6
Wal tinanh xin,
bꞌelwojonhwe kosataj,
haxinwal kaw helan chonhelikoj.
Kanojabꞌkano hunteqꞌan bꞌabꞌel kuybꞌanile jabꞌe yinh Komam Jesucristo,
machojabꞌ chonhok kokayenhe,
hakaꞌ kuybꞌanile chihalni yinh kobꞌejnikano kowatxꞌen hunteqꞌan tzet chiꞌiniti kamikal jibꞌanh,
yebꞌ yinh tzet chu janiko janma yinh Komam Dios.
2 Yebꞌ kuybꞌanile yinh yah haꞌ kowiꞌ,
yebꞌ kuybꞌanil janayo koqꞌabꞌ yibꞌanh iswiꞌ mak chichahni ismunil tet Komam Dios,
yebꞌ yinh tzet chu yitzitzibꞌikanh kamom,
yebꞌ yinh isyaꞌtajil mach istanhbꞌal chaqꞌ Komam Dios tet anma.
3 Wal tinanh xin haꞌ kuybꞌanile ayxakanh haꞌ chiwalan teyet ta hak tuꞌ chiꞌel yinh iskꞌul Komam Dios.
4 Haꞌ mak xachahni sajilqꞌinal yul yanma yebꞌ iskꞌulchꞌanil iskꞌul Komam Dios,
yebꞌ xaꞌischah iskꞌulal Komam Espíritu Santo,
5 yebꞌ xin xayabꞌe ischiꞌal Istzotiꞌ Komam Dios,
yebꞌ yinh yip Komam chisye yinh hunteqꞌan chihuli.
6 Hunteqꞌan mak tuꞌ ta chilo isnabꞌal yinh Komam Dios,
¿tzettaxka chu ismeltzo yul isqꞌabꞌ Komam hunelxa?
Yuto lahan hakaꞌ lanhan yanikanh Iskꞌahol Komam Dios yinh kulus hunelxa,
kat yaniko yinh txꞌixwilal sata sunil anma.
7 Qꞌinalo txꞌo txꞌotxꞌ tinanh,
yet chilayaqꞌni haꞌ nhabꞌ kat yukꞌnito txꞌotxꞌ haꞌ;
ta kꞌul tzꞌunubꞌ chaqꞌ txꞌotxꞌ tet naj chimunla sat txꞌotxꞌ,
haꞌ chaliloj ta ayayo iskꞌulal Komam Dios yibꞌanh.
8 Yajaꞌ ta txꞌixnhe teꞌ chaqꞌ txꞌotxꞌ yebꞌ teꞌ komon telaj,
matzet chꞌok txꞌotxꞌ yinh hakaꞌ tuꞌ,
chiꞌelto tzꞌaktiꞌ yibꞌanh txꞌotxꞌ yu Komam,
haxa yinh islahobꞌal xin kat isnhuslaxkanto txꞌotxꞌ.
Kaw linhanojabꞌonhnhetikꞌa yinh tzet ayko yipo janma
9 Waxanhka hak tuꞌ kotzotelanh hex wuxhtaj hex wanabꞌ,
hex xahan ay juanh,
yajaꞌ kaw johtajanh tato hex tiꞌ ayxako iskꞌulchꞌanil Komam Dios teyinh,
haꞌ xin chalniloj tato ayxa hekolbꞌanil.
10 Yuto Komam Dios istoholal chiswatxꞌe,
yuxin mach chisnahulnheto Komam iskꞌulal hewatxꞌe yebꞌ iskꞌulchꞌanil hekꞌul heye tet Komam yet hekolwa yinh mak yetxa Komam Dios yehi,
huneꞌnhe haꞌ xin lanhan hewatxꞌenpaxo tinanh.
11 Kaw xin chijochehanh tato hak tuꞌ chewatxꞌe yinh sunil heyanma yinh sunilbꞌal tiempo,
haxinwal tzꞌajan chechah tzet ayko yipo heyanma.
12 Mach chijochehanh ta chexisabꞌilo yinh ismunil Komam;
wal xin to bꞌeybꞌalnhewe isbꞌeybꞌal makta ayko yanma yinh Komam Dios yebꞌ ay isnimankꞌulal.
Makta chisbꞌeybꞌalnhe hakaꞌ tuꞌ chischah tzet haltebꞌil yu Komam Dios.
13 Yet yaltenkano Komam Dios iskꞌulchꞌanil iskꞌul tet yaꞌ Abraham yebꞌ ta kaw hantanhe yuninal yaꞌ,
haꞌ isbꞌi Komam yaqꞌ bꞌinahoj yet yaltenkanoj,
yuto machi hunuxa mak ekꞌbꞌal yibꞌanh Komam.
14 Yalni Komam hakaꞌ tiꞌ:
«Yinh kaw isyelal,
kaw txꞌiꞌal iskꞌulal chiwaqꞌan tawet,
kat waqꞌni pohchahokanhan hawuninal,»
xhi Komam.
15 Kaw xin niman yute iskꞌul yaꞌ Abraham tuꞌ yechman yinh niman tiempo,
lahwi tuꞌ ischahni yaꞌ tzet halbꞌilkano yu Komam tuꞌ.
16 Hayet chaqꞌni bꞌinaho anma isbꞌi hunu mak yinh hunu tzet ye tuꞌ,
haꞌ isbꞌi hunu mak ekꞌbꞌal yibꞌanh haꞌ chaqꞌ bꞌinahoj;
yuxin hayet chaqꞌni bꞌinaho anma isbꞌi hunu mak yinh hunu tzet ye tuꞌ tꞌinhan chukanoj,
matxa hunu mak chu yok tzotelo yibꞌanhiloj.
17 Hak tuꞌ yute Komam Dios,
yaqꞌ bꞌinaho isbꞌi yinh tzet yaltekanoj,
yunhe isyenilo Komam tet mak bꞌay yalte tuꞌ tato tꞌinhan yukano yu Komam,
mach chiꞌekꞌto yet yijni isbꞌa yinh tzet yalte tuꞌ.
18 Hak tuꞌ xin,
haꞌ kabꞌebꞌ tiꞌ,
mach chu ishekꞌni isbꞌa yuto mach chu yaniko Komam leqꞌtiꞌal;
haꞌ ton tzet yaltekano Komam,
yebꞌ yaqꞌni bꞌinaho isbꞌi yinh tzet yalte.
Hak tuꞌ chu konhyiptzen Komam yunhe iskawxi kokꞌul yinh tzet haltebꞌil jet yu,
hanhonh saybꞌilonh yu Komam yu konhiskolni.
19 Haꞌ tzet ayko yipo janma tuꞌ,
haꞌ chonhlinhbꞌani kat yaqꞌni istꞌinhanil janma,
hakaꞌ chu islinhbꞌan chꞌen ancla teꞌ barco yibꞌanh haꞌ mar.
Huneꞌ iskawxobꞌal kokꞌul xaꞌapni sata Komam Dios hakaꞌta xaqꞌaxponikꞌto yinta qꞌap velo aykanh yiktabꞌal Yatut Komam.
20 Hak tuꞌ yu isbꞌabꞌikto Komam Jesucristo kosataj,
ishajnikano kobꞌeh.
Hak tuꞌ xin yu yokkano Komam tzotelo jinh tet Komam Dios;
yahawil sacerdote yeko Komam jinh yinh sunilbꞌal tiempo,
hakaꞌ yaꞌ Melquisedec yet payat tiempo.a