Huneꞌ Yatut Komam Dios sat txꞌotxꞌal yebꞌ huneꞌ bꞌey satkanh
9
Huneꞌ bꞌabꞌel trato tuꞌ ay chejbꞌanile chihalni yinh tzet chu isyijen ebꞌyaꞌ sacerdote ismunil tet Komam Dios,
yajaꞌ yul huneꞌ Yatut Komam sat txꞌotxꞌal tiꞌ.
2 Huneꞌ Yatut Komam tuꞌ,
hak tiꞌ yehi:
Kabꞌebꞌ cuarto yul,
pohbꞌilayo yu huneꞌ qꞌap qꞌap litxꞌankanh yiktabꞌal.
Huneꞌ bꞌabꞌel cuarto chihal-lax Ehobꞌal Txahul,
haꞌ tuꞌ ayikto chꞌen lámpara yebꞌ teꞌ mexha,
yebꞌ ixim pan chihaltelax tet Komam Dios.
3 Haxa huneꞌ cuarto yintakꞌto qꞌap litxꞌankanh tuꞌ Ehobꞌal ekꞌna kaw Txahul chihal-lax yinh.
4 Haꞌ bꞌey tuꞌ ay huneꞌ altar nabꞌa oro bꞌay chinhuslax pom,
yulikto cuarto tuꞌ aypaxikto teꞌ Kaxha yet Istrato Komam Dios,
sunil yinh teꞌ ayko chꞌen oro.
Yul teꞌ kaxha tuꞌ ayayto huneꞌ xhalu nabꞌa oro bꞌay ayayto maná,
aypaxayto isqꞌojoch yaꞌ Aarón,
huneꞌ teꞌ qꞌojoch elilo iswol;
aypaxayto chꞌen chꞌen paqꞌan yehi bꞌay tzꞌibꞌnhebꞌiliko ley.
5 Yibꞌanh teꞌ Kaxha tuꞌ ayahto yechel kawanh ebꞌnaj ángel chiyij querubín,
haꞌ chaliloj ta ayayo isqꞌaqꞌal ismay Komam Dios bꞌey tuꞌ,
leyanilto xikꞌ ebꞌnaj yibꞌanh ismajil teꞌ kaxha tuꞌ.
Yajaꞌ wal tinanh,
mach kaw yilalo chonhok jalaꞌ yinh tzet kaw ye hunteqꞌan tuꞌ.
6 Hakton tuꞌ ye iswatxꞌebꞌanil Yatut Komam Dios tuꞌ.
Yul huneꞌ bꞌabꞌel cuarto hunun tzꞌayik yokto ebꞌyaꞌ sacerdote isyijeno ismunil tet Komam.
7 Wal yul huneꞌ Ehobꞌal kaw ekꞌna Txahul xin,
hanhkꞌanhe yaꞌ yahawil sacerdote chiꞌoktoj,
yajaꞌ xin hunelnhechꞌan yulbꞌal habꞌil.
Hayet chiꞌokto yaꞌ,
iqꞌbꞌil ischikꞌil no noqꞌ yu yaꞌ yu yalten yinh ismul,
yebꞌ yinh ismul sunil anma mach nano yu chaniko ismul.
8 Hak tuꞌ chu yaqꞌni Komam Espíritu johtanheloj ta hayet yokniko huneꞌ bꞌabꞌel cuarto tuꞌ maxhto chihajlax bꞌeh japni yinh sat Komam Dios.
9 Huneꞌ bꞌabꞌel cuarto tuꞌ yechelnhe yinh huneꞌ tiempo bꞌay ayonh tiꞌ,
yuto hunteqꞌan sabꞌehal yebꞌ xahanbꞌal chihaltelaxi,
mach chiswatxꞌeko isnabꞌal anma chiyiyo isbꞌa bꞌey tuꞌ yinh istoholal.
10 Hunteqꞌan chejbꞌanile tuꞌ yinhnhe tzet chilolaxi yebꞌ tzet chiꞌukꞌlax bꞌay chitzoteli,
yinh issajnhelax tzettaj ye tuꞌ;
hunteqꞌan tuꞌ yetnhe konimanil yehi.
Okniko hunteqꞌan chejbꞌanil tuꞌ yinh ismunil masanto yet yapni istiempohal ishelni Komam tzettaj ye tuꞌ.
11 Yajaꞌ xahulikꞌo Komam Cristo,
haꞌ Komam Yahawil sacerdote xayaqꞌ iskꞌulal jet,
hunteqꞌan yilaltikꞌa yuli.
Haxa huneꞌ Yatut Komam Dios bꞌay ayko Komam Jesús sacerdotehal kaw ekꞌbꞌal iskꞌulal yebꞌ tzꞌajan yehi,
maxhtaj ebꞌnaj winaj watxꞌenhe,
mach yeto yul sat yibꞌanhqꞌinal tiꞌ yehi.
12 Xaꞌapni Komam Jesús sata Komam Dios satkanh,
yajaꞌ maxhtaj ischikꞌil noꞌ chiw maka ischikꞌil noꞌ tzehla wakax yalte Komam,
wal xin to haꞌ kaw ischikꞌil Komam yalte.
Xaꞌapni Komam sata Komam Dios yinh hunelnhe yebꞌ yinh sunilbꞌal tiempo,
hak tuꞌ yu isqꞌoji Komam yaqꞌnikano kolbꞌanile mach istanhbꞌal.
13 Yinh kaw yeli ischikꞌil noꞌ winaj wakax yebꞌ ischikꞌil noꞌ chiw yebꞌ istanhil noꞌ qꞌopo wakax chitxihlaxiko yibꞌanh anma mulum,
ay yip issajnhenkano isnimanil anma yet payxa tuꞌ.
14 Hajxam ischikꞌil Komam Jesucristo to kaw ekꞌbꞌalto ay yip issajnhen janma yinh istxꞌojal,
yunhe koyijen yinh tzet chal Komam Dios,
Komam itzitznhetikꞌa,
yuto yu Komam Espíritu mach istanhbꞌal,
yuxin yako isbꞌa Komam Cristo xahanbꞌalil tet Komam Dios,
kaw xin machi nino istxꞌojal Komam.
15 Haꞌ iskamikal Komam Jesucristo aqꞌni tanho sunil mule alaxiko yalanh huneꞌ bꞌabꞌel trato yaqꞌ Komam Dios,
yuxin tinanh haꞌ Komam Jesús chitzotel jinh tet Komam Dios yinh huneꞌ iskabꞌ trato tiꞌ,
yunhe hanhonh awtebꞌilonh yu Komam chikochah komajul mach istanhbꞌal haltebꞌilkano yu Komam.
16 Hakaꞌ hunu testamentoa watxꞌebꞌilkanoj,
machi yip teꞌ tato maxhto chikam naj anhekano teꞌ.
17 Machi yip huneꞌ testamento tuꞌ tato itzitzto naj anhekanoj,
wal ta xakam naj wal tuꞌ ay yip.
18 Yuxin haꞌ huneꞌ bꞌabꞌel istrato Komam Dios yilal malto ischikꞌil no noqꞌ yijnikano isbꞌa.
19 Yuto hayet lahwi yawten yaꞌ Moisés chejbꞌanil chal ley tet anma Israel,
issomni yaꞌ ischikꞌil noꞌ tzehla wakax yebꞌ ischikꞌil noꞌ chiw xol ha haꞌ,
yaniko yaꞌ noꞌ lana kaj yinh iswiꞌ isqꞌabꞌ teꞌ hisopo islabꞌanayto yaꞌ xol chikꞌ tuꞌ,
istxihniko yaꞌ yinh yumal ley yebꞌ yibꞌanh sunil anma Israel.
20 Yalni yaꞌ Moisés tuꞌ xin:
«Haꞌ chikꞌ tiꞌ chitꞌinhbꞌankano istrato Komam Dios chaqꞌ teyet.
Yilal xin heyijen tzet chala,»
xhi yaꞌ.
21 Istxihnipaxiko yaꞌ Moisés chikꞌ yinh Yatut Komam tuꞌ,
yebꞌ yinh sunil munlabꞌal chiꞌokniko yu ebꞌyaꞌ sacerdote yul Yatut Komam tuꞌ.
22 Hakaꞌ yalni ley ta sunil tzettaj ye tuꞌ masanto chikꞌ chisajnheni,
machi xin nimankꞌulal yinh ismul anma ta machi chikꞌ chimaltoj.
Yako isbꞌa Komam Jesús xahanbꞌalil yinh komul
23 Hunteqꞌan yechelnhe ye yinh tzet ay yul satkanh yilal sajnhelax yu xahanbꞌal,
yajaꞌ wal tzet ay satkanh choche xahanbꞌal ekꞌna kꞌul sata hunteqꞌan tuꞌ.
24 Yuto Komam Cristo maxhtaj yul huneꞌ Yatut Komam Dios watxꞌebꞌil yu ebꞌnaj winaj bꞌay oktoj,
huneꞌ yechelnhe yeko yinh Yatut Komam ay yul satkanh,
wal xin to kaw apni Komam sata Komam Dios yul satkanh,
haꞌ xin Komam chitzotel jinh tet Komam Dios tinanh.
25 Komam Jesucristo mach hayelta yalte isbꞌa xahanbꞌalil hakaꞌ chu yokto ebꞌyaꞌ yahawil sacerdote hunun habꞌil yul Ehobꞌal ekꞌna kaw Txahul,
yu yalten ischikꞌil no noqꞌ xahanbꞌalil,
maxhtaj ischikꞌil ebꞌnaj chalte.
26 Ta hak tuꞌ,
txꞌiꞌalxam el chikam Komam yichitax iswatxꞌi yul sat yibꞌanhqꞌinal tiꞌ.
Wal xin haꞌ kaw yehi to haꞌ yinh islahobꞌal tiempo tiꞌ,
haꞌ kaw Komam hul yaqꞌaꞌko isbꞌa xahanbꞌalil yinh hunelnhe yu yinilo Komam komul.
27 Yuto sunil anma yilal hunelchꞌan chikami,
lahwi tuꞌ kat yil-lax yu Komam Dios yinh tzet chiꞌelikoj.
28 Hak tuꞌ xin Komam Jesucristo hunelnhechꞌan yaqꞌ isbꞌa xahanbꞌalil yu yinilo Komam ismul tzetkꞌa anma.
Wal xin chul Komam yinh iskayelal,
yajaꞌ matxataj yu yinilo ismul anma,
to yu iskolni Komam makta chiꞌechmani.