Hunteqꞌan yilal iswatxꞌen yuninal Komam Dios
13
Machojabꞌ chebꞌej hexahannhen hebꞌa hunun hex,
yuto heyuxhtaxa hebꞌa yinh Komam.
2 Machojabꞌ chenahulnheto heyaqꞌni bꞌay chiway mak chiꞌekꞌ tekꞌatanh,
yuto ay mak tiꞌ aqꞌni bꞌay chiway yet anmahil,
machi xin yohtajoj tato ángel ebꞌnaj ekꞌ iskꞌatanh.
3 Machojabꞌ chenahulnhepaxto ebꞌnaj ayikto yul preso,
hakojtam haꞌ hunex ayexiko preso yinta ebꞌnaj.
Nawepaxti makta chiꞌaqꞌlen isyaꞌtajil,
hakojtam hex hunex cheyaqꞌlepaxo isyaꞌtajil yintaj.
4 Hayet cheyiqꞌni heyetbꞌi,
ayojabꞌ yelapno mohyilal yul hesat;
yinhnhehojabꞌ heyetbꞌi cheyako heyanma,
yuto haꞌ mak chiꞌixli yebꞌ chiwinajli,
chiꞌay isyaꞌtajil yibꞌanh yu Komam Dios.
Yebꞌpaxo haꞌ mak maxhto chimohyi kat issayni ismul,
chiꞌaypaxo isyaꞌtajil yibꞌanh yu Komam.
5 Machojabꞌ cheyako heyanma yinh chꞌen melyu.
Aqꞌwe tzalaho hekꞌul yinh tzet ay yul heqꞌabꞌ,
yuto chal Komam Dios yul Yum:
«Machi bꞌaqꞌinhal chexinnahulnhetojan yebꞌ chexinbꞌejkanojan,»a
xhi Komam.
6 Yuxin sunil janma chijalni hakaꞌ tiꞌ:
«Haꞌ Komam Dios Jahawil chikolwa winhan,
yuxin mach chinxiwan yinh istxꞌojal choche anma iswatxꞌe winhan,»b
konhchi.
7 Machojabꞌ chenahulnheto ebꞌyaꞌ ijbꞌali teyinh yebꞌ halni Istzotiꞌ Komam Dios teyet.
Txumwekꞌanabꞌ yinh isbꞌeybꞌal ebꞌyaꞌ,
hakaꞌojabꞌ yu yaniko yanma ebꞌyaꞌ yinh Komam Dios hakojabꞌ tuꞌ heyaniko heyanma yinh Komam.
8 Komam Jesucristo huneꞌnhetikꞌa haꞌ Komam,
haꞌ Komam yet payxa,
haꞌ Komam tinanh,
haꞌpaxo Komam yinh sunilbꞌal tiempo.
9 Mach cheyaqꞌ subꞌchaho hebꞌa tet hunteqꞌan nan kuybꞌanile mach ohtabꞌilo ju.
Haꞌojabꞌ yinh iskꞌulchꞌanil iskꞌul Komam Dios chiyiqꞌ yip janma,
maxhtaj yinh hunteqꞌan chejbꞌanile yinh tzet chilolaxi,
yuto hunteqꞌan tuꞌ matzet chijiqꞌ yinh.
10 Hanhonh tiꞌ nanxa huneꞌ koxahanbꞌal;
ebꞌyaꞌ sacerdote ayko yalanh isley yaꞌ Moisés,
machi yok ebꞌyaꞌ yinh iskꞌuxni huneꞌ xahanbꞌal tiꞌ.
11 Ebꞌyaꞌ yahawil sacerdote chikto ebꞌyaꞌ ischikꞌil no noqꞌ yul Ehobꞌal ekꞌbꞌal Txahul isbꞌi,
haꞌ chaqꞌbꞌalnhe ebꞌyaꞌ yinh ismul anma;
yajaꞌ wal isnimanil no noqꞌ tuꞌ istxam konhobꞌ chinhuslaxi.
12 Hakpax tuꞌ yu Komam Jesús,
kam Komam istxam konhobꞌ Jerusalén yunhe issajnhenkano Komam yanma anma yu ischikꞌil.
13 Yuxin elojonhweto hakaꞌ bꞌay ilaxilto Komam istxam konhobꞌ tuꞌ,
haꞌ chal yelapnoj haꞌ hunonh chiꞌaqꞌlax elo kotxꞌixobꞌal yinta Komam.
14 Yuto maxhtaj yul sat yibꞌanhqꞌinal tiꞌ ay huneꞌ kokonhobꞌ ay yinh hunelnhe,
wal xin haꞌ huneꞌ kokonhobꞌ ay yinh sunilbꞌal tiempo haꞌ bꞌay ayto janma.
15 Yuxin jalaꞌwe kꞌul-la tzotiꞌ yinh Komam Dios sunilbꞌal tiempo yu Komam Jesucristo.
Haꞌ huneꞌ koxahanbꞌal chijaqꞌ tet Komam,
haꞌ ton kobꞌitnhen isbꞌi Komam yu kotiꞌ.
16 Machojabꞌ chenahulnheto hewatxꞌen iskꞌulal yebꞌ hekolwa yinh tzet ay hex yinh heyet anmahil,
yuto haꞌpaxo hunteqꞌan tuꞌ koxahanbꞌal tet Komam Dios,
kaw xin chitzala Komam yinh.
17 Yijewe yinh tzet chal ebꞌyaꞌ chiꞌijbꞌali texol,
watxꞌewe tzet chal ebꞌyaꞌ yuto haꞌ ebꞌyaꞌ chexiptzeni,
yebꞌ xin haꞌ ebꞌyaꞌ chihalni tet Komam Dios yinh tzet chewatxꞌe.
Yuxin aweko yinh hekꞌul hewatxꞌen iskꞌulal,
haxinwal yinh tzalahilal chitaqꞌwi ebꞌyaꞌ teyinh tet Komam,
mach yinho bꞌiskꞌulal,
ta mach xin mach chechah iskꞌulal.
18 Hanhonhtiꞌanh kꞌul kobꞌeybꞌalanh,
machi istxꞌojal nabꞌil juhanh.
Txahlanhwe jinhanh yuto chijochehanh chonhekꞌanh yinh sunil iskꞌulal.
19 Haꞌ huneꞌ kaw yilal chinqꞌanpaxojan teyet ta chextxahli winhan tet Komam Dios,
haxinwal ta hak tuꞌ chiꞌel yinh iskꞌul Komam,
chinapnihan kexwilaꞌan yinh anhe.
Qꞌanlax iskꞌulal yibꞌanh ebꞌnaj juxhtaj yebꞌ ebꞌix janabꞌ
20 Haꞌojabꞌ Komam Dios yahawil aqꞌankꞌulal yebꞌ aqꞌni itzitzbꞌokanh Komam Jesús xol kamom,
Komam kotanhemal yebꞌ xin tꞌinhbꞌankano istrato Komam Dios mach istanhbꞌal yu ischikꞌil.
21 Haꞌojabꞌ Komam Dios tuꞌ chiꞌaqꞌni hehelanil hewatxꞌen sunil iskꞌulal,
haxinwal chewatxꞌe tzet chal iskꞌul Komam kat iswatxꞌen Komam tzet choche iskꞌul teyinh yu Komam Jesucristo.
¡Jaqꞌaꞌweko ismay Komam Dios yinh sunilbꞌal tiempo!
Hakojabꞌ tuꞌ.
22 Hex wuxhtaj hex wanabꞌ,
chinqꞌanan teyet niman cheyute hekꞌul hechahni hekuybꞌanil chiwaltojan teyet tiꞌ,
hanikꞌnhe tzet xin chiwaltojan teyet yul huneꞌ incartatiꞌan.
23 Chiwaltojan teyet ta xabꞌejtzolax juxhta Timoteo.
Ta pet chul naj inkꞌatanhan chito naj wintajan yet chintohan kexwilnojan.
24 Halwe tet ebꞌyaꞌ chiꞌijbꞌali teyinh ta chil isbꞌa ebꞌyaꞌ yebꞌ sunil mak ayxako yul isqꞌabꞌ Komam.
Ebꞌnaj juxhtaj yebꞌ ebꞌix janabꞌ ay yul ismajul Italia tiꞌ chalto ta cheyil hebꞌa yinh hekawil.
25 Yaqꞌabꞌayo Komam Dios iskꞌulchꞌanil iskꞌul teyibꞌanh hesunil.
¡Hakojabꞌ tuꞌ!