Kaw ekꞌbꞌal yelapno Komam Jesús sata yaꞌ Moisés
3
Yuxin hex wuxhtaj hex wanabꞌ,
hex yet hexxa Komam Dios,
awtebꞌil hex yu Komam yu heyok yuninaloj.
Kaw kam cheyako henabꞌal yinh Komam Jesucristo,
Komam chejbꞌilti yu Komam Dios yebꞌ chitzotel jinh tet Komam hakaꞌ hunu yaꞌ yahawil sacerdote,
haꞌ yinh Komam tuꞌ xin ayko janma.
2 Komam Jesucristo tuꞌ kaw yijem yute isbꞌa tet Komam Dios yinh huneꞌ ismunil aqꞌlax tet;
hakpax tuꞌ yaꞌ Moisés,
kaw yijem yute isbꞌa yaꞌ yinh ismunil aqꞌlax xol iskonhobꞌ Komam Dios.
3 Yajaꞌ Komam Jesús,
ekꞌbꞌal yelapno Komam sata yaꞌ Moisés tuꞌ.
Hakaꞌ hunu naj chiꞌanikanh hunu teꞌ nha,
ekꞌbꞌal yelapno naj yibꞌanh teꞌ nha chiswatxꞌe tuꞌ.
4 Hakaꞌ hunu teꞌ nha tinanh,
yilaltikꞌa ay hunu mak chiꞌanikanh teꞌ,
hak tuꞌ xin ye sunil tzettaj ye tuꞌ,
haꞌ Komam Dios watxꞌenhe.
5 Hak tuꞌ xin yaꞌ Moisés kaw yijem yute isbꞌa yaꞌ ismunla xol iskonhobꞌ Komam Dios yuto ischejabꞌ Komam Dios ye yaꞌ.
Haꞌ xin ismunil yaꞌ haꞌ yalni tet konhobꞌ yinh tzet chal Komam Dios.
6 Wal Komam Jesucristo Iskꞌahol Komam Dios yehi,
kaw yijem yinh ismunil yul Yatut Komam Dios.
Huneꞌ Yatut Komam tuꞌ xin haꞌ ton hanhonh tiꞌ,
yajaꞌ ta tꞌinhan iskawxi kokꞌul yinh tzet ayko yipo janma yinh kaw tzalahilal.
Huneꞌ xewilal chaqꞌ Komam Dios tet iskonhobꞌ
7 Yuxin yul Yum Komam Dios chala ta yal Komam Espíritu hakaꞌ tiꞌ:
«Tato cheyabꞌe tzet chiwaltiꞌan hanin Dios intiꞌan,
8 mach cheyaqꞌ kawxo heyanma hakaꞌ yu yok anma manhkꞌomal wetan bꞌey txꞌotxꞌ desierto,
kinyanikojan yinh ilwebꞌal.
9 Haꞌ bꞌey tuꞌ kinyakojan heyichmam yinh ilwebꞌal,
waxanhka yil ebꞌnaj hunteqꞌan iskꞌulal inwatxꞌehan yulbꞌal 40 (kawinaj) habꞌil.
10 Yuxin tit inhowalan yinh hunteqꞌan anma tuꞌ,
walnihan:
“Nanantanhetikꞌa bꞌay chato hunteqꞌan anma tuꞌ isnabꞌal,
maxhtikꞌa chohtanhelo inbꞌehan,”
kinchihan.
11 Walnihan yu inhowalan hakaꞌ tiꞌ:
“Hunteqꞌan anma tiꞌ maxhtikꞌa chischah huneꞌ xewilal chiwaqꞌan,”a
kinchihan,»
xhi Komam yul Yum.
12 Yuxin hex wuxhtaj hex wanabꞌ,
kaw cheyil hebꞌa,
machojabꞌ hunujex cheyaqꞌ kawxolo heyanma,
machojabꞌ hunujex chebꞌej heyaniko heyanma yinh Komam,
kat heyinilo hebꞌa yinh Komam Dios itzitz.
13 Wal xin hununojabꞌ tzꞌayik heyiptzen hebꞌa hunun hex,
yaqꞌ isbꞌa lanhan istzotel Komam jet hakaꞌ yalni yul Yum,
yunhe machi hunujex chexsubꞌcha yu mule kat iskawbꞌilo heyanma.
14 Yuxin ta linhanonh yinh sunilbꞌal tiempo yinh tzet jako yipo janma yet yalanhtokanoj,
ay komajul iskꞌatanh Komam Jesucristo.
15 Yuto chal yul Yum Komam Dios:
«Tato cheyabꞌe tzet chiwalan tinanh hanin heDiosal intiꞌan,
mach cheyaqꞌ kawbꞌolo heyanma hakaꞌ yute anma manhkꞌon yinh tzet walan,»b
xhihayoj.
16 ¿Mak xin anmahil hunteqꞌan ebꞌnaj lahwi yabꞌen Istzotiꞌ Komam Dios ismanhkꞌon yinh tzet yal Komam tuꞌ?
Haꞌ ton ebꞌnaj jet konhobꞌ Israel yilti yaꞌ Moisés yul konhobꞌ Egipto.
17 ¿Mak yinh xin tit ishowal Komam Dios yulbꞌal 40 (kawinaj) habꞌil?
Haꞌ ton hunteqꞌan mak yako ismul tet Komam bꞌey txꞌotxꞌ desierto,
iskamkano bꞌey tuꞌ.
18 Yebꞌ xin,
¿mak tet yaqꞌ bꞌinaho Komam isbꞌi yet yalni tato mach chiꞌokto yul huneꞌ xewbꞌal chaqꞌ Komam?
Haꞌ ton tet makta manhkꞌon yinh tzet yal Komam.
19 Hak tuꞌ chu kotxumni ta mach okto anma yinh huneꞌ xewbꞌal chaqꞌ Komam tuꞌ,
yuto mach yayto yul yanma yinh Komam.