4
Yuxin yaqꞌ isbꞌa chito haltelax jok yinh huneꞌ xewilal chaqꞌ Komam Dios,
huneꞌ haltebꞌilkano yu Komam,
yuxin kaw yilal cheyil hebꞌa,
tajka ay hex mach chexok yinh huneꞌ xewilal tuꞌ.
2 Yuto hal-laxpaxo Tzotiꞌ yet kolbꞌanile jet hakaꞌ yu yal-lax tet ebꞌnaj jichmam tuꞌ,
yajaꞌ xin matzet iswatxꞌe yinh ebꞌnaj yet yabꞌen ebꞌnaj,
yuto mach yako yanma ebꞌnaj yinh.
3 Wal hanhonh xajayto yul janma yinh Komam chonhok yinh huneꞌ xewilal chal Komam tuꞌ.
Yu chal yul Yum Komam hakaꞌ tiꞌ:
«Waqꞌ bꞌinaho inbꞌihan,
walnihan yu inhowalan tato maxhtikꞌa chiꞌokto hunteqꞌan anma tiꞌ yul huneꞌ xewbꞌal chiwaqꞌan,»
xhi Komam.a
Yinh kaw yeli hataxtikꞌa yet iswatxꞌenkano Komam Dios sat yibꞌanhqꞌinal tiꞌ isxew Komam yinh ismunil,
4 yuto chal yul Yum Komam Dios yinh ishuj tzꞌayik hakaꞌ tiꞌ:
«Xew Komam yinh ishuj tzꞌayik yinh sunil tzet iswatxꞌe,»b
xhihayoj.
5 Chalnipaxo yul Yum Komam:
«Hunteqꞌan anma tiꞌ mach chiꞌokto yinh huneꞌ xewbꞌal chiwaqꞌan,»c
xhihayoj.
6 Yajaꞌ yilal ayto mak chiꞌokto yinh huneꞌ xewilal tuꞌ tinanh,
yuto tet ebꞌnaj Israel bꞌay bꞌabꞌel hal-lax Tzotiꞌ yet Kolbꞌanile,
yajaꞌ mach okto ebꞌnaj yinh huneꞌ xewbꞌal tuꞌ yu ismanhkꞌomal.
7 Yuxin ay huneꞌ tiempohal yebꞌilkano yu Komam Dios,
haꞌ ton huneꞌ tiempohal bꞌay ayonh tiꞌ tinanh.
Payxatax halbꞌilkano yinh huneꞌ xewbꞌal tiꞌ,
yaqꞌnipaxo Komam yalaꞌ yaꞌ David yul Yum Komam,
bꞌay chala:
«Tato cheyabꞌe tzet chiwalan tinanh hanin heDiosal intiꞌan,
mach hipo cheyute hebꞌa,»d
xhihayoj.
8 Qꞌinalo ta ok ebꞌnaj Israel yinh huneꞌ xewbꞌal tuꞌ yu yaꞌ Josué machim tzotel Komam Dios yinh huneꞌ tiempohal bꞌay ayonh tiꞌ.
9 Yuxin ay huneꞌ xewbꞌal chaqꞌ Komam tet makta yetxa Komam yehi.
10 Yuxin makta chiꞌokto yul huneꞌ xewbꞌal chaqꞌ Komam tiꞌ chixewkano yinh sunil ismunil,
hakaꞌ yu isxew Komam yet lahwi iswatxꞌenkano huneꞌ yul sat yibꞌanhqꞌinal tiꞌ.
11 Yuxin jaqꞌaꞌweko yinh kokꞌul jokto yinh huneꞌ xewbꞌal chaqꞌ Komam,
yunhe machi hunujonh chikobꞌeybꞌalnhe isbꞌeybꞌal ebꞌnaj manhkꞌom tuꞌ.
12 Yuto Istzotiꞌ Komam Dios kaw itzitz sunil chisje yu,
chiqꞌaxpon yul janma hakaꞌ hunu chꞌen espada kabꞌebꞌ yeh.
Istzotiꞌ Komam tuꞌ chiꞌapni yinh janma yebꞌ yinh konabꞌal yebꞌ yinh tzet jehi.
Chisyenilo tzet chiꞌekꞌ yinh konabꞌal yebꞌ yinh janma,
ta kꞌul maka mach kꞌuloj.
13 Sunil tzet watxꞌebꞌil yu Komam Dios,
machi hunu chu yebꞌan isbꞌa sata Komam.
Sunil tzet ye tuꞌ habꞌan ye yul sat Komam,
Komam bꞌay chijal tzettaj chikowatxꞌe.
Komam Jesús haꞌ chitzotel jinh tet Komam Dios
14 Komam Jesús Iskꞌahol Komam Dios,
xameltzo satkanh,
haꞌ chitzotel jinh tet Komam Dios,
yuto yahawil sacerdote ye Komam.
Yuxin yilal kolinhbꞌan kobꞌa yinh kuybꞌanil bꞌay ayko janma.
15 Wal Komam yahawil sacerdote tuꞌ chu istzꞌay iskꞌul jinh yinh koyaꞌtajil,
yuto hayet yekꞌ Komam yinh isnimanil koxol kaw txꞌiꞌal ilwebꞌal hul yibꞌanh hakaꞌ ej ilwebꞌal chul jibꞌanh,
yajaꞌ machi bꞌay yako ismul Komam.
16 Yuxin yinh sunilojabꞌ janma chonhhitziko iskꞌatanh Komam Dios Jahawil,
Komam kaw xahan ayonh yu,
haxinwal chitzꞌaypaxo iskꞌul jinh kat konhiskolnilo yinh ej isyaꞌtajil chihul jinh.