3 Yu chijayto yul janma yinh Komam Dios,

yuxin johtaj ta yu Istzotiꞌ Komam xin iswatxꞌe sunil tzet ay yul sat yibꞌanhqꞌinal tiꞌ yebꞌ satkanh.

Yuxin sunil tzet watxꞌebꞌil chijil tinanh,

mach yinho tzet watxꞌebꞌilxa titnaj.

4 Yu yayto naj Abel yul yanma yinh Komam Dios yuxin yalte huneꞌ xahanbꞌal ekꞌbꞌal kꞌul sata yet naj Caín.

Hak tuꞌ yu iskankano naj kꞌulal yul sat Komam Dios,

ischahni Komam isxahanbꞌal naj.

Waxanhka kamnaxa naj Abel tuꞌ,

yajaꞌ yexnhe istzotel naj jet yu yayto yul yanma yinh Komam Dios.

5 Yu yayto yaꞌ Enoc yul yanma yinh Komam Dios yuxin ilaxto yaꞌ satkanh yu Komam,

mach yil yaꞌ kamikal,

matxa xin hunu mak ilni yaꞌ.

Chal yul Yum Komam Dios tato yet yalanhto maxhto chiꞌilaxto yaꞌ satkanh tuꞌ kaw tzala Komam Dios yinh tzet iswatxꞌe yaꞌ.

6 Yuto ta machi jayto yul janma yinh Komam Dios mach chitzala Komam yinh tzet chikowatxꞌe,

yuto haꞌ mak choche chihitziko iskꞌatanh Komam Dios yilal yanayto yul yanma tato ay Komam Dios yebꞌ ta chaqꞌ Komam ispaj tet makta yinh sunil yanma chisayni Komam.

7 Yu yayto yaꞌ Noé yul yanma yinh Komam Dios,

yuxin hayet yalni Komam ta chaqꞌ huneꞌ niman yaxnhabꞌ isyijen yaꞌ tzet yal Komam,

yok yaꞌ iswatxꞌeno huneꞌ barco bꞌay chikolcha yaꞌ yebꞌ yixal yebꞌ oxwanh iskꞌahol yebꞌ ebꞌix alibꞌe,

waxanhka xin maxhto ixtanho huneꞌ nhabꞌ tuꞌ.

Yu yayto yaꞌ Noé yul yanma yinh Komam Dios yuxin kolcha yaꞌ,

wal anma xin tanhilo sunil.

Iskankano yaꞌ kꞌulal yul sat Komam Dios,

yu yayto yaꞌ yul yanma yinh Komam.

8 Yu yayto yaꞌ Abraham yul yanma yinh Komam Dios,

yuxin hayet yawtenilo Komam yaꞌ,

kaw yijem yute isbꞌa yaꞌ isto sat huneꞌ txꞌo txꞌotxꞌ halbꞌilkano yu Komam Dios ta chꞌaqꞌlax ismajuloj.

Waxanhka xin mach yohtajo bꞌay chꞌapnikanoj,

yajaꞌ isbꞌejkano yaꞌ iskonhobꞌ,

isto yaꞌ.

9 Kaw yayto yaꞌ yul yanma yinh Komam Dios,

isto yaꞌ ehoyo sat txꞌo txꞌotxꞌ yalte Komam Dios;

yajaꞌ hakaꞌ wayanhbꞌal yu yekꞌ yaꞌ sat txꞌotxꞌ,

iswatxꞌen yaꞌ qꞌap mantiado yatutoj.

Hakpax tuꞌ xin yaꞌ Isaac yebꞌ yaꞌ Jacob,

yuto haꞌ hun ebꞌyaꞌ yinh tzet yalte Komam tuꞌ tet yaꞌ Abraham.

10 Yuto yaꞌ Abraham tuꞌ haꞌ huneꞌ konhobꞌ kaw kꞌul yehayto isxeꞌ,

haꞌ echmabꞌil yu yaꞌ.

Huneꞌ konhobꞌ haꞌ kaw Komam Dios anayo ismalil,

haꞌtikꞌa xin Komam watxꞌeni.

11 Hakpax tuꞌ yaꞌ Sara yayto yaꞌ yul yanma yinh Komam Dios,

yuxin waxanhka kaw ixnamxa yebꞌ xin maxhtikꞌa hunu yunin,

yajaꞌ aqꞌlax yip yaꞌ yuninwi.

Ispitzkꞌa nichꞌan yunin yebꞌ yichamil yuto yayto yaꞌ yul yanma ta haꞌ tzet chalte Komam Dios masan chiyij isbꞌa.

12 Waxanhka kaw ichamxa yaꞌ Abraham,

yaj kaw hantanhe anma pohchakanh yinh.

Kaw hakaꞌ isbꞌisil txꞌumel yebꞌ arena ay istiꞌ haꞌ mar,

machi hunu mak chu isbꞌisni.

13 Sunil hunteqꞌan ebꞌyaꞌ tuꞌ mach ischah ebꞌyaꞌ tzet yalte Komam Dios,

wal xin kamto ebꞌyaꞌ,

yajaꞌ yayto ebꞌyaꞌ yul yanma yinh Komam;

yuxinto hakaꞌtanhe yilto ebꞌyaꞌ yinh tzet haltebꞌilkano yu Komam tuꞌ yinh nahat,

kaw xin tzala ebꞌyaꞌ yinh.

Hak tuꞌ yu isyenilo ebꞌyaꞌ tato mach iskonhobꞌo ebꞌyaꞌ ye huneꞌ yul yibꞌanhqꞌinal tiꞌ,

wal xin ekꞌomnhe ye ebꞌyaꞌ.

14 Yuxin haꞌ mak chitxumni hakaꞌ tuꞌ,

chisyeloj ta lanhan issayni huneꞌ yehobꞌal bꞌay chiꞌehi.

15 Yajaꞌ ta haꞌ bꞌay titna ebꞌyaꞌ haꞌ bꞌay ayko isnabꞌal,

meltzomi ebꞌyaꞌ yintaj.

16 Yajaꞌ wal xin,

haꞌ huneꞌ ehobꞌal ekꞌna kꞌul ay yul satkanh,

haꞌ ayko yinh isnabꞌal ebꞌyaꞌ.

Yuxin mach chitxꞌixwi Komam Dios yet chalni ebꞌyaꞌ Komam isDiosaloj,

yuto ay huneꞌ iskonhobꞌ ebꞌyaꞌ watxꞌebꞌil yu Komam.

17 Yu yayto yaꞌ Abraham yul yanma yinh Komam Dios,

yuxin yito yaꞌ hunpilan iskꞌahol yu yaqꞌni yinh xahanbꞌalil,

yet yilwelax yaꞌ yu Komam Dios;

kaw hinan yaꞌ yalten yinh xahanbꞌalil,

waxanhka xin halbꞌil tet yaꞌ yu Komam hakaꞌ tiꞌ:

18 «Yinh yaꞌ Isaac chipohcha hawuninal,»

xhi Komam.

19 Yuto yohta yaꞌ Abraham tuꞌ ta ay yip Komam Dios ispitzkꞌankanh kamom,

yuxin hakaꞌtikꞌa aqꞌbꞌil itzitzbꞌokanh yaꞌ Isaac,

yaqꞌlax yaꞌ tet ismam.

20 Yu yayto yaꞌ Isaac yul yanma yinh Komam Dios,

yuxin yalanhto yalni yaꞌ yinh hunteqꞌan iskꞌulal chischah yaꞌ Jacob yebꞌ naj Esaú yu Komam Dios.

21 Yu yayto yaꞌ Jacob yul yanma yinh Komam Dios,

yuxin hayet toxa chikami,

yalnikano yinh hunteqꞌan iskꞌulal chischah hunun ebꞌnaj iskꞌahol yaꞌ José,

yay xulno yaꞌ yibꞌanh iswiꞌ isqꞌojoch,

yaqꞌni tzalaho iskꞌul yinh Komam Dios.

22 Yu yayto yaꞌ José yul yanma yinh Komam Dios,

yuxin yet yalanhto maxhto chikami,

yalnikano yaꞌ tato ay huneꞌ tzꞌayikal tiꞌ bꞌay chiꞌel ebꞌnaj Israel sat txꞌotxꞌ Egipto.

Yalnipaxkano yaꞌ tato chiyito ebꞌnaj Israel tuꞌ isbꞌajil isnimanil yaꞌ yet chiꞌel ebꞌnaj sat txꞌotxꞌ Egipto tuꞌ.

23 Yu yayto ismam yebꞌ ismiꞌ yaꞌ Moisés yul yanma yinh Komam Dios yuxin hayet ispitzkꞌa yaꞌ yebꞌalaxilo oxebꞌ ixahaw,

yuto kaw kꞌulchꞌan jilni.

Mach xin xiw ismam yebꞌ ismiꞌ tet chejbꞌanile yaqꞌ naj isreyal Egipto tato chipotxꞌlax nixhte winaj unin.

24 Yu yayto yaꞌ Moisés yul yanma yinh Komam Dios,

yuxin hayet icham tzeh yaꞌ matxa yoche oko yunino ix iskutzꞌin naj rey Egipto tuꞌ.

25 Wal xin to haꞌ yekꞌyaꞌ yanma yaꞌ yinta iskonhobꞌ Komam Dios,

haꞌ issayilo yaꞌ sata yaqꞌni tzalaho yanma yaꞌ yinh hunteqꞌan tzalahilal yet yul sat yibꞌanhqꞌinal tiꞌ,

hunteqꞌan pet chitanhiloj.

26 Istxumnilo yaꞌ tato ekꞌbꞌalto kꞌul yekꞌyaꞌ yanma yaꞌ yu Komam Cristo sata yochen yaꞌ isqꞌalomal txꞌotxꞌ Egipto tuꞌ,

yuto haꞌ yinh tzet chaqꞌ Komam ispajo tet yaꞌ,

haꞌ bꞌay ayko yanma yaꞌ.

27 Yu yayto yaꞌ Moisés yul yanma yinh Komam Dios,

yuxin el yaꞌ yebꞌ ebꞌnaj Israel sat txꞌotxꞌ Egipto,

machi xin xiw yaꞌ ta chitit ishowal naj rey tuꞌ yinh yaꞌ.

Kaw yinhnhe Komam Dios yako isnabꞌal,

hakaꞌtanhe kaw yiliko yaꞌ yinh Komam,

Komam machi jiliko yinh.

28 Yu yayto yaꞌ Moisés yul yanma yinh Komam Dios,

yuxin yekꞌtze yaꞌ qꞌinh Pascua,

ischejni yaꞌ txihlaxoko ischikꞌil noꞌ meꞌ yinh iswiꞌ yebꞌ yinh iskꞌul ispultahil yatut ebꞌnaj Israel,

yunhe mach ispotxꞌ naj ángel aqꞌomkamo anma isbꞌabꞌel kꞌahol ebꞌnaj Israel tuꞌ.

29 Yu yayto ebꞌnaj Israel yul yanma yinh Komam Dios,

yuxin ispoh isbꞌa haꞌ Kajinh Mar,

yekꞌto ebꞌnaj yiktabꞌal haꞌ,

kaw xin tajin bꞌay ekꞌto ebꞌnaj.

Haxa yet yekꞌto ebꞌnaj Egipto yalni,

ishunbꞌan isbꞌa haꞌ,

ishiqꞌnito ebꞌnaj haꞌ,

iskamilo ebꞌnaj.

30 Yu yayto ebꞌnaj Israel yul yanma yinh Komam Dios,

yuxin hayet lahwi hujebꞌ tzꞌayik yekꞌ hoyon ebꞌnaj yinh konhobꞌ Jericó yay wuyna iskꞌubꞌal huneꞌ konhobꞌ tuꞌ.

31 Yu yayto ix Rahab,

ix txꞌoj ye iswiꞌ,

yul yanma yinh Komam Dios,

yuxin mach kam ix yinta makta manhkꞌom,

yuto kꞌul yu ischahni ix ebꞌnaj Israel bꞌeykꞌo ilwal yinh konhobꞌ tuꞌ.^a

32 ¿Maktaxka hunuxa chiwalan tinanh?

Kaw matxam tiempo ta chinokan tzotelo yinh yaꞌ Gedeón,

yaꞌ Barac,

yaꞌ Sansón,

yaꞌ Jefté,

yaꞌ David yebꞌ yaꞌ Samuel yebꞌpaxo ebꞌyaꞌ ischejabꞌ Komam Dios yet payat.^b

33 Yu yayto ebꞌyaꞌ yul yanma yinh Komam Dios,

yuxin ay ebꞌyaꞌ qꞌoji yinh nimeta konhobꞌ,

aypaxo ebꞌyaꞌ watxꞌen istoholal yet yok yahawil,

ay ebꞌyaꞌ ischah tzet haltebꞌil yu Komam Dios,

ay ebꞌyaꞌ majchen istiꞌ noꞌ bꞌalam.

34 Ay ebꞌyaꞌ qꞌoji isbꞌutni nimeta qꞌaꞌ,

ay ebꞌyaꞌ kolcha tet chꞌen espada,

ay ebꞌyaꞌ machi yip yaj hul yip,

kaw xin kꞌul elkaniko ebꞌyaꞌ yinh howal,

isqꞌoji ebꞌyaꞌ yinh ebꞌnaj aqꞌom howal tit yul huneꞌxa nan konhobꞌal.

35 Aypaxo ebꞌix ix itzitzbꞌikanh yunin yu yayto yul yanma yinh Komam Dios.

Ay ebꞌyaꞌ kaw yaꞌta yu iskami,

yu mach chisje ebꞌyaꞌ ismanhkꞌo tzet chal Komam Dios yuto choche ebꞌyaꞌ chiꞌaqꞌlax itzitzbꞌokanh yinh huneꞌ qꞌinale mach istanhbꞌal.

36 Ay ebꞌyaꞌ ekꞌyaꞌ isbꞌahlaxi ishatelaxpaxoj,

ay ebꞌyaꞌ kꞌalbꞌalax yu chꞌen cadena,

ay ebꞌyaꞌ alaxikto yul preso.

37 Aypaxo ebꞌyaꞌ qꞌojlax kamoj,

ay ebꞌyaꞌ kꞌuplaxayo yikta yu chꞌen serrucho,

ay ebꞌyaꞌ alaxiko yinh ilwebꞌal,

aypaxo ebꞌyaꞌ aqꞌlaxkamo yu chꞌen espada.

Ay ebꞌyaꞌ nananta bꞌay ekꞌle,

xil noꞌ meꞌ yebꞌ xil noꞌ chiw ayko xilo isqꞌap,

yaqꞌlen mebꞌaꞌil yebꞌ isyaꞌtajil,

isbꞌahlaxpaxoj.

38 Anma yul sat yibꞌanhqꞌinal tiꞌ mach yeto ay ebꞌyaꞌ yekꞌ xol,

machi hunu bꞌay kaw ehayo ebꞌyaꞌ,

wal xin to haꞌ sat txꞌotxꞌ desierto ekꞌ ebꞌyaꞌ yebꞌ iswiꞌla witz yebꞌ yulaj chꞌen nhachꞌen,

yebꞌ yulaj txꞌo txꞌotxꞌ holan ekꞌ ebꞌyaꞌ.

39 Sunil ebꞌyaꞌ tiꞌ,

waxanhka kaw kꞌul isbꞌeybꞌal yu yayto ebꞌyaꞌ yul yanma yinh Komam Dios,

yajaꞌ machi hunu ebꞌyaꞌ chahni tzet haltebꞌil yu Komam Dios.

40 Yuto ayonhiko yinh isnabꞌal Komam Dios yinh huneꞌ tzet ekꞌbꞌal kꞌul tuꞌ,

yuxin mach yij isbꞌa tzet nabꞌil yu Komam yinh ebꞌyaꞌ ischukil,

wal xin to chihuniko ebꞌyaꞌ jinta yinh istoholal.