta hak tuꞌ cheyute kaw kꞌul heyekoj.
9 Yaj ta mach lahano chexahannhe hebꞌa,
cheyako hemul,
kat hekanpaxkano txꞌojal tet isley Komam Dios.
10 Ta chijala ta sunil ley chikoyije,
yajaꞌ ta ay hunuxa chejbꞌanile mach chikoyije,
chijako komul yinh sunil ley hakaꞌ tuꞌ.
11 Yuto haꞌtikꞌa Komam Dios halni:
«Mach chexixli,
mach chexpotxꞌwipaxo kamo anma,»
xhi Komam.
Yuxin ta ay mak mach chiꞌekꞌ ixloj,
yajaꞌ ta chispotxꞌkamo yet anmahil,
chiyako ismul tet ley hakaꞌ tuꞌ.
12 Yuxin nannhe heyu yinh tzet cheyalaꞌ,
yebꞌ yinh tzet chewatxꞌe,
yuto yilal yixtanhwiti yu huneꞌ ley yet Komam Jesucristo.
Huneꞌ ley xakonhbꞌejtzoniko yinh kowatxꞌen tzet choche Komam Dios.
13 Ta mach chitzꞌay kokꞌul yinh jet anmahil,
mach chitzꞌaypaxo iskꞌul Komam jinh yinh huneꞌ tzꞌayik yet chiyilni Komam Dios yinh tzet chiꞌeliko anma.
Yaj tato chitzꞌay kokꞌul yinh jet anmahil,
chitzꞌaypaxo iskꞌul Komam jinh.
Mach tonhehojabꞌ chonhtzoteli yilal kowatxꞌen tzet chijala
14 Hex wuxhtaj,
hex wanabꞌ,
tzet chaliloj ta ay mak ayko yanma yinh Komam yalni,
yaj ta machi nichꞌano iskꞌulal tzet chiswatxꞌe,
¿tom xin chikolchahi yu ayxa yanma yinh Komam yalni?
¡Machoj!
15 Qꞌinalo ta ay hunu juxhtaj maka hunu janabꞌ machi xil isqꞌap,
maka matzet chislo,
16 kat heyalni tet:
«Chawil habꞌa,
kꞌul chawute haqꞌuxni habꞌa,
waꞌanh yinh kaw kꞌul,»
ta kexchi.
Matzet xin cheyaqꞌpaxo tet,
¿tzettaxka chalilo huneꞌ tuꞌ?
17 Yuxin ta ay hex cheyala ta ayko heyanma yinh Komam,
machi xin chewatxꞌe iskꞌulal,
nabꞌnhe cheyala ta ayko heyanma yinh Komam Dios;
matzet chalilo huneꞌ tuꞌ.
18 Qꞌinalo ta ay hunu mak chihalni:
«Ayko wanmahan yinh Komam.»
Haxa hunxa mak xin chalpaxoj:
«Iskꞌulalnhe chinwatxꞌeꞌan.»
Chiwalan teyet,
mach ayoko Komam Dios yipo heyanma ta mach chewatxꞌe iskꞌulal.
Wal xin chinyehan teyet ta ayko Komam Dios yipo wanmahan yu chinwatxꞌehan iskꞌulal.
19 Hex tiꞌ,
cheyayto yul heyanma tato huneꞌnhechꞌan Komam Dios.
Kaw kꞌul huneꞌ tuꞌ,
yaj maxhnhetaj huneꞌ tuꞌ yilal yehi.
Hakpax tuꞌ ebꞌnaj ischejabꞌ naj matzwalil,
yohta ebꞌnaj tato huneꞌnhechꞌan Komam Dios.
Kaw xin chiluylunkanh ebꞌnaj xiwkilal yet chisnaniti ebꞌnaj Komam.
20 ¡Tzet hesukal!
Cheyala ta ayko heyanma yinh Komam,
machi xin chebꞌeybꞌalnhe tzet choche Komam.
Haꞌ xin chalniloj ta machi heyanma yinh Komam.
21 Naweti yinh jichmam Abraham;
isyije yaꞌ yinito iskꞌahol Isaac,
yinh xahanbꞌalil.
Yu tzet iswatxꞌe yaꞌ tuꞌ,
yuxin okkano yaꞌ kꞌulal yul sat Komam Dios.
22 Hak tuꞌ xin chu johtanheniloj ta yako yanma yaꞌ Abraham yinh Komam Dios,
yuto isyije yaꞌ tzet aqꞌlax iswatxꞌe,
hak tuꞌ xin yu isyenikanilo isbꞌa ta ayko yanma yaꞌ yinh Komam Dios.
23 Hak tuꞌ yu yijni isbꞌa yinh tzet halbꞌilkano yul Yum Komam Dios bꞌay chala:
«Kaw yako yanma yaꞌ Abraham yinh tzet yal Komam Dios,
yu huneꞌ tuꞌ xin kankano yaꞌ kꞌulal yul sat Komam,»
xhikanoj.
Yuxin yakaniko Komam yaꞌ Abraham tuꞌ yamigohoj.
24 Yuxin nachahojabꞌilo heyu tato chonhkankano kꞌulal yul sat Komam Dios yu tzet chikowatxꞌe,
maxhnhetaj yu janiko janma yinh.
25 Hak tuꞌ yupaxo huneꞌ ix ix txꞌoj ye iswiꞌ,
Rahab isbꞌi.
Kankano ix kꞌulal yul sat Komam Dios yu yaqꞌ ix bꞌay way ebꞌnaj ischejabꞌ yaꞌ Josué,
yebꞌ xin nanxa bꞌehal bꞌay ischejto ix ebꞌnaj yunhe mach chitzabꞌcha ebꞌnaj.
26 Hakaꞌ hunu nimanile matxa yanma ayiktoj,
kamomxa,
hak tuꞌ ye hunu mak chihalni ta ayko yanma yinh Komam Dios,
mach chisyijepaxo tzet chal Komam,
nabꞌanhe huneꞌ tuꞌ.