Yinhnhe Komam Jesús chijako konabꞌal
12
Yuxin kotxumuꞌloj ta hakaꞌ hoybꞌilonh yu sunil makta yayto yul yanma yinh Komam Dios,
yuxin kobꞌejaꞌwekano sunil tzet chonhetantoj yebꞌ mule chonhaqꞌni aykꞌayoj;
kat jaqꞌni janma kolahniko yinh huneꞌ anhe bꞌay ayonhikoj.
2 Jaqꞌaꞌweko konabꞌal yinh Komam Jesús,
yuto haꞌ Komam aqꞌni pitzkꞌaho janayto yul janma yinh Komam Dios,
haꞌ Komam xin chitzꞌajbꞌanpaxkanoj.
Yako isbꞌa Komam yul isqꞌabꞌ kamikal yinh teꞌ kulus,
machi xin yok yinh waxanhka kaw txꞌixobꞌal huneꞌ kamikal tuꞌ,
yuto yohta Komam ta lahwi yekꞌyaꞌ yanma tuꞌ kat ischahni tzalahilal.
Tinanh xin tzꞌonhan Komam yinh iswatxꞌqꞌabꞌ Komam Dios.
3 Yuxin txumwe yinh tzet yu yaqꞌni techaho Komam Jesús isyaꞌtajil yu anma mulum,
haxinwal mach chitibꞌayo heyu yebꞌ xin mach chexpax teyintaj.
4 Waxanhka ayko ip heyu heqꞌoji yinh istxꞌojal,
yajaꞌ maxhto hunujex tiꞌ cheyabꞌe isyaꞌil kamikal.
5 Yajaꞌ xin xato nahul heyu yinh tzet chal Komam Dios jet yul Yum hanhonh konhyuninal,
bꞌay chala:
«Kꞌahol,
machojabꞌ chiskaj hawiꞌ yet chaxhiskuyni Komam Dios Jahawil.
Machojabꞌ xin chaxhmeltzo tawintaj yet chaxhiskachni Komam.
6 Yuto haꞌ mak xahan ay yu Komam chako Komam yinh istoholal.
Haxa mak chischah Komam yuninaloj chayo Komam isyaꞌtajil yibꞌanh yu iskuychahi,»a
xhi yul Yum Komam.
7 Chahwe isyaꞌtajil chati Komam Dios teyibꞌanh yu hekuychahi,
yuto kexyuninalxa Komam yuxin hak tuꞌ chexyute.
¿Tom ay hunu naj kꞌahole tiꞌ mach chikuylax yu ismam?
8 Yajaꞌ ta mach chayo Komam isyaꞌtajil yu hekuychahi hakaꞌ chu Komam yinh makta yuninalxa,
chal yelapno chal tuꞌ ta mach kexyuninaloj,
lahan hex hakaꞌ nixhte unin machi ismam.
9 Konabꞌawetij hakaꞌ yet nixhte uninonh,
aqꞌlax kokachbꞌanil yu komam yebꞌ yu komiꞌ,
kaw xin jabꞌe yinh tzet yala,
¿hatom xin tzet chal Komam Dios ay yul satkanh,
mach chikoyije yunhe kochahni koqꞌinal?
10 Komam komiꞌ tuꞌ konhiskach hanikꞌ tiempohal hakaꞌ yoche iskꞌul,
hajxam Komam Dios chonhiskach Komam yu iskꞌulalo jinh,
yunhe jelkaniko hakaꞌ Komam,
Komam machi nino istxꞌojal yinh.
11 Yinh kaw yeli yet chihul isyaꞌtajil jibꞌanh yu kokuychahi,
mach chitzala kokꞌul yet chihul jibꞌanh,
wal xin to bꞌiskꞌulal chulo kokꞌul,
yajaꞌ lahwi tuꞌ chaqꞌni istoholal jet yebꞌ aqꞌankꞌulal makonh bꞌay chiꞌalaxayo isyaꞌtajil tuꞌ.
Kaw ay ismay ta chikobꞌejkano jabꞌento tzet chal Komam Dios
12 Wal hex hakaꞌtanhe paxna yip heqꞌabꞌ yebꞌ heyoj,
aqꞌwe heyanma yok yip heqꞌabꞌ yebꞌ heyoj tuꞌ.
13 Saywelo huneꞌ bꞌeybꞌale kaw tohol haxinwal chiꞌanhcha heyoj,
hak tuꞌ xin matxa kaw chiꞌahkanh iskotxqꞌahi.
14 Aweko yinh hekꞌul heyekꞌ yinh aqꞌankꞌulal yebꞌ sunil anma,
machojabꞌ nino istxꞌojal teyinh,
yuto haꞌ mak chibꞌeybꞌalnhen istxꞌojal mach chiyil yinh Komam Dios.
15 Kaw cheyil hebꞌa,
haxinwal machi hunujex chebꞌej hechahni iskꞌulchꞌanil iskꞌul Komam Dios chaqꞌ jet,
yebꞌ yunhe mach chipitzkꞌa chichonkꞌulal texol yuto ta hak tuꞌ txꞌiꞌal hex chexetaxto yu,
lahan hakaꞌ teꞌ howla telaj chikam anma yu.
16 Machojabꞌ hunujex tiꞌ chexekꞌ yinh ixloj,
yebꞌ xin machojabꞌ hunujex cheyah iskꞌulal chaqꞌ Komam Dios teyet hakaꞌ yute naj Esaú;
ishelto naj issabꞌehal yet bꞌabꞌel kꞌahole yinh huneꞌ sekꞌ itah.
17 Kaw heyohtaj ta haxa yet tzujanilxa yet yochen naj ischabꞌ ismajul yebꞌ iskꞌulal Komam Dios,
hakaꞌ chiꞌaqꞌlax tet ebꞌnaj bꞌabꞌel kꞌahole,
matxa aqꞌlax tet naj,
waxanhka kaw oqꞌ naj sikꞌlebꞌil,
yajaꞌ matxa tzet tzꞌaj yuteꞌ isbꞌa naj.
18 Hex tiꞌ mach hitznajexiko yinh hunu tzet ye tuꞌ chisje kotzabꞌni,
hakaꞌ yu ishitziko ebꞌnaj jichmam Israel yinh witz Sinaí,
huneꞌ witz bꞌay kaw ah xaj qꞌa qꞌaꞌ yinh,
bꞌay kaw qꞌejholiloj yebꞌ bꞌay kaw nhirla kꞌuh.
19 Machi xin heyabꞌe yoqꞌ chꞌen trompeta yebꞌ istzotelpaxo Komam Dios.
Hayet yabꞌen ebꞌnaj istzotel Komam tuꞌ,
yok ebꞌnaj yalnoj ta matxa chitzotel Komam,b
20 yuto machi techa huneꞌ chejbꞌanile yu ebꞌnaj,
huneꞌ chalni hakaꞌ tiꞌ:
«Tato ay hunu mak chayo yoj yibꞌanh witz tiꞌ maka hunu no noqꞌ,
yilal isqꞌojlaxkamoj maka chitejlaxkamo yu chꞌen lanza,»
xhi.
21 Kaw xiwkilta tzet yil ebꞌnaj tuꞌ,
yuxin haꞌ hun yaꞌ Moisés halni hakaꞌ tiꞌ:
«Kaw chinluylunkanhan yu xiwkilal,»
xhi yaꞌ.
22 Wal hex tiꞌ xakexhitziko yinh witz Sión,
haꞌ iskonhobꞌ Komam Dios itzitz,
haꞌ ton huneꞌ Jerusalén ay satkanh.
Xakexhitziko iskꞌatanh ismilal ebꞌnaj ángel kutxaniko yaniko ismay Komam Dios,
23 yebꞌ iskꞌatanh makta bꞌabꞌel yuninal Komam Dios tzꞌibꞌnhebꞌil isbꞌi yul satkanh.
Xakexhitziko iskꞌatanh Komam Dios,
Komam juez yeko yinh sunil anma,
yebꞌ bꞌay ay yanma anma kꞌulxa yebꞌ tzꞌajanxa ye yu Komam Dios.
24 Xakexhitziko yinh Komam Jesús,
Komam watxꞌenheyo iskabꞌ trato Komam Dios.
Haꞌ ischikꞌil Komam Jesús tuꞌ konhsajnhen yinh komul,
haꞌ chiqꞌanni nimankꞌulal jinh tet Komam Dios.
Mach hakaꞌo ischikꞌil naj Abel,
to haꞌ yanayo Komam isyaꞌtajil yibꞌanh mak potxꞌni naj,
haꞌ isqꞌana.
25 Yuxin nannhe heyu tajka chemanhkꞌoto Komam Dios chitzotel jet,
yuto ta hunteqꞌan mak manhkꞌonto Komam Dios yet istzotel tet sat txꞌo txꞌotxꞌ tiꞌ mach kolcha tet isyaꞌtajil,
¿haꞌ tom xin hanhonh chonhkolchahi ta chikomanhkꞌoto Komam Dios chitzotel jet yul satkanh?
26 Yet istzotel Komam Dios yet payxa tuꞌ kaw bꞌili txꞌo txꞌotxꞌ,
yajaꞌ tinanh xin chal Komam hakaꞌ tiꞌ:
«Hunelxanhechꞌan chintzotelan maxhnhetaj xin txꞌo txꞌotxꞌ tiꞌ chiwaqꞌbꞌilojan,
wal xin haꞌ hun satkanh chibꞌilipaxoj,»
xhi Komam.
27 Hayet chalni Komam,
hunelxanhechꞌan,
chal yelapnoj tato hunteqꞌan tzet chu ishekꞌlax yul yehobꞌal watxꞌebꞌil yu Komam Dios,
chihekꞌlaxiloj kat istanhtzelaxiloj,
yunhe iskankano hunteqꞌan tzet mach chu ishekꞌlaxi.
28 Hak tuꞌ tzet aqꞌbꞌil jet yu Komam Dios,
huneꞌ yet jok yul isqꞌabꞌ,
mach chu ishekꞌlaxi.
Yuxin jaqꞌaꞌwe yuchꞌandiosal tet Komam Dios yinh huneꞌ tuꞌ,
kat jinayo kobꞌa tet Komam yinh sunil janma,
hakaꞌ kaw choche Komam.
Xiwojonhwepaxo tet Komam.
29 Yuto Komam Dios lahan hakaꞌ qꞌa qꞌaꞌ chitanhilo sunil tzet ye tuꞌ yu.