Komam Jesús haꞌ chitzotel jinh tet Komam Dios yinh huneꞌ iskabꞌ trato
8
Haꞌ huneꞌ kaw yilal yinh hunteqꞌan chijal tiꞌ to ay huneꞌ mak yahawil sacerdote jinh,
tzꞌonhan yinh iswatxꞌqꞌabꞌ Komam Dios yul satkanh.a
2 Haꞌ ismunil haꞌ istzotel jinh yul Yatut Komam Dios,
huneꞌ kaw yeli Yatut Komam,
huneꞌ nha tuꞌ haꞌ kaw Komam Dios watxꞌenhe,
mach anmahoj.
3 Sunil ebꞌyaꞌ yahawil sacerdote aqꞌbꞌil ismunil ebꞌyaꞌ yalten sabꞌehal yebꞌ xahanbꞌal tet Komam Dios,
hakpax tuꞌ Komam Jesús yilaltikꞌa ay tzet chalte Komam tet Komam Dios.
4 Ta aytokꞌo Komam yul sat yibꞌanhqꞌinal tiꞌ matxam yilalo chiꞌok Komam sacerdotehal,
yuto ay ebꞌyaꞌ sacerdote aqꞌbꞌil ismunil yaqꞌni xahanbꞌal hakaꞌ yalni isley yaꞌ Moisés.
5 Ismunil ebꞌyaꞌ sacerdote yul Yatut Komam Dios tuꞌ yechelnhe ye yinh tzettaj ay yul satkanh.
Kaw johtaj tato yechelnhe yehi yuto hayet yalanhto maxhto chiswatxꞌe yaꞌ Moisés Yatut Komam Dios,
yalni Komam tet yaꞌ hakaꞌ tiꞌ:
«Abꞌe tzet chiwaltiꞌan,
kaw hakaꞌ yechel inyehan tawet bꞌey iswiꞌ witz,
hak tuꞌ chawute,»b
xhi Komam.
6 Yajaꞌ wal tinanh ayxako Komam Jesús yinh huneꞌ munil ekꞌbꞌal iskꞌulal sata ismunil ebꞌyaꞌ sacerdote,
yuto haꞌ Komam chitzotel yinh anma tet Komam Dios yinh huneꞌ iskabꞌ trato ekꞌbꞌal iskꞌulal sata huneꞌ yet bꞌabꞌelal.
Huneꞌ iskabꞌ trato tuꞌ kaw ekꞌbꞌal iskꞌulal chalte Komam Dios jet iqꞌbꞌil yu.
7 Qꞌinalo ta kan anma kꞌulal yu huneꞌ bꞌabꞌel trato matxam yilalo yaqꞌ Komam huneꞌ iskabꞌ trato tiꞌ.
8 Yajaꞌ yil Komam Dios ta mach kꞌulo eliko hunteqꞌan anma tuꞌ yul sat,
yuxin yalkano Komam yul Yum:
«Haꞌ Komam Dios Jahawil,
chalni hakaꞌ tiꞌ:
Chul huneꞌ tiempohal bꞌay chiwaqꞌan huneꞌ iskabꞌ trato tet anma Israel yebꞌ tet anma Judá.
9 Haꞌ huneꞌ iskabꞌ trato tiꞌ mach lahano yebꞌ hakaꞌ huneꞌ waqꞌan tet yichmam ebꞌnaj yet winilojan yul txꞌotxꞌ Egipto,
hakaꞌtanhe xin inxekiltijan ebꞌnaj.
Yajaꞌ yu mach isyije ebꞌnaj intrato tuꞌan,
yuxin inbꞌejkanojan ebꞌnaj.
10 Haꞌ xin huneꞌ trato chiwaqꞌan tet anma Israel yinh tzujanilxa tuꞌ,
haꞌ ton huneꞌ tiꞌ:
Chiwakojan inchejbꞌanilan yinh isnabꞌal kat intzꞌibꞌnhenikojan yinh yanma.
Haninan xin chinokan isDiosaloj kat yok inkonhobꞌojan.
11 Yinh huneꞌ tiempohal tuꞌ,
matxa yilalo chiskuy hunu mak yet konhobꞌ,
maka hunu mak ayto yu isbꞌa yebꞌi yu kinyohtanhenan.
Wal xin sunil mak chinohtanhenan,
sunil nixhte unin yebꞌ ichamta anma.
12 Chiwaqꞌnikanojan nimankꞌulal yinh istxꞌojal,
matxa xin chinnatijan ismul,»c
xhi Komam.
13 Hayet chalni Komam akꞌ yinh huneꞌ iskabꞌ trato lanhan yalni tato ichamxa huneꞌ bꞌabꞌel trato,
yuto sunil tzet xaꞌichambꞌiloj chilahwi ismunil,
hanikꞌxanhe xin kat istanhiloj.