10
Yuto haꞌ hunteqꞌan xahanbꞌal chal isley yaꞌ Moisés yechelnhe yeko yinh hunteqꞌan iskꞌulal yilal yuli,
maxhtaj hunteqꞌan tuꞌ tzet kaw ay yul satkanh.
Hunteqꞌan xahanbꞌal chaltelax hunun habꞌil mach chu istzꞌajbꞌan iskꞌul anma choche ishitzako isbꞌa iskꞌatanh Komam Dios.
2 Yuto ta hunteqꞌan xahanbꞌal chal isley yaꞌ Moisés tuꞌ chu issajnhenkano anma yinh ismul,
chimisbꞌej yalten xahanbꞌal,
yuto matxa ismul chabꞌe.
3 Wal xin haꞌ isxahanbꞌal anma chilayaqꞌ hunun habꞌil tuꞌ,
haꞌ chꞌaqꞌni isnabꞌ anma isnahniti ismul.
4 Yuto ischikꞌil noꞌ winaj wakax yebꞌ noꞌ chiw,
mach chiqꞌoji yinilo ismul anma.
5 Yuxin yet yul Komam Jesucristo yul sat yibꞌanhqꞌinal tiꞌ yalni tet Komam Dios hakaꞌ tiꞌ:
«Matxa chisje hakꞌul chꞌaqꞌlax xahanbꞌal yebꞌ sabꞌehal tawet,
yuxin aqꞌbꞌil innimanilan hawu,
haꞌ chiwaqꞌan yinh xahanbꞌalil tawet.
6 Mach chitzala hakꞌul yinh xahanbꞌal chinhuslaxi yebꞌ sabꞌehal chiꞌaqꞌlax tawet yu yinilo mule.
7 Yuxinto chiwalan tawet:
Mamin,
hach inDiosalan,
ayinan lah yu inyijenan tzet chawala,
hakaꞌ yu istzꞌibꞌnhelaxkano winhan yul Hawum,»a
xhi Komam.
8 Yinh bꞌabꞌelal,
yal Komam Cristo ta mach isje iskꞌul yebꞌ mach chitzala Komam Dios tato chiꞌaqꞌlax xahanbꞌal yebꞌ sabꞌehal tet,
yebꞌ no noqꞌ chinhuslaxi yu yel ismul anma,
waxanhka xin hak tuꞌ yalni ley.
9 Lahwi tuꞌ yalnipaxo Komam:
«Mamin,
hach inDiosalan,
ayinan lah yu inyijenan tzet chawala,»
xhi Komam.
Chal yelapnoj ta chilo hunteqꞌan bꞌabꞌel xahanbꞌal tuꞌ kat yaniko huneꞌ akꞌ.
10 Xakonhyako Komam Dios yetoj yuto isyije Komam Jesucristo tzet yal iskꞌul Komam Dios yet yalten isbꞌa yinh xahanbꞌalil yinh hunelnhe.
11 Sunil ebꞌyaꞌ sacerdote Israel hununnhetikꞌa tzꞌayik ayko yinh ismunil yalten xahanbꞌal yebꞌ xin huneꞌnhetikꞌa haꞌ xahanbꞌal chalte,
waxanhka xin mach chu yinilo mule.b
12 Yajaꞌ wal Komam Cristo hunelnhechꞌan yako isbꞌa xahanbꞌalil yinh komul yinh sunilbꞌal tiempo,
lahwi tuꞌ yok tzꞌonhno Komam yinh iswatxꞌqꞌabꞌ Komam Dios.
13 Haꞌ tuꞌ ay Komam yechman yalaxiko sunil mak ayko ishowal yinh yalanh yoj.c
14 Yuto huneꞌnhe xahanbꞌal yaqꞌ Komam konhyaniko yinh istoholal yinh hunelnhe hanhonh yetonhxa Komam tiꞌ.
15 Chaqꞌpaxo isbꞌa Komam Espíritu Santo yinh hunteqꞌan tiꞌ yet chalni:
16 «Huneꞌ intratohan chiwaqꞌan tet anma Israel yet tzujanilxa,
haꞌ ton huneꞌ tiꞌ:
Chiwakojan inchejbꞌanilan yul yanma yebꞌ yinh isnabꞌal,»d
xhi.
17 Lahwi tuꞌ yalnipaxoj:
«Matxa bꞌaqꞌinhal xin chinnatijan ismul yebꞌ istxꞌojal,»e
xhi Komam.
18 Yuxinto ayxa nimankꞌulal yinh mule,
matxa yilalo chiꞌaqꞌlax xahanbꞌal hunelxa.
Hitzojonhweko sata Komam Dios yinh sunil janma
19 Yuxin tinanh hex wuxhtaj hex wanabꞌ,
yinhxa sunil janma chonhapni yinh sat Komam Dios bꞌay ay yehobꞌal kaw ay yelapnoj,
yaj yu ischikꞌil Komam Jesucristo.
20 Chu japni yu huneꞌ akꞌ bꞌeh chiꞌaqꞌni qꞌinale iswatxꞌe Komam yet istzilmoyo qꞌap qꞌap aykanh yul Yatut Komam Dios yet iskam Komam Jesús.
21 Komam Jesús haꞌ chitzotel jinh hanhonh yuninalonhxa tiꞌ,
sacerdote kaw niman yelapno Komam.
22 Yuxin hitzojonhweko yinh sunil janma sata Komam Dios,
jaqꞌaweyto yul janma yinh kaw isyelal yuto sajxa ye janma yu ischikꞌil Komam,
matxa istxꞌojal chiꞌetanto konabꞌal;
yebꞌ xin sajxa ye konimanil yu ha haꞌ kaw saj.
23 Kolinhbꞌawe kobꞌa yinh kuybꞌanile xajabꞌe tiꞌ,
machojabꞌ chikabꞌkon kokꞌul yinh tzet ayko yipo janma,
huneꞌ bꞌay tzujan honhikoj,
yuto chij isbꞌa tzet haltebꞌil jet yu Komam Dios.
24 Kosayaꞌwe yinh tzet chu kokolwa jinh hununonh,
haxinwal chikolahiko koxahannhen kobꞌa kat kowatxꞌen iskꞌulal jinh hununonh.
25 Machojabꞌ chikobꞌej kokutxbꞌan kobꞌa,
hakaꞌ chute hunteqꞌan ebꞌnaj,
wal xin jiptzewe kobꞌa hununonh,
yuto lanhan isyenilo isbꞌa tato lanhan ishitzti tiempo bꞌay chihul Komam Jesucristo.
26 Yuto ta lahwi johtanhenilo isyelal huneꞌnhetikꞌa haꞌ xin janiko komul,
matxa hunuxa xahanbꞌal chu yaqꞌni tanho komul chijako tuꞌ.
27 Ta hak tuꞌ toxanhe chijechma yul huneꞌ niman isyaꞌtajil jibꞌanh yebꞌ qꞌa qꞌaꞌ toxanhe chinhilxi chitanhtzenilo sunil makta ayko ishowal yinh Komam Dios.
28 Yet chismanhkꞌon hunu mak isley yaꞌ Moisés,
ta ay xin kawanh maka oxwanh mak chalni tato yeli manhkꞌom huneꞌ mak tuꞌ,
maqꞌbꞌil ismaqꞌlaxkamoj,
matxa nimankꞌulal yinh.
29 Hajxam mak chiyahni Iskꞌahol Komam Dios yebꞌ matzet chalilo ischikꞌil Komam yul sat,
chinilo ispixan Komam Espíritu Santo,
Komam chonhocheni.
Hunteqꞌan mak tuꞌ kaw ekꞌbꞌalto isyaꞌtajil chiꞌay yibꞌanh,
yuto haꞌ ischikꞌil Komam Jesucristo tꞌinhbꞌankano istrato Komam Dios,
konhyanipaxiko yeto Komam.
30 Kaw johtaj tato halbꞌilkano yu Komam Dios,
hakaꞌ tiꞌ:
«Haninnhehan chiwilan yinh tzet chiꞌeliko anma,
haninan chiwaqꞌan ispaj selel tet,»f
xhi Komam.
Chalnipaxo yul Yum Komam:
«Haꞌ Komam Dios Jahawil chiꞌilni yinh tzet chiꞌeliko iskonhobꞌ,»
xhihayoj.
31 ¡Kaw ay ismay yet chanayo Komam Dios itzitz isyaꞌtajil jibꞌanh!
32 Naweti yet yalanhtokanoj yet hechahni issajilqꞌinal yul heyanma kaw heyaqꞌ techaho isyaꞌtajil hul teyibꞌanh.
33 Hex tiꞌ kexbꞌahlaxi,
heyetalax sata anma,
ay hex xin hul isyaꞌtajil teyibꞌanh yu kexkolwa yinh mak aqꞌlax ekꞌoyaꞌ yanma tuꞌ.
34 Kaw tzꞌaypaxo hekꞌul yinh ebꞌnaj alaxikto yul preso,
machi xin ok bꞌiskꞌulal yinh hekꞌul yet yilaxilo tzet ay hex yuto heyohtaj ta ekꞌbꞌalto iskꞌulal chiꞌaqꞌlax teyet yul satkanh,
hunteqꞌan machi bꞌaqꞌinhal chilahwi.
35 Yuxin machojabꞌ chebꞌej iskawxi hekꞌul,
yuto niman ispaj selel chꞌaqꞌlax teyet.
36 Kaw yilal niman cheyute hekꞌul heyaqꞌni techaho isyaꞌtajil,
haxinwal chu hewatxꞌen tzet choche iskꞌul Komam Dios hak tuꞌ xin chechah tzet haltebꞌilkano yu Komam.
37 Yuto chal yul Yum Komam Dios:
«Kaw hanikꞌxanhe bꞌay chul Komam,
Komam yilal yuli,
kaw mach chiꞌekꞌto yet yuli.
38 Haꞌ mak xakan kꞌulal yul sat Komam Dios maxhtikꞌa chisbꞌej iskawxi iskꞌul yinh Komam,
yajaꞌ wal mak chimeltzo yintaj mach chitzala iskꞌul Komam yinh,»g
xhi yul Yum Komam.
39 Yajaꞌ wal hanhonh tiꞌ mach chonhmeltzo jintaj hakaꞌ ebꞌnaj chimeltzo yintaj kat istokano yinh isyaꞌtajil.
Wal hanhonh tiꞌ chikochah kokolbꞌanil yuto xajayto yul janma yinh Komam.