Huneꞌ kolbꞌanile kaw niman yelapnoj
2
Yuxin kaw yilal janiko konabꞌal yinh hunteqꞌan kuybꞌanile abꞌebꞌilxatikꞌa ju,
haxinwal mach chikohekꞌilo kobꞌa yinh.
2 Yuto ta hunteqꞌan chejbꞌanile yal ebꞌnaj ángel yet payxa kaw ay ismay yukanoj,
yuxin haꞌ mak manhkꞌoni,
ay isyaꞌtajil yibꞌanh hakaꞌ kaw yehi.
3 Hajxamonh chal tuꞌ,
¿tzettaxka chu kokolcha tet isyaꞌtajil ta mach chikam kokꞌul yinh huneꞌ kokolbꞌanil kaw niman yelapnoj?
Yuto haꞌ kaw Komam Jahawil halni huneꞌ Tzotiꞌ yet kolbꞌanile tiꞌ yinh bꞌabꞌelal,
haxa ebꞌyaꞌ abꞌeni,
haꞌ ebꞌyaꞌ aqꞌni johtanhelo yinh kaw isyelal.
4 Yebꞌ xin haꞌtikꞌa Komam Dios yako isbꞌa testigohal yinh huneꞌ Tzotiꞌ Kꞌul yet Kolbꞌanile tiꞌ yu ej yechel yip Komam yebꞌ yu ej kꞌaybꞌalkꞌule,
yebꞌ yu tzettaj aqꞌlax yubꞌ ebꞌyaꞌ yu Komam Espíritu Santo hakaꞌ el yinh iskꞌul Komam Dios.
Huneꞌ mak bꞌay tit kokolbꞌanil
5 Maxhtaj yalanh yip ebꞌnaj ángel yakto Komam Dios huneꞌ yul yibꞌanhqꞌinal bꞌay lanhan kotzotel tiꞌ,
huneꞌ chitohuli.
6 Yuto ay huneꞌ bꞌay chal yul Yum Komam Dios hakaꞌ tiꞌ:
«¿Tzet yelapno ye anma yuxin chanatij?
¿Tzet yelapno ye anma yuxin chawako yinh hakꞌul?
7 Paxna hanikꞌ hawute hawatxꞌen anma sata ebꞌnaj ángel.
Lahwi tuꞌ hayenilo ismay yebꞌ xin kaw ay yelapno elikoj.
8 Hawaniko sunil tzet watxꞌebꞌil hawu yalanh yip anma,»a
xhihayoj.
Yet chalni tato sunil tzettaj ye tuꞌ kan yalanh yip anma,
chaliloj tato machi hunu tzet ye tuꞌ tiꞌ mach kan yalanh yip,
yajaꞌ maxhto ixtanho jilni ta ayko sunil yalanh yip anma.
9 Yajaꞌ wal Komam Jesús,
Komam paxna utelax hanikꞌ tiempohal sata ebꞌnaj ángel yu Komam Dios,
aqꞌlax ismay yebꞌ kaw ay yelapno elikoj yu isyaꞌtajil kamikal,
yuto yu iskꞌulchꞌanil iskꞌul Komam Dios yuxin yaqꞌ isbꞌa yinh kamikal yu iskꞌulalo jinh.
10 Komam Dios watxꞌenhe sunil tzettaj ye tuꞌ,
yebꞌ yu Komam yuxin iswatxꞌe,
choche tato sunil yuninal chischah ismajul satkanh kat yekꞌ yinh iskꞌulchꞌanil Komam;
yu yaqꞌle Komam Jesucristo isyaꞌtajil,
yuxin aqꞌlax ismunil yaqꞌni iskolbꞌanil anma.
11 Sunilonh ayonhxako yuninalo Komam Dios tiꞌ huneꞌnhe Komam yebꞌ huneꞌ mak konhaniko yuninalo Komam tuꞌ,
haꞌ ton xin Komam Jesucristo.
Yu huneꞌ tuꞌ yuxin haꞌ Komam Iskꞌahol Komam Dios,
mach chitxꞌixwi konhyalni yuxhtajoj,
yebꞌ ebꞌix janabꞌ,
mach chitxꞌixwi Komam yalni ebꞌix yanabꞌoj.
12 Hakaꞌ yu yalni Komam Jesús tet Komam Dios bꞌay chala:
«Chaxhwalikꞌojan tet ebꞌnaj wuxhtajan yebꞌ tet ebꞌix wanabꞌan.
Chaxhinbꞌitnhepaxojan xol,
yet chiskutxbꞌan isbꞌa,»b
xhi.
13 Ay huneꞌxa bꞌay chala:
«Yinh Komam Dios chikawxi inkꞌulan,»
xhi.
Ay huneꞌxa bꞌay chalpaxoj:
«Ayinikꞌojan bꞌey tiꞌ yebꞌ wuninalan xayaqꞌ Komam Dios wetan,»c
xhi.
14 Yuxin haꞌ nimanile iqꞌbꞌil yu Komam Jesucristo lahan hakaꞌ isnimanil ebꞌnaj ayko yul isqꞌabꞌ Komam.
Hayet iskam Komam xin isqꞌoji yinh yahaw kamikal,
haꞌ ton naj matzwalil.
15 Hak tuꞌ xin yu iskolni Komam sunil mak ayikto yalanh yip xiwkilal kamikal yinh sunilbꞌal ej habꞌil.
16 Yuto maxhtaj yinh ebꞌnaj ángel hul Komam kolwal,
wal xin to haꞌ ebꞌnaj titna yinh yaꞌ Abraham hul Komam iskoloꞌ.
17 Yuxin kaw yilal yuteko isbꞌa Komam hakaꞌ hanhonh yuxhtajonh tiꞌ,
yu istzꞌay iskꞌul jinh yebꞌ yu yok tzotelo jinh tet Komam Dios,
hakaꞌ hunu yaꞌ yahawil sacerdote kaw yijem,
yaniko isbꞌa Komam xahanbꞌalil jinh yu yelkano komul jibꞌanh.
18 Yuto ekꞌlena Komam Jesucristo yinh isyaꞌtajil yebꞌ yinh ilwebꞌal yuxin ay yip Komam iskolwa jinh yinh ej ilwebꞌal chul jibꞌanh.