5
Yuto sunil ebꞌyaꞌ yahawil sacerdote saybꞌililo ebꞌyaꞌ xol anma,
yaqꞌlax ismunil ebꞌyaꞌ istzotel yinh anma tet Komam Dios,
yebꞌ yu yalten ofrenda yebꞌ xahanbꞌal tet Komam yinh ismul anma.
2 Ebꞌyaꞌ yahawil sacerdote tuꞌ lahan ebꞌyaꞌ yebꞌ yet anmahil chihoyxipaxiko ilwebꞌal yinh ebꞌyaꞌ,
yuxin chu istzꞌay iskꞌul ebꞌyaꞌ yinh makta machi isnabꞌal yebꞌ yinh makta kꞌaynatoj.
3 Yuxin yilal yalten ebꞌyaꞌ xahanbꞌal yinh ismul bꞌabꞌel kat yaqꞌni ebꞌyaꞌ xahanbꞌal yinh ismul anma.
4 Machi hunu ebꞌyaꞌ tonhe ok yinh huneꞌ munil kaw ay yelapno tuꞌ,
wal xin to haꞌ Komam Dios saynheko ebꞌyaꞌ,
hakaꞌ yu issaylaxiko yaꞌ Aarón.
5 Hakpax tuꞌ Komam Cristo mach tonhe yako isbꞌa yahawilo sacerdote ischukil,
wal xin haꞌ Komam Dios aqꞌnhe huneꞌ ismunil kaw ay yelapno tuꞌ,
yuto haꞌ Komam Dios halnikano hakaꞌ tiꞌ:
«Hach tiꞌ Inkꞌaholan,
haninan chiwaqꞌan hakawil yinh huneꞌ tzꞌayik tiꞌ,»a
xhihayoj.
6 Yebꞌ xin ay huneꞌxa bꞌay halbꞌilkano yu Komam hakaꞌ tiꞌ:
«Hach tiꞌ sacerdote yinh sunilbꞌal tiempo,
hakaꞌ yaꞌ Melquisedec,»b
xhihayoj.
7 Yet yehikꞌo Komam Jesucristo yul sat yibꞌanhqꞌinal tiꞌ kaw oqꞌi yebꞌ kaw ip txahli tet Komam Dios,
isqꞌanni tet Komam Dios,
Komam ay yip iskolni tet kamikal;
yabꞌen Komam istxah yuto kaw yijem yute isbꞌa Komam.
8 Waxanhka Iskꞌahol Komam Dios ye Komam Jesús,
yajaꞌ hul isyaꞌtajil yibꞌanh kaw xin yijem yute isbꞌa tet Komam Dios yu ej ilwebꞌal hul yibꞌanh.
9 Yu isyijemal Komam tuꞌ yuxin aqꞌlax ismunil yaqꞌni kolbꞌanile mach istanhbꞌal tet makta chiyijen tzet chal Komam.
10 Haꞌ xin Komam Dios anheko Komam Jesús yahawilo sacerdotehal yu istzotel jinh tet Komam,
hakaꞌ yaꞌ Melquisedec yet payat tiempo.
Kaw ay ismay ta chonhmeltzoto jintaj
11 Kaw tzetkꞌato tzet chiwochehan chiwalan teyet yinh hunteqꞌan tiꞌ,
yajaꞌ yaꞌta kexkowatxꞌeniko yinh yuto kaw lanho chitxumcha heyu.
12 Yuto hakaꞌxa istiempohal yichi heyabꞌen kuybꞌanile tiꞌ,
kuywawom hexxam tinanh,
yajaꞌ wal xin ayto yilal hekuylax yinh yakꞌtohal yinh hunteqꞌan bꞌabꞌel kuybꞌanile yet Komam.
Kaw hakaꞌ ye nixhte neneꞌ,
maxhto chu yaqꞌlax hunu tzet ye tuꞌ islobꞌ,
to imeto chiꞌaqꞌlax tet,
hak tuꞌ heyehi.
13 Hunteqꞌan bꞌabꞌel kuybꞌanile tuꞌ yet mak maxhto chiqꞌoji istxumni yinh istoholal,
yuto hakaꞌto nixhte unin imeto chiꞌaqꞌlax tet,
hak tuꞌ yehi.
14 Wal hunteqꞌan kuybꞌanile ayxakanh xin yet mak ayxa isnabꞌal yinh istoholal,
xaqꞌoji istxumni bꞌaytet kꞌul yebꞌ bꞌaytet mach kꞌuloj;
haꞌ mak hakaꞌ tuꞌ lahan hakaꞌ anma yihxa,
chu islohni kawla tzet ye tuꞌ.