4
Yinh sat Komam Dios yebꞌ yinh sat Komam Jesucristo,
Komam chul Jahawiloj,
yebꞌ chul ilno ismul makta itzitz yebꞌ makta kamomxa,
chintaqꞌetojan
2 ta chawalikꞌo kuybꞌanile yet Komam xol anma.
Ta choche anma yabꞌeꞌ,
maka mach choche anma yabꞌeꞌ,
yajaꞌ masan chawalikꞌoj.
Aqꞌ yohtanhelo yinh istxꞌojal chiswatxꞌe,
kat xin hakachwa yinh.
Chawiptzenpaxoj,
yebꞌ niman chawute hakꞌul hakuynipaxo yinh kuybꞌanile.
3 Yuto ay huneꞌ tiempohal chuli bꞌay matxa chischah yabꞌeꞌ anma kuybꞌanile kaw yel chala.
Haxanhe komon tzotiꞌ choche yabꞌeꞌ.
Yuxin hantanhe ebꞌnaj kuywawom chiskutxbꞌako anma,
kat yok kuywal yinh anma tuꞌ,
yajaꞌ kachannhe tzotiꞌ kaw choche iskꞌul anma tuꞌ chal ebꞌnaj.
4 Anma tuꞌ chismajche istxikin yinh kuybꞌanile yel chala,
yinhxanhe xin komon ikꞌtiꞌ bꞌay chako yanma.
5 Yajaꞌ wal hach tiꞌ,
toholojabꞌnhetikꞌa chawute hanabꞌal,
techahojabꞌ isyaꞌtajil hawu,
ekꞌanh hawalaꞌkꞌo Tzotiꞌ yet kolbꞌanile,
yije hamunil tzabꞌiliko hawu.
6 Yaj wal hanintiꞌan toxa chinpotxꞌlaxan hakaꞌ hunu no noqꞌ chiꞌok yinh xahanbꞌalil,
kaw kawilxa yeti istzꞌayikal bꞌay chinkaman.
7 Hakaꞌ hunu mak chiꞌok yinh hunu anhe,
hak tuꞌ yu waqꞌni wanmahan inmunlahan yinh ismunil Komam Dios.
Tinanh xin xakinqꞌojihan inlahnihan inmunilan yinh kaw kꞌul,
kaw inyaꞌilnhehan kuybꞌanile bꞌay ayko janma.
8 Wal tinanh kꞌuwanxa huneꞌ sabꞌehal chiꞌaqꞌlax wetan ispaj selel inmunilan.
Huneꞌ chaqꞌ Komam wetan yet chiꞌapni istzꞌayikal bꞌay chuli,
Komam istoholalnhetikꞌa chiswatxꞌe,
kat yilni yinh tzet chiꞌeliko anma.
Maxhnhetajinan xin chinchahan inmatanan tet Komam,
to chischahpaxo sunil anma yinh sunil iskꞌul chiꞌechmali yinh yulbꞌal Komam yet iskayelal.
Huneꞌ kolwal isqꞌan yaꞌ Pablo tet yaꞌ Timoteo
9 Chiwochehan ta chawako yinh hakꞌul hawul kinhawilnojan yinh anhe,
10 yuto naj Demas xakinisbꞌejkanojan naj,
xato naj bꞌey Tesalónica,
yuto ekꞌbꞌal ayko yanma naj yinh tzet ay yul sat yibꞌanhqꞌinal tiꞌ.
Wal juxhta Crescente xin,
hata bꞌey Galacia to yaꞌ.
Walpaxo juxhta Tito xin,
hata bꞌey Dalmacia topaxoj.
11 Kachanxanhe yaꞌ Lucas aykꞌo inkꞌatanhan.
Wal xin ekꞌanh hawiqꞌaꞌ yaꞌ Marcos kat hawiniti yaꞌ tawintaj,
yuto chiwochehan chikolwa yaꞌ wintajan yinh ismunil Komam Dios.
12 Wal yaꞌ juxhta Tíquico,
xaꞌinchejtojan yaꞌ bꞌey Efeso.
13 Yet chaxhtita,
chawiti huneꞌ inkapahan wakanojan bꞌey yatut juxhta Carpo,
bꞌey konhobꞌ Troas,
yebꞌ hunteqꞌan inlibrohan,
yebꞌ hunteqꞌan wuman kaw yilal yehi.
14 Naj Alejandro,
naj chakꞌom chꞌen,
tzetkꞌaxa ismachiswalilal xaꞌiswatxꞌe naj winhan.
Haꞌ Komam Dios chipajtzeno tet naj,
hakaꞌtikꞌa ismachiswalilal naj tuꞌ.
15 Chawil habꞌa tet naj,
yuto kaw chiskaj naj kuybꞌanile chijalikꞌo tiꞌ.
16 Yet wokan bꞌabꞌel sata ebꞌnaj yahaw yu yil-laxi ta ay inmulan,
kaw machi hunu mak kinkolnihan.
Sunil ebꞌnaj kinbꞌejnikanojan;
machojabꞌ xin chitit ishowal Komam Dios yibꞌanh ebꞌnaj yu huneꞌ tuꞌ.
17 Yajaꞌ wal Komam Dios kolwa winhan,
yaqꞌnipaxo wipan yunhe yijni isbꞌa walnikꞌojan kuybꞌanile yet kolbꞌanile xol sunil anma mach Israeloj,
hak tuꞌ yu yabꞌenkantoj.
Kaw kolwa Komam winhan hakaꞌtanhe kiniskolan yul isqꞌabꞌ noꞌ bꞌalam.
18 Haꞌ Komam Dios chinkolnihan tet sunil ismachiswalilal,
kat xin kiniskꞌubꞌanan yunhe kinyinitojan iskꞌatanh yul satkanh.
¡Alaxojabꞌiko ismay Komam Dios yinh sunilbꞌal tiempo!
Hakojabꞌ tuꞌ.
Yet yalnito yaꞌ Pablo ta chil isbꞌa ebꞌyaꞌ juxhtaj
19 Chawal tet ix janabꞌ Prisca yebꞌ tet juxhta Aquila ta chil isbꞌa.
Chawalpaxo tet sunil mak ay yul yatut juxhta Onesíforo ta chilpaxo isbꞌa.
20 Wal yaꞌ juxhta Erasto wakanojan yaꞌ yul konhobꞌ Corinto,
walpaxo juxhta Trófimo yabꞌiꞌay yaꞌ,
yuxin wakanojan yaꞌ yul konhobꞌ Mileto.
21 Chawako yinh hakꞌul hatit yinh anhe yalanhto maxhto chiꞌok haꞌ nhabꞌ.
Chalto juxhta Eubulo yebꞌ juxhta Pudente yebꞌ juxhta Lino yebꞌ ix janabꞌ Claudia ta chawil habꞌa yinh hakawil.
Yebꞌ sunil mak ayxako yul isqꞌabꞌ Komam bꞌey tiꞌ chalpaxtoj ta chawil habꞌa.
22 Haꞌojabꞌ Komam Jesucristo chiꞌok hawetbꞌihoj,
kat xin yaqꞌni Komam iskꞌulchꞌanil iskꞌul teyet hesunil bꞌey tuꞌ.
¡Hakojabꞌ tuꞌ!