Sacerdote Komam Jesucristo hakaꞌ yaꞌ Melquisedec
7
Yaꞌ Melquisedec,
haꞌ yaꞌ isreyal konhobꞌ Salem yet payat tiempo,
yebꞌ xin issacerdote Komam Dios ye yaꞌ,
Komam kaw aykano yip.
Yet hunel xin yet isbꞌeykꞌo yaꞌ Abraham yinh huneꞌ howal,
isqꞌoji yaꞌ yinh hunteqꞌan ebꞌnaj rey.
Haxa yet ismeltzo yaꞌ Abraham,
yul chalaxo yaꞌ yul bꞌeh yu yaꞌ Melquisedec;
isqꞌanni yaꞌ iskꞌulal Komam Dios yibꞌanh yaꞌ Abraham tuꞌ.
2 Yaqꞌni yaꞌ Abraham isdiezmohal sunil tzet yiqꞌ yaꞌ yinh howal tuꞌ tet yaꞌ.
Huneꞌ bꞌihe Melquisedec chal yelapnoj:
Yahawil yinh kaw istoholal,
yebꞌ xin Yahawil yinh aqꞌankꞌulal,
yuto yaꞌ Melquisedec tuꞌ yahaw konhobꞌ Salem ye yaꞌ,
Salem chal yelapnoj:
aqꞌankꞌulal.
3 Yaꞌ Melquisedec tuꞌ mach ohtabꞌilo mak ismam yaꞌ yebꞌ mak ismiꞌ yaꞌ,
yebꞌpaxo mak yichmam yaꞌ.
Machipaxo mak chalni yinh yet ispitzkꞌa yaꞌ yebꞌpaxo yinh iskamikal yaꞌ yuxin yechel yeko yaꞌ yinh Komam Jesucristo Iskꞌahol Komam Dios,
yuto machi isbꞌi bꞌaqꞌinh lahwi ismunil yaꞌ.
4 Tinanh xin txumweloj hanta niman yelapno ye yaꞌ Melquisedec tuꞌ,
yuto haꞌ kaw jichmam Abraham aqꞌni isdiezmo tet yaꞌ yinh sunil tzet yiqꞌ yet isbꞌey yaꞌ yinh howal.
5 Hakaꞌ yalni isley yaꞌ Moisés,
ebꞌyaꞌ sacerdote titna yinh yaꞌ Leví,
ay yip ebꞌyaꞌ isqꞌanni tet yet konhobꞌ isdiezmohal yinh sunil tzet aya,
waxanhka xin yuxhta isbꞌa,
yebꞌ yichmam ebꞌnaj ye yaꞌ Abraham.
6 Yajaꞌ wal yaꞌ Melquisedec tuꞌ,
mach titnajo yaꞌ yinh yaꞌ Leví,
yajaꞌ yaqꞌ yaꞌ Abraham isdiezmo tet yaꞌ.
Isqꞌannikano yaꞌ iskꞌulal Komam Dios yibꞌanh yaꞌ Abraham tuꞌ,
yaꞌ bꞌay yalte Komam Dios iskꞌulal iskꞌul.
7 Kaw johtaj tato haꞌ naj chiqꞌanni iskꞌulal Komam Dios yibꞌanh hunu maka,
ekꞌbꞌal yelapno naj yibꞌanh huneꞌ mak tuꞌ.
8 Ebꞌnaj yuninal yaꞌ Leví qꞌanni isdiezmohal sunil tzet ye tuꞌ tet yet konhobꞌ,
ebꞌnaj tuꞌ lekamto ebꞌnaj,
yajaꞌ wal yaꞌ Melquisedec xin chal Yum Komam Dios tato itzitz yaꞌ,
yuto machi bꞌay chal yinh iskamikal yaꞌ.
9 Chu jalni tato ebꞌnaj titna yinh yaꞌ Leví,
ebꞌnaj qꞌanni chꞌen diezmo,
haꞌ hun ebꞌnaj aqꞌni isdiezmo tet yaꞌ Melquisedec yet yaqꞌni yaꞌ Abraham isdiezmo.
10 Yuto waxanhka maxhto yaꞌ Leví yul sat yibꞌanhqꞌinal tiꞌ yet yul chahlaxo yaꞌ Abraham yu yaꞌ Melquisedec,
yajaꞌ ayxatikꞌa yaꞌ Leví yinh yaꞌ Abraham,
yuto ichmame ye yaꞌ Abraham yinh yaꞌ Leví tuꞌ.
11 Qꞌinalo tato yu ebꞌyaꞌ sacerdote levita watxꞌiko anma Israel yul sat Komam Dios yuto yul isqꞌabꞌ ebꞌyaꞌ sacerdote tuꞌ ischah konhobꞌ Israel isley yaꞌ Moisés,
matxam yilalo ok huneꞌxa mak tzotelo yinh anma,
huneꞌ mak hakaꞌ yaꞌ Melquisedec mach hakaꞌo yaꞌ Aarón,
yaꞌ titna yinh yaꞌ Leví.
12 Yuxin tato chihel-lax hunmajan ebꞌyaꞌ sacerdote,
yilal ishel-laxpaxo ley.
13 Komam Jesucristo,
Komam bꞌay chitzotel huneꞌ tiꞌ,
mach yikꞌalo yaꞌ Leví yehi,
wal xin to yinh hunmajanxa ebꞌnaj Israel bꞌay tit Komam,
yinh yikꞌal Komam tuꞌ xin machi hunu mak oklena sacerdotehal.
14 Kaw johtaj tato Komam Jesucristo yinh yaꞌ Judá titna Komam,
yajaꞌ xin matzet yalkano yaꞌ Moisés tato ebꞌnaj chitit yinh yuninal yaꞌ Judá tuꞌ ay ebꞌnaj chiꞌok sacerdotehal xol anma Israel.
15 Yinh huneꞌ tiꞌ kaw habꞌanto kotxumni yuto huneꞌ mak alaxiko sacerdotehal jinh,
lahan yebꞌ yaꞌ Melquisedec.
16 Ok sacerdotehal yajaꞌ maxhtaj yu huneꞌ ley chalni tato yilal istit yinh huneꞌ majan ikꞌale,
machoj,
to yu yip isqꞌinal Komam mach istanhbꞌal.
17 Yuto yal Komam Dios tet Komam Jesús:
«Hach tiꞌ sacerdote,
chaxhok tzotelo yinh anma wetan yinh sunilbꞌal tiempo hakaꞌ yaꞌ Melquisedec,»a
xhi Komam.
18 Hunteqꞌan chejbꞌanile aqꞌlax yu yaꞌ Moisés yet yalanhtokano tuꞌ xalahwi ismunil yuto machi yip yebꞌ xin matzet iswatxꞌe.
19 Hunteqꞌan chejbꞌanile tuꞌ machi hunu mak ok kꞌulal yul sat Komam Dios yu,
yajaꞌ ay huneꞌxa kaw kꞌul okkano seleloj,
haꞌ ton Komam Jesucristo huneꞌ ayko yipo janma,
yu huneꞌ tuꞌ yuxin chonhhitziko iskꞌatanh Komam Dios.
20 Huneꞌ ayko yipo janma tiꞌ,
yaqꞌ bꞌinaho Komam Dios isbꞌi yinh yet yaltenkanoj.
21 Ebꞌyaꞌ sacerdote Israel mach yaqꞌ bꞌinaho Komam Dios isbꞌi yet yaqꞌlaxkano ismunil ebꞌyaꞌ,
wal Komam Jesucristo Jahawil yaqꞌ bꞌinaho Komam Dios isbꞌi yet yaqꞌnikano ismunil Komam,
hakaꞌ yalni yul Yum Komam Dios bꞌay chala:
«Yaqꞌ bꞌinaho Komam Dios isbꞌi,
machi xin chishel isbꞌa tzet chala yet yalni hakaꞌ tiꞌ:
“Hach tiꞌ sacerdote hach,
chaxhok tzotelo yinh anma wetan yinh sunilbꞌal tiempo,
hakaꞌ yaꞌ Melquisedec,”
xhihayoj.»
22 Yuxin haꞌ Komam Jesús tꞌinhbꞌankano huneꞌ iskabꞌ trato kaw ekꞌbꞌal kꞌul sata huneꞌ bꞌabꞌel.
23 Ebꞌyaꞌ sacerdote yet yalanhtokano tuꞌ machi yu iskankano ebꞌyaꞌ yinh ismunil yinh hunelnhe yuto chilakamto ebꞌyaꞌ,
yuxin kaw txꞌiꞌal ebꞌyaꞌ ekꞌlena yinh huneꞌ munil tuꞌ.
24 Walpaxo Komam Jesucristo machi bꞌaqꞌinhal chikami,
yuxin mach chiꞌekꞌto ismunil tuꞌ tet hunuxa maka,
wal xin sacerdote Komam yinh sunilbꞌal tiempo.
25 Yuxin chaqꞌ Komam kolbꞌanile mach istanhbꞌal tet makta chihitziko iskꞌatanh Komam Dios yu Komam Jesús.
Haꞌ Komam xin chitzotel jinh tet Komam Dios yinh sunilbꞌal tiempo yu mach chikam Komam.
26 Haꞌ Komam Jesucristo tuꞌ hanhechꞌan chu yok tzotelo jinh tet Komam Dios;
yahawil sacerdote Komam,
kaw kꞌulkano Komam,
machi nichꞌano ismul,
machi nino istxꞌojal ayko yinh,
pohbꞌililo isbꞌa xol anma mulum.
Ilaxto Komam iskꞌatanh Komam Dios satato satkanh.
27 Mach lahano Komam hakaꞌ ebꞌyaꞌ yahawil sacerdote titna yinh yuninal yaꞌ Leví,
yuto ebꞌyaꞌ tuꞌ hunun tzꞌayik yalten ebꞌyaꞌ no noqꞌ yinh xahanbꞌalil.
Yinh bꞌabꞌelal chaqꞌ ebꞌyaꞌ isxahanbꞌal yinh ismul,
lahwi tuꞌ kat yalten ebꞌyaꞌ xahanbꞌal yinh ismul anma.
Wal Komam Jesús hunelchꞌan yako isbꞌa Komam xahanbꞌalil yu komul.b
28 Ebꞌyaꞌ aqꞌlax ismunil yok yahawil sacerdote yu isley yaꞌ Moisés masantikꞌa ay istxꞌojal ebꞌyaꞌ,
yajaꞌ wal Iskꞌahol Komam Dios,
huneꞌ mak bꞌay yaqꞌ bꞌinaho Komam isbꞌi yet yaqꞌni ismunil yok yahawil sacerdote yet tzujanilxa,
Komam tuꞌ maxhtikꞌa nichꞌano istxꞌojal yinh sunilbꞌal tiempo.